ଭୁବନେଶ୍ୱର:ରଜ ପର୍ବ ନେଇ ଚଳଚଞ୍ଚଳ ଗାଁ ଠାରୁ ସହର । ଏହି ପର୍ବରୁ ଦ୍ୱିଗୁଣିତ କରିବାକୁ ପରଦାରେ ରିଲିଜ ହୋଇଛି ମଲ୍ଟି ଷ୍ଟାରଙ୍କ ଓଡ଼ିଆ ଫିଲ୍ମ । ଓଲିଉଡର ୩ ସୁପରଷ୍ଟାର ଅନୁଭବ ମହାନ୍ତିଙ୍କ ଫିଲ୍ମ 'କୁହୁଡି', ସିଦ୍ଧାନ୍ତ ମହାପାତ୍ରଙ୍କ 'ଚନ୍ଦ୍ରବଂଶୀ' ଏବଂ ବାବୁସାନ ମହାନ୍ତିଙ୍କ ଫିଲ୍ମ 'ପାବାର' ରିଲିଜ ହୋଇଛି । ସେପଟେ ପ୍ରି-ରଜରେ ରିଲିଜ ହୋଇସାରିଛି ଭୂମିକା ଦାଶ ଏବଂ ସ୍ୱରାଜ ବାରିକଙ୍କ ଫିଲ୍ମ 'ଟିକେ ଚିକେ ଅଚିହ୍ନା ତୁ' । ତେବେ ପରଦାରେ ଏହି ତିନି ଭିନ୍ନ ଭିନ୍ନ କାହାଣୀକୁ ନେଇ ନିର୍ମିତ ରିଲିଜ ହୋଇଥିବା ବେଳେ ରଜ ସହ ସିନେମାର ମଧ୍ୟ ବେଶ ମଜା ନେଉଛନ୍ତି ଦର୍ଶକ।
'କୁହୁଡି'
ଆଜି ରିଲିଜ ହୋଇଛି ଓଲିଉଡ ସୁପରଷ୍ଟାର ଅନୁଭବ ମହାନ୍ତିଙ୍କ ଫିଲ୍ମ 'କୁହୁଡି' । ନିର୍ଦ୍ଦେଶକ ଅଜୟ ପାଢୀଙ୍କ ନିର୍ଦ୍ଦେଶିତ ଏହି ଫିଲ୍ମରେ ସୁପରଷ୍ଟାର ଅନୁଭବଙ୍କ ସହ ଦ୍ବିପନ୍ବିତ ଦାସମହାପାତ୍ର, ଅଭିନେତ୍ରୀ ସୁପ୍ରିୟା ନାୟକ, ପ୍ରକୃତି ମିଶ୍ର ମଧ୍ୟ ମୁଖ୍ୟ ଚରିତ୍ରରେ ନଜର ଆସିଛନ୍ତି । କୁହୁଡି ଏକ ପାରିବାରିକ ବିଷୟବସ୍ତୁ ଆଧାରିତ ଚଳଚ୍ଚିତ୍ର । ସତ ମିଛର କୁହୁଡି ଭିତରେ କିଭଳି କୁହୁଡି ହଟିଛି ଆଉ ସତ ସାମ୍ନାକୁ ଆସିଛି । ଏଥିରେ ଅନୁଭବ ଜଣେ ଓକିଲ ଭୂମିକାରେ ନଜର ଆସିଥିବା ବେଳେ ଏହି ସିନେମାରେ ଦ୍ବିପନ୍ବିତ ଏକ ଅଭିଯୁକ୍ତ ଭୂମିକାରେ ନଜର ଆସିଛନ୍ତି । ଅନୁଭବଙ୍କ ଏହା ବହୁ ପ୍ରତିକ୍ଷୀତ ଫିଲ୍ମ ହୋଇଥିବା ବେଳେ ଚଳିତ ବର୍ଷର ପରଦାକୁ ଆସୁଥିବା ତାଙ୍କର ପ୍ରଥମ ଫିଲ୍ମ ଅଟେ । ତେବେ ଏହି ଫିଲ୍ମ ରଜରେ ରିଲିଜ ହୋଇଥିବା ବେଳେ ନିଜ ପ୍ରିୟ ଷ୍ଟାରକୁ ପରଦାରେ ଦେଖିବାକୁ ଥିଏଟରରେ ଜମିଛି ଭିଡ଼ ।
'ଚନ୍ଦ୍ରବଂଶୀ'
ସେହିପରି ଓଲିଉଡ ଅଭିନେତା ସିଦ୍ଧାନ୍ତ ମହାପାତ୍ରଙ୍କୁ ପୁଣି ରଜରେ ପରଦାରେ ଦେଖିବାକୁ ମିଳିଛି । ଅଭିନେତାଙ୍କ ଫିଲ୍ମ 'ଚନ୍ଦ୍ରବଂଶୀ' ଆଜି ରିଲିଜ ହୋଇଛି । ୟଶବର୍ଦ୍ଧନ ପଣ୍ଡାଙ୍କ ନିର୍ଦ୍ଦେଶନାରେ ନିର୍ମିତ ଏହି ଫିଲ୍ମରେ ମଲ୍ଟିଷ୍ଟାରଙ୍କୁ ଦେଖିବାକୁ ମିଳିଛି । ଅଭିନେତା ସିଦ୍ଧାନ୍ତ ମହାପାତ୍ର, ଶ୍ରୀତମ ଦାସ, ଆକାଶ ଦାସନାୟକ, ଉଷସୀ ମିଶ୍ର, ରାଜ ରାଜେଶ, ପୁନମ୍ ମିଶ୍ର, ଜସ୍ମିନ୍ ରଥ, ଲିପ୍ସା, ଶକ୍ତି ବରାଳ, ସମରେଶ, ଦୈତାରୀ ପଣ୍ଡା, ପିୟୂଷ ତ୍ରିପାଠୀ ଭଳି ଅନେକ କଳାକାରଙ୍କୁ ନଜର ଆସିଛନ୍ତି । ପାଞ୍ଚ ଭାଇ ଅଲଗା ହୋଇ ରହିଥିବା ବେଳେ କିଭଳି ବାପାଙ୍କ ମୃତ୍ୟୁ ପରେ ସମସ୍ତେ ଏକତ୍ରିତ ହୋଇଛନ୍ତି, ତାହା ଏହି ଚଳଚ୍ଚିତ୍ରରେ ଦେଖିବାକୁ ମିଳିଛି । ପାରିବାରିକ କାହାଣୀକୁ ନେଇ ଫିଲ୍ମଟି ନିର୍ମିତ ହୋଇଥିବା ବେଳେ ଦର୍ଶକଙ୍କ ମନକୁ ଛୁଇଁଛି ଫିଲ୍ମ ।