ପୁରୀ:ଜୈବିକ ଚାଉଳରୁ ପ୍ରସ୍ତୁତ ଅନ୍ନକୁ ପରୀକ୍ଷାମୂଳକ ଭାବେ ମହାପ୍ରଭୁଙ୍କ କୋଠ ଭୋଗରେ ଲାଗି କରାଯାଇଛି । ଆଗାମୀ ଦିନରେ ଶ୍ରୀମନ୍ଦିର ପରିଚାଳନା କମିଟିର ପରାମର୍ଶ ଏବଂ ସୁଆର ମହାସୁଆର ନିଯୋଗର ପରାମର୍ଶ ଅନୁସାରେ ଏହାକୁ ପୂର୍ଣ୍ଣ ରୂପରେ କାର୍ଯ୍ୟକାରୀ କରାଯିବ । କୃଷି ବିଭାଗ ପକ୍ଷରୁ ପାଞ୍ଚ ପ୍ରକାରେ ଜୈବିକ ଚାଉଳ ଶ୍ରୀମନ୍ଦିର ପ୍ରଶାସନକୁ ଯୋଗାଇ ଦିଆଯିବା ନେଇ ନିଷ୍ପତ୍ତି ହୋଇଛି । ଗୋବିନ୍ଦ ଭୋଗ, ଝିଲି, ପଦ୍ମକେଶରୀ, କଳା ଜିରା ଏବଂ ହଜାର ଚଉଦ ଚାଉଳ ଯୋଗାଇ ଦେବା ପାଇଁ ନିଷ୍ପତ୍ତି ହୋଇଛି ।
- ଜୈବିକ ଚାଉଳରୁ ପ୍ରସ୍ତୁତ ହେଲା କୋଠ ଭୋଗ :
ଗୁରୁବାର ଦିନ(ଫେବୃଆରୀ ୨୦ ତାରିଖ) ଜୈବିକ ଚାଉଳରେ କୋଠ ଭୋଗ ପ୍ରସ୍ତୁତ ହୋଇଛି । ଆଗକୁ ସମସ୍ତଙ୍କର ପରାମର୍ଶ ଅନୁଯାୟୀ ଗୋବିନ୍ଦ ଭୋଗ ଏବଂ ଝିଲି ଜୈବିକ ଚାଉଳରେ କୋଠ ଭୋଗ ପ୍ରସ୍ତୁତ କରାଯିବ । ଅନ୍ୟ ତିନି ପ୍ରକାରର ଚାଉଳ ପଦ୍ମକେଶରୀ, କଳାଜିରା ଏବଂ ହଜାର ଚଉଦ ଚାଉଳରେ ମହାପ୍ରଭୁଙ୍କ ବିଭନ୍ନ ପ୍ରକାର ପିଠା ଭୋଗ ପ୍ରସ୍ତୁତ କରାଯିବ । କୋଠ ଭୋଗ ପ୍ରସ୍ତୁତ ପାଇଁ ଦୈନିକ ୭୦ କେଜିରୁୁ ୧୦୦ କେଜି (ଏକ କୁଇଣ୍ଟାଲ୍) ଚାଉଳ ଆବଶ୍ୟକ ଥିବାରୁ ପ୍ରାଥମିକ ପର୍ଯ୍ୟାୟରେ ମହାପ୍ରଭୁଙ୍କ କୋଠ ଭୋଗକୁ ସମ୍ପୂର୍ଣ୍ଣ ଜୈବିକ ଚାଉଳରେ ପ୍ରସ୍ତୁତ କରାଯିବା ନେଇ ନିଷ୍ପତ୍ତି ହୋଇଛି । ପରବର୍ତ୍ତୀ ସମୟରେ ଜୈବିକ ଚାଉଳ ଉତ୍ପାଦନ ବଢ଼ିଲେ ଭକ୍ତଙ୍କ ପାଇଁ ପ୍ରସ୍ତୁତ ହେଉଥିବା ମହାପ୍ରସାଦ ମଧ୍ୟ ଜୈବିକ ଚାଉଳରେ କରାଯିବ ।
- ସ୍ବାଗତ କଲେ ସୁଆର ମହାସୁଆର ନିଯୋଗ:
ରାସାୟନିକ ସାର ମୁକ୍ତ ଚାଉଳ ଶରୀର ପାଇଁ ଉପକାରୀ ହୋଇଥିବାରୁ ଜୈବିକ ଚାଉଳରେ ମହାପ୍ରସାଦ ପ୍ରସ୍ତୁତ ପାଇଁ ଶ୍ରୀମନ୍ଦିର ପ୍ରଶାସନ ଏବଂ କୃଷି ବିଭାଗ ମିଳିତ ଉଦ୍ୟମ ଆରମ୍ଭ କରିଛନ୍ତି । ଜୈବିକ ଚାଉଳରୁ ମହାପ୍ରଭୁଙ୍କ କୋଠ ଭୋଗ ପ୍ରସ୍ତୁତକୁ ସ୍ବାଗତ କରିଛନ୍ତି ସୁଆର ମହାସୁଆର ନିଯୋଗ ଓ ବରିଷ୍ଠ ସେବାୟତ । ତେବେ ଏହାର ଅଧିକ ଦର ରହୁଥିବାରୁ ମହାପ୍ରସାଦ ଦରବୃଦ୍ଧି ଯେଭଳି ନହୁଏ । ସେ ଦିଗରେ ଶ୍ରୀମନ୍ଦିର ପ୍ରଶାସନ ଧ୍ୟାନ ଦେବାକୁ ଭକ୍ତ ଦାବି କରିଛନ୍ତି । ଏହା କାର୍ଯ୍ୟକାରୀ କରାଯିବା ପୂର୍ବରୁ ସମସ୍ତ ଦିଗକୁ ଅନୁଧ୍ୟାନ କରାଯାଇ ଭକ୍ତଙ୍କୁ ସୁହାଇବା ଭଳି କାର୍ଯ୍ୟ କରାଯିବ । ଡାଲି ଏବଂ ଅନ୍ୟାନ୍ୟ ପନିପରିବା ମଧ୍ୟ ଜୈବିକ ପଦ୍ଧତିରେ ଚାଷ କରାଯାଇ ଶ୍ରୀମନ୍ଦିରକୁ ଯୋଗାଣ ପାଇଁ ଲକ୍ଷ୍ୟ ଥିବା କହିଛନ୍ତି ।
- କୋଠ ଭୋଗରେ ଲାଗିଲା ଜୈବିକ ଚାଉଳ:
ଶ୍ରୀମନ୍ଦିର ସୁଆର ମହାସୁଆର ନିଯୋଗ ସଧାରଣ ସମ୍ପାଦକ ନାରାୟଣ ମହସୁଆର କହିଛନ୍ତି," ଗତ 15 ତାରିଖରେ କୃଷି ବିଭାଗ ପକ୍ଷରୁ ଏକ ବୈଠକ ଅନୁଷ୍ଠିତ ହେଇଥିଲା । ଏହି ବୈଠକରେ ବହୁ ପଦାଧିକାରୀ, ସୁଆର ମହାସୁଆର ନିଯୋଗ ଯୋଗ ଦେଇଥିଲେ । ସେଠାରେ ସ୍ଥିର ହୋଇଥଲା ଆମେ ମହାପ୍ରଭୁଙ୍କ କୋଠ ଭୋଗରେ ପ୍ରଥମେ ଜୈବିକ ଚାଉଳ ବ୍ୟବହାର କରିବୁ । କୃଷି ବିଭାଗ ପକ୍ଷରୁ ପାଞ୍ଚ ପ୍ରକାର ଚାଉଳ ଆମକୁ ଦେଇଥିଲେ । କଳାଜିରା, ଗୋବିନ୍ଦ ଭୋଗ, ଝିଲି, ପଦ୍ମ କେଶରୀ, ହଜାରେ ଚଉଦ କିସମ ଚାଉଳ ଆମକୁ ଦେଖାଇ ଥିଲେ । ଆମେ ମହାପ୍ରଭୁଙ୍କ ମଧ୍ୟାହ୍ନ ଧୂପରେ ଜୈବିକ ଚାଉଳରୁ ପ୍ରସ୍ତୁତ ଅନ୍ନ ଭୋଗ କରିଥିଲୁ । ଏହି ଚାଉଳରୁ ଆମେ କିଛି ବ୍ୟଞ୍ଜନ ମଧ୍ୟ କରିଥିଲୁ ।"
- ରାସାୟନିକ ଏବଂ ଜୈବିକ ଚାଉଳ ମଧ୍ୟରେ ପାର୍ଥକ୍ୟ :
ସେ ଆହୁରି କହିଛନ୍ତି," ରାସାୟନିକ ସାରରୁ ଉତ୍ପାଦନ ହେଉଥିବା ଚାଉଳ ଓ ଜୈବିକ ଚାଉଳ ମଧ୍ୟରେ ବହୁତ୍ ପାର୍ଥକ୍ୟ ରହୁଛି । ଦୁଇ ଚାଉଳର ସ୍ଵାଦ ମଧ୍ୟରେ ବହୁତ ଫରକ ରହୁଛି । ତେବେ କୃଷି ବିଭାଗ ପକ୍ଷରୁ ଆମକୁ ଦିଆଯାଇଥିବା ପାଞ୍ଚ ପ୍ରକାର ଚାଉଳ ମଧ୍ୟରୁ ଗୋବିନ୍ଦ ଭୋଗ ଓ ଝିଲି ଜୈବିକ ଚାଉଳକୁ କୋଠ ଭୋଗ ଓ ଅନ୍ୟ ଚାଉଳକୁ ପିଠା ଭୋଗ ପ୍ରସ୍ତୁତିରେ ଲଗାଇବା ନେଇ ସ୍ଥିର କରିଛୁ । ଜୈବିକ ଚାଉଳ ଉତ୍ପାଦନ କମ ରହିବ । ଏଣୁ ଏହାର ଦାମ ଅଧିକ ରହିବ । ଏହାକୁ ସବ୍ ସିଡରେ ଯୋଗାଇ ଦେବାକୁ ଆମେ ଶ୍ରୀମନ୍ଦିର ମୁଖ୍ୟ ପ୍ରଶାସକଙ୍କୁ କହିଛନ୍ତି । ଫଳରେ ଭକ୍ତ ଆଗାମୀ ଦିନରେ ଜୈବିକ ଚାଉଳରୁ ପ୍ରସ୍ତୁତ ମହାପ୍ରସାଦ ଉଚିତ୍ ମୂଲ୍ୟରେ ପାଇ ପାରିବେ ଶ୍ରଦ୍ଧାଳୁ ।"