କଟକ: ସୁଧୁରୁଛି ଖୋର୍ଦ୍ଧା ବିଜେପି ବିଧାୟକ ପ୍ରାର୍ଥୀ ପ୍ରଶାନ୍ତ ଜଗଦ୍ଦେବଙ୍କ ସ୍ୱାସ୍ଥ୍ୟବସ୍ଥା । ବର୍ତ୍ତମାନ ପୂର୍ବ ଅପେକ୍ଷା ସୁସ୍ଥ ହୋଇ ଆସିଲେଣି ବିଧାୟକ । ତେବେ ଏସସିବି ମେଡିକାଲ କର୍ତ୍ତୃପକ୍ଷ ପ୍ରଶାନ୍ତ ଜଗଦ୍ଦେବଙ୍କ ସ୍ୱାସ୍ଥ୍ୟାବସ୍ଥା ନେଇ ଏକ ଷ୍ଟାଟସ ରିପୋର୍ଟ ଦାଖଲ କରିବେ । ପ୍ରଶାନ୍ତଙ୍କ ଚିକିତ୍ସା ନେଇ ମେଡିକାଲରେ ଡାକ୍ତରୀ ଟିମ ଗଠନ କରାଯାଇଥିବା ଟିମର ନେତୃତ୍ୱରେ ଥିବା ପ୍ରଫେସର ଡ଼ା. ଜୟନ୍ତ ପଣ୍ଡା ଏହି ଷ୍ଟାଟସ ରିପୋର୍ଟ ତିଆରି କରିବେ ଓ ତାଙ୍କ ଆଇନଜୀବୀଙ୍କୁ ପ୍ରଦାନ କରିବେ ।
ରିପୋର୍ଟରେ ପ୍ରଶାନ୍ତଙ୍କ ସ୍ୱାସ୍ଥ୍ୟାବସ୍ଥା ଏବେ କ'ଣ ରହିଛି ଏବଂ କ'ଣ ସ୍ୱାସ୍ଥ୍ୟ ସମସ୍ୟା ରହିଛି ତାହା ଉଲ୍ଲେଖ କରାଯିବା ନେଇ ଏସସିବି ମେଡିକାଲ ସୁପରିଟେଣ୍ଡେଣ୍ଟ ପ୍ରଫେସର ଡ଼ା. ସୁଧାଂଶୁ ଶେଖର ମିଶ୍ର ସୂଚନା ଦେଇଛନ୍ତି । ଏବେ ପ୍ରଶାନ୍ତଙ୍କ ସ୍ୱାସ୍ଥ୍ୟାବସ୍ଥା ସ୍ଥିର ରହିଛି ବୋଲି କହିଛନ୍ତି ଏସସିବି ଅଧିକ୍ଷକ । ପୂର୍ବରୁ ପ୍ରଶାନ୍ତଙ୍କ ଶରୀରରେ ମଧୁମେହ ପରିମାଣ ଅଧିକା ହୋଇଥିବାରୁ ସେ ଅସୁସ୍ଥ ହୋଇ ପଡ଼ିଥିଲେ । ଗତ ବୁଧବାର ଏସସିବି ନିୟୁ ମେଡ଼ିସିନ ବିଭାଗ ଆଇସିୟୁରେ ତାଙ୍କୁ ଭର୍ତ୍ତି କରାଯାଇ ସମସ୍ତ ପରୀକ୍ଷା ନିରୀକ୍ଷା କରାଯାଇଥିଲା । ଏସସିବିରେ ପ୍ରଶାନ୍ତଙ୍କ ଚିକିତ୍ସା ପାଇଁ ଏକ ସ୍ୱତନ୍ତ୍ର ଡାକ୍ତରୀ ଟିମ ଗଠନ କରାଯାଇଥିଲା । ଉକ୍ତ ଟିମରେ ମେଡ଼ିସିନ ବିଭାଗ, ହୃଦରୋଗ ବିଭାଗ, ଏଣ୍ଡୋକ୍ରାଇନ ବିଭାଗର ବିଭାଗୀୟ ମୁଖ୍ୟ ଓ ଅନ୍ୟାନ୍ୟ ଡାକ୍ତରଙ୍କୁ ନିୟୋଜିତ କରାଯାଇଥିଲା ।