ସମ୍ବଲପୁର:ଅପରାଧୀକୁ ଏନକାଉଣ୍ଟର । ପୋଲିସକୁ ଆକ୍ରମଣ କରି ପାପୁଲି ଛିଣ୍ଡାଇ ଦେଇଥିବା ଅପରାଧୀ କମୁଲ ପ୍ରଧାନକୁ ଆଜି ଏନକାଉଣ୍ଟର କରିଛି ସମ୍ବଲପୁର ପୋଲିସ । ଅଭିଯୁକ୍ତ କମଲୁ ପ୍ରଧାନର ଡାହାଣ ଗୋଡ଼ ଆଣ୍ଠୁ ତଳେ ବାଜିଛି ଗୁଳି । ଆହତ ଅବସ୍ଥାରେ ଅଭିଯୁକ୍ତଙ୍କୁ ବୁର୍ଲା ଭୀମସାର କାଜୁଆଲିଟି ୱାର୍ଡରେ ଚିକିତ୍ସା କରାଯାଉଛି l
ଆକ୍ରମଣର ପାଲଟା ଜବାବ ଦେଲା ପୋଲିସ:
ସମ୍ବଲପୁର ଅତିରିକ୍ତ ଏସପି ହରେଶ ଚନ୍ଦ୍ର ପାଣ୍ଡେ କହିଛନ୍ତି, ‘ଆଜି ଅଭିଯୁକ୍ତ କଣ୍ଟାପାଲି ଜଙ୍ଗଲ ନିକଟରେ ଥିବାର ବୁର୍ଲା ପୋଲିସକୁ ପ୍ରାୟ 9ଟା ସମୟରେ ସୂଚନା ମିଳିଥିଲା । ଏହି ସୂଚନା ପାଇ ବୁର୍ଲା ଥାନା ଅଧିକାରୀ ଅନୀଲ ପ୍ରଧାନ ଓ ଏସ ଆଇ ଦେବାଶିଷ ଖିଲାର ଅଭିଯୁକ୍ତଙ୍କୁ ଧରିବାକୁ ଯାଇଥିଲା ବେଳେ ଅଭିଯୁକ୍ତ ଏସଆଇ ଖିଲାରଙ୍କୁ ଏକ ଚାପଡ଼ରେ ଆକ୍ରମଣ କରିଥିଲା । ଏଥିରେ ଏସଆଇଙ୍କ ଡାହାଣ ହାତରେ ଗୁରୁତର ଆଘାତ ଲାଗିଥିଲା l ଏହାକୁ ଦେଖି ଆତ୍ମରକ୍ଷା ପାଇଁ ବୁର୍ଲା ଥାନା ଅଧିକାରୀ ଅନୀଲ ପ୍ରଧାନ 2 ଥର ଚେତାବନୀ ଦେବାରୁ ଅଭିଯୁକ୍ତ ବିରତ ନହେବାରୁ ତା ଉପରକୁ 2 ରାଉଣ୍ଡ ଗୁଳି ମାରିଥିଲେ । ଏଥିରେ ଗୋଟିଏ ଗୁଳି ଅଭିଯୁକ୍ତର ଡାହାଣ ଗୋଡ଼ ଆଣ୍ଠୁ ତଳେ ବାଜିଛି l ତାକୁ ଚିକିତ୍ସା ପାଇଁ ବୁର୍ଲା ଭୀମସାରରେ ଭର୍ତ୍ତି କରାଯାଇଛି । ’
ଝଗଡା ସମାଧାନ କରିବାକୁ ଯାଇଥିବା ପୋଲିସକୁ କରିଥିଲା ଆକ୍ରମଣ:
ଗତ ଅକ୍ଟୋବର 4ରେ ବୁର୍ଲା ଥାନା ଅନ୍ତର୍ଗତ ଝରାପାଲି ଗାଁରେ ସ୍ବାମୀ-ସ୍ତ୍ରୀଙ୍କ ମଧ୍ୟରେ ଝଗଡା ହୋଇଥିଲା । ଅପରାଧି କମୁଲ ସ୍ତ୍ରୀକୁ ଆକ୍ରମଣ କରିଥିଲା । ଏହାର ଖବର ପାଇ ସମାଧାନ ପାଇଁ ପହଞ୍ଚିଥିଲେ ପୋଲିସ କନେଷ୍ଟବଳ ସରୋଜ ଭୋଇ । ହେଲେ ସମାଧାନ ବଦଳରେ ସରୋଜଙ୍କ ଉପରେ ପାଲଟା ଆକ୍ରମଣ କରିଥିଲା ଅଭିଯୁକ୍ତ କମୁଲ । ତାଙ୍କ ଅବସ୍ଥା ଗୁରୁତର ହେବାରୁ କନେଷ୍ଟବଳ ସରୋଜଙ୍କୁ ପ୍ରଥମେ ବୁର୍ଲା ପରେ କଟକ ସ୍ଥାନାନ୍ତର କରାଯାଇଥିଲା । ଏହାପରେ ଅଭିଯୁକ୍ତକୁ ଧରିବା ପାଇଁ ତଦନ୍ତ ଚଳାଇଥିଲା ପୋଲିସ ।
| ଏହା ମଧ୍ୟ ପଢନ୍ତୁ: |