ଭୁବନେଶ୍ବର:ମିଳୁନି ମୁମ୍ବାଇ ମାୟାନଗରୀ ଗଞ୍ଜେଇ ଚାଲାଣ ଲିଙ୍କ୍, ହତାଶ ସ୍ପେଶାଲ କ୍ରାଇମ୍ ୟୁନିଟ (SCU), ମିଳିଲା ୪ ରାଜ୍ୟର ୪ ବଡ଼ ସହଯୋଗୀଙ୍କ ଲିଷ୍ଟ । ପୋଲିସ ରିମାଣ୍ଡରେ ଆଣି ଗଞ୍ଜେଇ ମାଫିଆ ରାହୁଲଠୁ ମିଳିଛି ଏମିତି ଲିଙ୍କ୍ ।ଏନସିବି ଓ ୪ ରାଜ୍ୟ ପୋଲିସର ସହଯୋଗରେ ଆନ୍ତଃରାଜ୍ୟ ଗଞ୍ଜେଇ ସିଣ୍ଡିକେଟର ବଳୟ ଭେଦ କରିବାକୁ ଅଣ୍ଟା ଭିଡିଛି କମିଶନରେଟ ପୋଲିସର । ତିନି ଦିନ ଧରି ରିମାଣ୍ଡରେ ଆଣି ଗଞ୍ଜେଇ ମାଫିଆ ରାହୁଲକୁ ପଚରାଉଚରା ବେଳେ ମିଳିଥିବା ତଥ୍ୟ ଆଧାରରେ ସୂଚନା ଦେଇ ଏହିପରି କହିଛନ୍ତି ପୋଲିସ ।
ମାଲକାନଗିରିରୁ ଗଞ୍ଜେଇ ଯୋଗାଡ଼ କରୁଥିଲା ରାହୁଲ । ରାଜ୍ୟ ବାହାରକୁ ସପ୍ଲାଏ ଦେବାରେ ସହଯୋଗ କରୁଥିଲା ।ପଶ୍ଚିମବଙ୍ଗରୁ ପୁରୁଣା ଗାଡି କିଣି ସିକ୍ରେଟ ଚାମ୍ବର କରି ସପ୍ଲାଏ କରୁଥିଲା ରାଜ୍ୟ ବାହାରକୁ । ଏନେଇ ପଶ୍ଚିମ ବଙ୍ଗର କିଛି ପୁରୁଣା ଗାଡି ଡିଲରଙ୍କ ସହ ସହ ଥିଲା ଖାସ କନେକ୍ସନ । ଅନେକ ଗାଡି କିଣି ଚିତ୍ରକୋଣ୍ଡାରୁ ସିଧା ଗଞ୍ଜେଇ ଚାଲାଣ କରିଛି ଅନେକ ରାଜ୍ୟକୁ । ବିଭିନ୍ନ ରାଜ୍ୟରେ ଓଡିଶା ଗଞ୍ଜେଇର ଡିମାଣ୍ଡ ଦେଖି ଖୁସ୍ ହୋଇଯାଇଥିଲା ରାହୁଲ । ଗଞ୍ଜେଇ କିଲୋ ପିଛା ୩ରୁ ୪ହଜାର ଟଙ୍କାରେ କିଣି ୧୫ ରୁ ୨୦ହଜାର ଟଙ୍କାରେ ବିକ୍ରି କରୁଥିଲା ।କ୍ଵିଣ୍ଟାଲ କ୍ଵିଣ୍ଟାଲ ଗଞ୍ଜେଇ ସପ୍ଲାଏ କରି ମାଲାମାଲ ସହ ୩ବର୍ଷ ଧରି ପୋଲିସର ରାଡାରକୁ ଆସିନଥିଲା ।
ଏନେଇ ପୋଲିସ ଓ ବିଭିନ୍ନ ଏଜେନ୍ସି ହାତରେ ଧରା ନ ପଡ଼ିବାକୁ ବିଭିନ୍ମ ଉପାୟ ବାଛିଥିଲା ସେ । ନଜର ହଟାଇବା ଭଳି ଟେକନିକ ଆପଣାଇ ଥିଲା ରାହୁଲ ।ଏପରିକି ପ୍ରେସ ଲେଖା ଗାଡିରେ ଗଞ୍ଜେଇ ଚାଲାଣ କରିବା ମଧ୍ୟ ରାହୁଲର ଦିମାଗ ରହିଥିଲା । ତେବେ ଗତ ୧୧ ଫେବୃଆରୀରେ ତାର ସହଯୋଗୀ କାର୍ ଯୋଗେ ଗଞ୍ଜେଇ ଚାଲାଣ ବେଳେ ଧରାପଡିଥିଲେ ୩ଜଣ । ଯେଉଁମାନଙ୍କୁ ଦେଖା କରିବା ପାଇଁ ଜେଲକୁ ଆସି ରାହୁଲ ଧରାପଡ଼ିଥିଲା ପୋଲିସ ହାତରେ । ରାହୁଲର ନେଟୱର୍କର ଚେର ପାଇବା ପରେ । ରାଜ୍ୟ ବାହାର ଲିଙ୍କ ନେଇ ତନାଘନା କରାଇବାକୁ ପୋଲିସ ପ୍ରୟାସ ଚଳାଇଛି ।ରାହୁଲର କିଛି ତରିକା ନେଇ ପୋଲିସ ଅଡୁଆରେ ପଡ଼ିଛି । ପରିବା ବୋଝେଇ ଗାଡିରେ ଗଞ୍ଜେଇ କାରବାର କରିବାର ମଧ୍ୟ ପୋଲିସ ସୂଚନା ପାଇଛି ।
ଏନେଇ ଏସଟିଏଫ ଓ ଏନସିବି ସହ ଚାରି ରାଜ୍ୟର ପୋଲିସର ସହଯୋଗ ଲୋଡିଛି ପୋଲିସ ।ତେବେ ସହଯୋଗିଙ୍କ ଲିଙ୍କ୍ ମିଳିଥିବା ରାଜ୍ୟର ପୋଲିସର ସହାୟତାରେ ସେମାନଙ୍କ ତଥ୍ୟ କାଢ଼ିବାକୁ ଚାହୁଁଛି କମିଶନରେଟ ପୋଲିସ ।ତିନି ବର୍ଷ ଧରି ବଡ଼ ଧରଣର ଗଞ୍ଜେଇ ଚାଲାଣ ସିଣ୍ଡିକେଟ ଚଳାଉଥିଲା ରାହୁଲ । ରାହୁଲର ରାଜ୍ୟ ବାହାରର ଲିଙ୍କ୍ ସାମ୍ନାକୁ ଆସିବାପରେ ତାର ଆର୍ଥିକ କାରବାର ମଧ୍ୟ ତନାଘନା ହୋଇଛି । ପୋଲିସ ଜାଣିବାକୁ ପାଇଛି ଅନେକ ବେପାରୀଙ୍କ ଠାରୁ ୟୁପିଆଇ ପେମେଣ୍ଟ ଓ ଅନଲାଇନ ପେମେଣ୍ଟରେ ଟଙ୍କା ନେଉଥିଲା ଅର୍ଥାତ୍ ଆଗୁଆ ପେମେଣ୍ଟ ପାଇବା ପରେ ସପ୍ଲାଏ ଦେଉଥିଲା ରାହୁଲ ।