ପ୍ରଧାନମନ୍ତ୍ରୀ ବିଦ୍ୟା ଲକ୍ଷ୍ମୀ ଯୋଜନା, ଏଣିକି ମିଳିବ ମେଧାବୀଙ୍କୁ ଋଣ

ଉଚ୍ଚ ଶିକ୍ଷାରୁ ବଞ୍ଚିତ ହେବେ ନାହିଁ ମେଧାବୀ ଛାତ୍ରଛାତ୍ରୀ । ବିନା ଗ୍ୟାରେଣ୍ଟିରେ ମିଳିବ ପ୍ରଧାନମନ୍ତ୍ରୀ ବିଦ୍ୟା ଲକ୍ଷ୍ମୀ ଯୋଜନାରେ ଋଣ । ଜାଣନ୍ତୁ କେମିତି କରିବେ ଆବେଦନ ।

ଭୁବନେଶ୍ବର:ମେଧାବୀ ଛାତ୍ରଛାତ୍ରୀଙ୍କୁ ମିଳିବ ପ୍ରଧାନମନ୍ତ୍ରୀ ବିଦ୍ୟା ଲକ୍ଷ୍ମୀ ଋଣ । ବିଶେଷ ଭାବରେ ଉଚ୍ଚ ଶିକ୍ଷାନୁଷ୍ଠାନ ଗୁଡିକରେ ନାମ ଲେଖାଇବାରେ ଆର୍ଥିକ ସମସ୍ୟାର ସମ୍ମୁଖୀନ ହେଉଥିବା ମେଧାବୀ ଛାତ୍ରଛାତ୍ରୀ ମାନେ ଏହି ଯୋଜନା ଅଧିନରେ ଋଣ ପାଇପାରିବେ । ଅର୍ଥ ଅଭାବରୁ କୌଣସି ବି ମେଧାବୀ ଛାତ୍ରଛାତ୍ରୀ ଉଚ୍ଚ ଶିକ୍ଷାରୁ ଯେମିତି ବଞ୍ଚିତ ହେବେ ନାହିଁ । ସେନେଇ ସରକାର ଏଭଳି ଏକ ଯୋଜନା ପ୍ରସ୍ତୁତ କରିଛନ୍ତି । ଏହି ଋଣ ବିନା ଗ୍ୟାରେଣ୍ଟିରେ ପ୍ରଦାନ କରାଯିବ ।

ବର୍ଷକୁ କେତେ ଛାତ୍ରଛାତ୍ରୀ ସାମିଲ ହୋଇପାରିବେ ?

ଏହି ଯୋଜନାରେ ବାର୍ଷିକ ସର୍ବାଧିକ ୧ ଲକ୍ଷ ପିଲା ସାମିଲ ହୋଇପାରିବେ । ଯେଉଁ ଛାତ୍ରଛାତ୍ରୀଙ୍କ ପରିବାରର ଆୟ ୮ ଲକ୍ଷ ଯାଏଁ ରହିଥିବ, ସେମାନେ ୩ ପ୍ରତିଶତ ସୁଧ ହାରରେ ୧୦ ଲକ୍ଷ ଟଙ୍କା ଯାଏଁ ଋଣ ନେଇପାରିବେ । ଏହି ବ୍ୟବସ୍ଥା ପୂର୍ବରୁ ୪.୫ ଲକ୍ଷ ଟଙ୍କା ଯାଏଁ ଆୟ ଥିବା ପରିବାର ପିଲାମାନଙ୍କୁ ମିଳୁଥିଲା ।

କିଭଳି କରିବେ ଆବେଦନ ?

ଜଣେ ଆଶାୟୀ ଛାତ୍ରଛାତ୍ରୀ 'ପ୍ରଧାନମନ୍ତ୍ରୀ ବିଦ୍ୟା ଲକ୍ଷ୍ମୀ' ପୋର୍ଟାଲ ଜରିଆରେ ଋଣ ପାଇଁ ଆବେଦନ କରିପାରିବେ । ଏହି ପୋର୍ଟାଲ ମାଧ୍ୟମରେ ଋଣ ପ୍ରଦାଦନକୁ ଅନୁମତି ଦିଆଯିବ । ୭.୫ ଲକ୍ଷ ଯାଏଁ ଋଣକୁ ୭୫ ପ୍ରତିଶତ କ୍ରେଡିଟ୍ ଗ୍ୟାରେଣ୍ଟି ଦିଆଯିବ । ସମସ୍ତ ସରକାରୀ ଓ ଘରୋଇ ଆର୍ଥିକ ଅନୁଷ୍ଠାନ ଗୁଡ଼ିକ ଏହି ଯୋଜନାରେ ସାମିଲ ହୋଇପାରିବେ ।

ଏମିତି କହିଲେ ଉଚ୍ଚଶିକ୍ଷା ମନ୍ତ୍ରୀ:

ଏନେଇ ଉଚ୍ଚଶିକ୍ଷା ମନ୍ତ୍ରୀ ସୂର୍ଯ୍ୟବଂଶୀ ସୂରଜ କହିଛନ୍ତି," ପ୍ରଧାନମନ୍ତ୍ରୀଙ୍କ ନେତୃତ୍ୱରେ ଶିକ୍ଷା କ୍ଷେତ୍ରରେ ଅନେକ ଅଗ୍ରଗତି ହେଉଛି । ଗତକାଲି କ୍ୟାବିନେଟରେ ପ୍ରଧାନମନ୍ତ୍ରୀ ବିଦ୍ୟା ଲକ୍ଷ୍ମୀ ଯୋଜନା ପାରିତ ହୋଇଛି । ଏକ ଲକ୍ଷରୁ ଅଧିକ ବିଦ୍ୟାର୍ଥୀ ଆର୍ଥିକ ଋଣ ଆକାରରେ ହେଉ କିମ୍ବା ପ୍ରୋତ୍ସାହନ ଆକାରରେ ପାଇପାରିବେ । ଭାରତ ବୈଷୟିକ କ୍ଷେତ୍ରରେ ନାଳନ୍ଦା, ତକ୍ଷଶିଳା ବିଶ୍ବ ବିଦ୍ୟାଳୟ ଯେପରି ବିଶ୍ବରେ ପରିଚିତ ଥିଲା । ଆମେ ସେହି ଗରିମା ପୁଣି ଫେରି ପାଇବା ଏଥିରେ ସନ୍ଦେହ ନାହିଁ । "

ଇଟିଭି ଭାରତ, ଭୁବନେଶ୍ବର