କଟକ: ଯାଜପୁର ବାରବାଟି ଘଟିଥିବା ବସ ଦୁର୍ଘଟଣା ପଛରେ ରହିଛି ଡ୍ରାଇଭରଙ୍କ ତ୍ରୁଟି । ଏସ.ଟି.ଏର ତଦନ୍ତରୁ ଏହା ଜଣାପଡିଛି । ସମ୍ପୃକ୍ତ ଫେରାର ଥିବା ବସର ଡ୍ରାଇଭରଙ୍କ ବିରୋଧରେ ଆଇପିସିର ଧାରା ୩୦୪ ଧାରାରେ ମାମଲା ରୁଜୁ କରାଯିବ ବୋଲି ସ୍ପଷ୍ଟ କରିଛି ଏସ.ଟି.ଏ । ଏହି ମର୍ମନ୍ତୁଦ ସଡକ ଦୁର୍ଘଟଣା ପଛର ପ୍ରକୃତ କାରଣ କଣ ଜଣାପଡିଛି । ଦୁର୍ଘଟଣାସ୍ଥଳକୁ ଯାଇ ସରଜମିନ ତଦନ୍ତ କରିବା ପରେ ଏହି ନିଷ୍କର୍ସରେ ପହଞ୍ଚିଛି ଏସ.ଟି.ଏ ।
ଏସ.ଟି.ଏର କହିବା ମୁତାବକ ସେହି ସ୍ଥାନରେ ରୋଡ ଇଞ୍ଜିନିୟରିଂରେ କୌଣସି ତ୍ରୁଟି ନଥିଲା । ତେଣୁ ବସର ଡ୍ରାଇଭର ଜଣଙ୍କ ବାମପଟେ ଓଭର୍ ଟେକ କରୁଥିବା ସମୟରେ କିମ୍ବା ଗାଡି ଚଳାଉଥିବାବେଳେ ମୋବାଇଲ ବା ଅନ୍ୟ କୌଣସି କାରଣକୁ ନେଇ ଅନ୍ୟମନସ୍କ ହେବା ଯୋଗୁଁ ଏହି ଦୁର୍ଘଟଣା ଘଟିଥିଲା । ବସରେ ଦୁଇ ଜଣ ଡ୍ରାଇଭର ଥିବା ଜଣାପଡିଛି । ସେପଟେ ବସର ଡ୍ରାଇଭରଙ୍କ ବିରୋଧରେ ଆଇପିସିର ଧାରା ୩୦୪ ବା ଉଦ୍ଦେଶ୍ୟ ବିହୀନ ହତ୍ୟା ଦଫାରେ ମାମଲା ରୁଜୁ କରାଯିବ ବୋଲି କହିଛି ଏସ.ଟି.ଏ ।
ଏହି ମର୍ମନ୍ତୁଦ ବସ ଦୁର୍ଘଟଣାରେ ମୋଟ ୫ ଜଣଙ୍କ ମୃତ୍ୟୁ ଘଟିଥିବା ବେଳେ ବର୍ତ୍ତମାନ ୨୦ ଜଣ ଗୁରୁତର ଆହତ ହୋଇ ଏବେ ବି ଏସସିବିରେ ଚିକିତ୍ସିତ ହେଉଛନ୍ତି । ଏହା ସହିତ ଦୁର୍ଘଟଣାରେ ସାମାନ୍ୟ ଆଘାତ ପାଇଥିବା ୨୬ ଜଣ ଯାତ୍ରୀଙ୍କୁ ଗତକାଲି ଡିସଚାର୍ଜ କରି ଦିଆଯାଇଛି । ତେବେ ସମସ୍ତ ମୃତକ ପଶ୍ଚିମବଙ୍ଗ ବାସିନ୍ଦା ବୋଲି ସଷ୍ଟ ହୋଇ ସାରିଛି । ସେପଟେ ବସ ଦୁର୍ଘଟଣା ଯୋଗୁଁ ଆହତ ହୋଇଥିବା ସମସ୍ତ ୪୬ ଜଣ ଆହତଙ୍କ ମଧ୍ୟରୁ କେବଳ ୧୦ ଜଣଙ୍କୁ ବାଦ ଦେଲେ ଅନ୍ୟ ସମସ୍ତେ ପଶ୍ଚିମବଙ୍ଗ ବାସିନ୍ଦା ।