ଭୁବନେଶ୍ବର: ନିର୍ବାଚନକୁ ଅବାଧ ଓ ନିରପେକ୍ଷ କରିବା ପାଇଁ ଲକ୍ଷ୍ୟ । ବେଆଇନ୍ କାରବାର ରୋକିବା ପାଇଁ ଏବେଠୁ ଆରମ୍ଭ ହେଲାଣି ଘନଘନ ଚେକିଂ । ସହର ପ୍ରବେଶ ପଥରେ ଜଗିଛନ୍ତି କମିଶନରେଟ ପୋଲିସର ଷ୍ଟାଟିକ ସର୍ଭିଲାନ୍ସ ଟିମ୍ । ଏୟାରପୋର୍ଟ ଠାରୁ ଆରମ୍ଭ କରି ରେଳଷ୍ଟେସନ, ବସଷ୍ଟାଣ୍ଡ ଓ ସହର ଗଳିକନ୍ଦିରେ ଆରମ୍ଭ ହୋଇଛି ଜୋରଦାର ଚେକିଂ । ରାଜଧାନୀର ବିଭିନ୍ନ ସ୍ଥାନରେ କ୍ୟାମ୍ପ ଲଗାଇ ଛକିଛନ୍ତି ଷ୍ଟାଟିକ ସର୍ଭିଲାନ୍ସ ଟିମ୍ ।
ତେବେ ଆଗକୁ ନିର୍ବାଚନ ଘଡ଼ି ଥିବା ବେଳେ ଖୋର୍ଦ୍ଧା ଜିଲ୍ଲାପାଳଙ୍କ ନିର୍ଦ୍ଦେଶ କ୍ରମେ ସହରର ବିଭିନ୍ନ ସ୍ଥାନରେ ଏବେଠୁ ଚେକିଂ ଆରମ୍ଭ ହେଲାଣି । ଏନେଇ କମିଶନରେଟ ପୋଲିସ ପକ୍ଷରୁ ନିଯୋଜିତ ହୋଇଛନ୍ତି ଷ୍ଟାଟିକ ସର୍ଭିଲାନ୍ସ ଟିମ୍ । ଯାହାକୁ ସନ୍ଦେହ ହେଉଛି ତାକୁ ଯାଞ୍ଚ କରୁଛନ୍ତି ଷ୍ଟାଟିକ ସର୍ଭିଲାନ୍ସ ଟିମ୍ । ତେବେ ରାଜଧାନୀର ବିମାନବନ୍ଦର ବାହାର ଟର୍ମିନାଲ ପାଖରେ ଏକ ସ୍ବତନ୍ତ୍ର କ୍ୟାମ୍ପ କରି ଛକିଛନ୍ତି ଟିମ୍ । ଯେଉଁମାନେ ଆକାଶପଥ ଦେଇ ସହର ଭିତରକୁ ପ୍ରବେଶ କରୁଛନ୍ତି ସେମାନଙ୍କ ଉପରେ ସନ୍ଦେହ ହେଲେ ତୁରନ୍ତ ଯାଞ୍ଚ କରୁଛନ୍ତି । ସେମାନଙ୍କ ବ୍ୟାଗ ଓ କିଛି ଜିନିଷ ଆଣୁଥିଲେ ତାହାର ପ୍ରମାଣପତ୍ର ସହ ବିଶେଷ କରି କଳା କାରବାର ଉପରେ ନଜର ରଖାଯାଇଛି । ଏପରିକି ଟଙ୍କା କାରବାର, କୌଣସି ଗିଫ୍ଟ ଉପକରଣ, ଗହଣା ବା ସେପରି କିଛି ସନ୍ଦେହଜନକ ଜିନିଷ ସହ ବିଭିନ୍ନ ଦିଗକୁ ନେଇ ଯାଞ୍ଚ କରୁଛନ୍ତି । ଏନେଇ ବିମାନବନ୍ଦର ପାଖରେ ୫ ଜଣିଆ ପୋଲିସ ଟିମ୍ ସହ ଜଣେ ଅଫିସର ଦାୟିତ୍ବରେ ରହିଛନ୍ତି ।
ସେହିପରି ୨ଟି ଟିମ୍ ୨୪ ଘଣ୍ଟିଆ ଦୁଇ ସିଫ୍ଟ ଆଧାରରେ ଡ୍ୟୁଟି କରୁଛନ୍ତି । ସବୁ ଯାତ୍ରୀଙ୍କ ବ୍ୟାଗ୍ ବି ସନ୍ଦେହ ହେଲେ ଯାଞ୍ଚ କରାଯାଉଛି । ସନ୍ଦିଗ୍ଧ ବିମାନଯାତ୍ରୀଙ୍କ ଗତିବିଧି ଉପରେ ମଧ୍ୟ ତୀକ୍ଷ୍ଣ ନଜର ରଖୁଛନ୍ତି ଟିମ୍ । ଏହା ବ୍ୟତୀତ ଯଦି କୌଣସି ବ୍ୟକ୍ତି ସନ୍ଦେହ କରାଯାୁଛି ତେବେ ସେହି ବ୍ୟକ୍ତିର ଗତିବିଧି ସମ୍ପର୍କରେ ମଧ୍ୟ ତଥ୍ୟ ସଂଗ୍ରହ କରୁଛନ୍ତି । ସେହିପରି ସହରରେ ବସଷ୍ଟାଣ୍ଡ ଓ ରେଳ ଷ୍ଟେସନରେ ମଧ୍ୟ ସମାନ ଭାବେ ଟିମ୍ ମୁତୟନ ରହିଛନ୍ତି । ଏହା ସହିତ ସହରର ବିଭିନ୍ନ ପ୍ରବେଶ ପଥରେ ଚେକିଂ ଭେଇକିଲ ଯୋଗେ ଯାଞ୍ଚ କରୁଛନ୍ତି ଷ୍ଟାଟିକ ସର୍ଭିଲାନ୍ସ ଟିମ୍ । ନିର୍ବାଚନ ଆଚରଣ ବିଧି ଲାଗୁ ପରେ ନିର୍ବାଚନ ପାଖେଇ ଆସୁଥିବାରୁ ଭୁବନେଶ୍ଵର ଆସୁଥିବା ଲୋକଙ୍କ ଉପରେ ନଜର ରଖିଛନ୍ତି । ଏପରିକି କେଉଁ କେଉଁ ଗାଡି ପ୍ରବେଶ କରୁଛି ଏହା ସହିତ ନେତାଙ୍କ ରାଲି ବା ସମର୍ଥକଙ୍କ ଆତଯାତ ଉପରେ ମଧ୍ୟ ନଜର ରଖାଯାଉଛି । ନେତା ଓ ମନ୍ତ୍ରୀଙ୍କ ସହ ଆସୁଥିବା କର୍ମୀ ଓ ସମର୍ଥକଙ୍କୁ ମଧ୍ୟ ସନ୍ଦେହ ହେଲେ ଯାଞ୍ଚ କରାଯାଉଛି ।