କଟକ: ନିର୍ବାଚନକୁ ନେଇ ସରଗରମ ହେଲାଣି କଟକ ରାଜନିତୀ । ବିଭିନ୍ନ ଦଳ ନିଜ ନିଜର ସମର୍ଥକ ସାଉଁଟିବାରେ ଲାଗି ପଡିଲେଣି । କଟକ ଜିଲ୍ଲାର ସମସ୍ତ ନିର୍ବାଚନ ମଣ୍ଡଳୀରେ ନିର୍ବାଚନୀ ତାତି ଦେଖିବାକୁ ମିଳିଲାଣି । ଆଉ ଏଥିରୁ ବି ବାଦ୍ ପଡିନାହିଁ କଟକ ବାରବାଟୀ ନିର୍ବାଚନ ମଣ୍ଡଳୀ । ଗତଥର ଏହି ନିର୍ବାଚନ ମଣ୍ଡଳୀରୁ କଂଗ୍ରେସ ପ୍ରାର୍ଥୀ ବିଧାୟକ ଭାବେ ନିର୍ବାଚିତ ହୋଇଥିବା ବେଳେ ବିଜେଡି ପାଖାପାଖି ୪ ହଜାର ଭୋଟ ବ୍ୟବଧାନରେ ପରାଜୟ ହୋଇଥିଲା । ଏଥର ବିଜେଡି ପାଇଁ କ'ଣ ରହିବ ଚାଲେଞ୍ଜ, ଦେଖନ୍ତୁ ଏହି ରିପୋର୍ଟ
ଗତ ନିର୍ବାଚନରେ କଟକ ଜିଲ୍ଲାର ସମସ୍ତ ନିର୍ବାଚନ ମଣ୍ଡଳୀରେ ବିଜେଡିର ପ୍ରାର୍ଥୀ ବିଜୟୀ ହୋଇଥିବା ବେଳେ କଟକ ବାରବାଟୀ ନିର୍ବାଚନ ମଣ୍ଡଳୀରେ ପରାଜିତ ହୋଇଥିଲା । କଂଗ୍ରେସ ପ୍ରାର୍ଥୀ ଇଂ ମହମ୍ମଦ ମୋକିମ ଏହି ନିର୍ବାଚନ ମଣ୍ଡଳୀରୁ ବିଜୟୀ ହୋଇଥିଲେ । ପାଖାପାଖି ୪ ହଜାର ଭୋଟ ବ୍ୟବଧାନରେ ବିଜୟୀ ହୋଇଥିଲେ ମୋକିମ । ବିଜେଡି ପ୍ରାର୍ଥୀ ଦେବାଶିଷ ସାମନ୍ତରାୟ ଏହି ନିର୍ବାଚନ ମଣ୍ଡଳୀରୁ ପରାଜିତ ହୋଇଥିଲେ । ଚଳିତ ନିର୍ବାଚନରେ ମଧ୍ୟ ଦେବାଶିଷ, ପୁନର୍ବାର ବିଜେଡିରୁ ବିଧାୟକ ପ୍ରାର୍ଥୀ ହୋଇପାରନ୍ତି ବୋଲି ଚର୍ଚ୍ଚା ହେଉଛି । ଦେବାଶିଷ ମଧ୍ୟ ଏନେଇ ନିଜର ସାଙ୍ଗଠନିକ କାର୍ଯ୍ୟ ଆରମ୍ଭ କରିଦେଲେଣି ।
ଲୋକଙ୍କ ସହ ମିଶିବା, ଦଳର ବିଭିନ୍ନ ସାଙ୍ଗଠନିକ କାର୍ଯ୍ୟ କରିବା, ଚା' ଖଟିରେ ସାମିଲ ହେବା ସହ ପ୍ରତ୍ୟେକ ୱାର୍ଡ ବୁଲୁଛନ୍ତି । କୁହାଯାଉଛି, ଦେବାଶିଷ କୁଆଡେ ପୂର୍ବ ଅପେକ୍ଷା ଏଥର ନିଜର ସାଙ୍ଗଠନିକ କାର୍ଯ୍ୟରେ ଅଧିକ ସମୟ ଦେଉଛନ୍ତି । ଏନେଇ ଦେବାଶିଷ କହିଛନ୍ତି, ରାଜ୍ୟରେ ଏଥର ସମସ୍ତ ୧୪୭ଟି ନିର୍ବାଚନ ମଣ୍ଡଳୀରେ ଦଳ ଭଲ ପ୍ରଦର୍ଶନ କରିବ । ଟିକେଟ୍ କାହାକୁ ମିଳିବ ସେକଥା ନବୀନ ବାବୁ ନିଷ୍ପତ୍ତି ନେବେ । ମାତ୍ର ନବୀନ ମନ୍ତ୍ରରେ ସେ ନିର୍ବାଚନ ବୈତରଣୀ ପାର୍ ହେବେ ବୋଲି କହିଛନ୍ତି ।