ଅନୁଗୋଳ: କୋଲ ବ୍ଲକ ଆବଣ୍ଟନକୁ ନେଇ ଜୋର ଧରିଲା ବିରୋଧ । ଆନ୍ଦୋଳନକୁ ଓହ୍ଲାଇଲେ କ୍ଷତିଗ୍ରସ୍ତ ହେବାକୁ ଥିବା 40ରୁ ଅଧିକ ଗ୍ରାମବାସୀଙ୍କ ସମେତ ସ୍ଥାନୀୟ ବିଧାୟକ । ଅନୁଗୋଳ ଜିଲ୍ଲା ତାଳଚେରରେ ଘରୋଇ କୋଇଲା କମ୍ପାନୀଙ୍କୁ କୋଇଲା ବ୍ଲକ ଆବଣ୍ଟନ ପ୍ରକ୍ରିୟା ବିରୁଦ୍ଧରେ ତେଜିଛି ଆନ୍ଦୋଳନ । ପୂର୍ବରୁ ମହାନଦୀ କୋଇଲା କମ୍ପାନୀ (MCL) ଭାରତ ସରକାରଙ୍କ ଅଧୀନରେ ରହିଛି । ଏବେ କିନ୍ତୁ MCL ପରିବର୍ତ୍ତେ ଅନ୍ୟ ଘରୋଇ କମ୍ପାନୀକୁ ବ୍ଲକ ଆବଣ୍ଟନ ପାଇଁ ଯୋଜନା କରାଯାଉଛି । ଯାହାକୁ ନେଇ ଆରମ୍ଭ ହୋଇଛି ବିରୋଧ ପ୍ରଦର୍ଶନ ।
ଘରୋଇ କୋଇଲା କମ୍ପାନୀକୁ କୋଇଲା ବଣ୍ଟନକୁ ବିରୋଧ କଲେ ତାଳଚେର ବିଧାୟକଙ୍କ ସମେତ ପାଖାପାଖି ୪୦ଟି ଗ୍ରାମର ଗ୍ରାମବାସୀ । ଏକ ବିରାଟ ଶୋଭାଯାତ୍ରାରେ ସହର ପରିକ୍ରମା କରି ଉପଜିଲ୍ଲାପାଳଙ୍କ ଅଫିସ ସମ୍ମୁଖରେ ଏକ ପ୍ରତିବାଦ ସଭା କରିବା ସହ ରାଷ୍ଟ୍ରପତି, ପ୍ରଧାନମନ୍ତ୍ରୀ ଓ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଏକ ସ୍ମାରକପତ୍ର ପ୍ରଦାନ କରାଯାଇଛି । ସୂଚନା ଅନୁଯାୟୀ, ଆସନ୍ତା ୧୫ ତାରିଖରେ ତାଳଚେର ବ୍ଲକର ପାଖାପାଖି ୪୦ଟି ଗ୍ରାମର ନୂତନ କୋଲ ବ୍ଲକକୁ ଘରୋଇକରଣ କରିବା ଲାଗି କେନ୍ଦ୍ର ସରକାରଙ୍କ ପକ୍ଷରୁ ନିର୍ଦ୍ଧାରିତ ହୋଇସାରିଛି । ତେବେ ସ୍ଥାନୀୟ ଗ୍ରାମବାସୀ ଏମସିଏଲକୁ କୋଲ ବ୍ଲକଗୁଡିକ ଦେବା ପାଇଁ ଦାବି କରୁଥିବାବେଳେ କେନ୍ଦ୍ର ସରକାର ଏହାକୁ ଘରୋଇକରଣ କରିବାକୁ ନିଷ୍ପତ୍ତି ନେଇଛନ୍ତି ଯାହାଦ୍ୱାରା ଗ୍ରାମବାସୀମାନେ ନିଯୁକ୍ତି ଓ କ୍ଷତିପୂରଣ ପାଇବାରେ ବିଭିନ୍ନ ସମସ୍ୟାର ସମ୍ମୁଖୀନ ହେବେ ବୋଲି ଅଭିଯୋଗ ହୋଇଛି ।