ଭୁବନେଶ୍ବର: ଓଡିଶା କୃଷି ଓ ବୈଷୟିକ ବିଶ୍ୱବିଦ୍ୟାଳୟ ପକ୍ଷରୁ ଓଡିଶା ଉତ୍ପାଦକ ଗୋଷ୍ଠୀ ସମ୍ମିଳନୀ ୨୦୨୪ ଅନୁଷ୍ଠିତ ହୋଇଛି । ଏଥିରେ ପ୍ରାୟ 600 ଗୋଷ୍ଠୀ ସାମିଲ ହୋଇଥିଲେ । ତେବେ ଏହି କାର୍ଯ୍ୟକ୍ରମରେ ଅତିଥିମାନେ ଯୋଗଦେଇ ଚାଷୀଙ୍କ ସାଙ୍ଗଠନିକ ବିକାଶ ଓ ଉତ୍ପାଦକ ଗୋଷ୍ଠୀକୁ ଗତିଶୀଳ କରିବାକୁ ପରାମର୍ଶ ଦେଇଛନ୍ତି ।
ଏହି ସମ୍ମିଳନୀରେ କୃଷି ଓ କୃଷକ ସଶକ୍ତିକରଣ ମତ୍ସ୍ୟ ଓ ପ୍ରାଣୀ ସମ୍ପଦ ବିକାଶ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁ ମୁଖ୍ୟ ଅତିଥି ଭାବେ ଯୋଗ ଦେଇ ଉତ୍ପାଦକ ଗୋଷ୍ଠୀକୁ ଗତିଶୀଳ କରିବାକୁ ପରାମର୍ଶ ଦେଇଛନ୍ତି । ଏହି ଉତ୍ପାଦକ ଗୋଷ୍ଠୀ ଜରିଆରେ ରାଜ୍ୟର ଚାଷୀଙ୍କୁ ରୋଜଗାର ମିଳିପାରୁଛି । ବର୍ତ୍ତମାନ ମହିଳା ଓ ଯୁବ ଗୋଷ୍ଠୀଙ୍କୁ ଏ ଦିଗରେ ଆଗେଇ ଆସିବା ପାଇଁ ମନ୍ତ୍ରୀ ପରାମର୍ଶ ଦେଇଛନ୍ତି । ସେହିପରି କ୍ଷୁଦ୍ର ଓ ନାମମାତ୍ର ଚାଷୀଙ୍କୁ ଉତ୍ପାଦକ ଗୋଷ୍ଠୀ ଜରିଆରେ ସାହାଯ୍ୟ ଯୋଗାଇବାର ଆବଶ୍ୟକତା ରହିଛି । ସରକାର ବିଭିନ୍ନ ଯୋଜନା ମାଧ୍ୟମରେ ଉତ୍ପାଦକ ଗୋଷ୍ଠୀ ଗୁଡିକୁ ଏନେଇ ସହାୟତା ଯୋଗାଇ ଦେଉଛନ୍ତି ବୋଲି ରଣେନ୍ଦ୍ର କହିଛନ୍ତି ।
ଅନ୍ୟପଟେ ଓଡ଼ିଶାର କୃଷି ଓ କୃଷକ ସଶକ୍ତିକରଣ ବିଭାଗର ପ୍ରମୁଖ ଶାସନ ସଚିବ ଡ଼. ଅରବିନ୍ଦ କୁମାର ପାଢ଼ୀ କାର୍ଯ୍ୟକ୍ରମରେ ଯୋଗ ଦେଇ କହିଛନ୍ତି ଯେ, ଚାଷୀଙ୍କ ସାଙ୍ଗଠନିକ ବିକାଶ ଉପରେ ଗୁରୁତ୍ବ ଦିଆଯାଉଛି । ସେମାନଙ୍କ ପାଇଁ ବଜାର ବ୍ୟବସ୍ଥା, ବଜାର ସଂଯୋଗୀକରଣ, ଋଣ ବ୍ୟବସ୍ଥା ଆଦି ସବୁକୁ ଧ୍ୟାନ ଦେବାକୁ ହେବ । ଏଥିପାଇଁ ଉତ୍ପାଦକ ଗୋଷ୍ଠୀର ଭୂମିକା ଗୁରୁତ୍ୱପୂର୍ଣ୍ଣ ବୋଲି ସେ କହିଛନ୍ତି । ସେପଟେ କୃଷି ରୂପାନ୍ତରୀକରଣ ସହ କୃଷିଜୀବୀଙ୍କ ମଧ୍ୟ ରୂପାନ୍ତରୀକରଣ ହୋଇଛି । ତେଣୁ ସୂଚନା ଓ ପ୍ରଯୁକ୍ତିବିଦ୍ୟା ମାଧ୍ୟମରେ କିପରି ଚାଷୀଙ୍କ ଉନ୍ନତି କରାଯାଇପାରିବ ସେ ନେଇ ଉତ୍ପାଦକ ଗୋଷ୍ଠୀର ଭୂମିକା ଗୁରୁତ୍ୱପୂର୍ଣ୍ଣ ବୋଲି ଓଡିଶା କୃଷି ଓ ବୈଷୟିକ ବିଶ୍ୱବିଦ୍ୟାଳୟର କୁଳପତି ପ୍ରଫେସର ପ୍ରଭାତ କୁମାର ରାଉଳ କହିଛନ୍ତି । ନାନାଦି ସମସ୍ୟା ଥିଲେ ସୁଦ୍ଧା ଚାଷୀଙ୍କ ବିକାଶ ଆମ ସମସ୍ତଙ୍କର ପ୍ରଥମ କର୍ତ୍ତବ୍ୟ । ତେଣୁ ଏଭଳି ସମ୍ମିଳନୀ ଏ ଦିଗରେ ନିହାତି ଭାବେ ସହାୟକ ହେବ ବୋଲି କୁଳପତି କହିଛନ୍ତି ।