ରାଉରକେଲା:କେନ୍ଦ୍ର ଲୋକସେବା ଆୟୋଗ (ୟୁପିଏସସି) ଦ୍ବାରା ପରିଚାଳିତ ସିଭିଲ ସେବା ପରୀକ୍ଷା-2023ରେ ସଫଳତା ହାସଲ କରିଥିବା ରାଉରକେଲା ‘ଏନଆଇଟି’ର ପୁରାତନ ଛାତ୍ରଛାତ୍ରୀଙ୍କୁ ସମ୍ମାନିତ କରିଛି ସଂସ୍ଥାନ । ୟୁପିଏସସି ସିଭିଲ ସର୍ଭିସ୍ ପରୀକ୍ଷା-2023ରେ ରାଉରକେଲା ‘ଏନ୍ଆଇଟି’ର ପୁରାତନ ଛାତ୍ରଛାତ୍ରୀଙ୍କ ଉଲ୍ଲେଖନୀୟ ସଫଳତାକୁ ନେଇ ବର୍ତ୍ତମାନ ଗୌରବମୟ ହୋଇଛି ସମଗ୍ର ରାଉରକେଲା ସହର । ସଂସ୍ଥାନର 5ଜଣ ପୁରାତନ ଛାତ୍ରଛାତ୍ରୀ ଚଳିତ ଥର ସିଭିଲ ସେବା ପରୀକ୍ଷାରେ କୃତକାର୍ଯ୍ୟ ହୋଇ ବିଭିନ୍ନ ସେବା ପାଇଁ ଚୟନ ହୋଇଛନ୍ତି ।
ସର୍ବଭାରତୀୟ ସ୍ତରରେ ଦ୍ବିତୀୟ ସ୍ଥାନ ହାସଲ କରିଥିବା ଅନିମେଶ ପ୍ରଧାନ, କମ୍ପ୍ୟୁଟର ସାଇନ୍ସ ଆଣ୍ଡ ଇଞ୍ଜିନିୟରିଂ ବିଭାଗରେ ଏନଆଇଟି ରାଉରକେଲାରୁ 2021 ମସିହାରେ ପାସଆଉଟ ହୋଇଥିଲେ । ସେହିପରି ପଦ୍ମନାଭ ମିଶ୍ର, ରାଙ୍କ 176 ରଖିଥିବା ବେଳେ ସଂସ୍ଥାନର 2018 ବ୍ୟାଚରେ ଇଲେକ୍ଟ୍ରିକାଲ ଇଞ୍ଜିନିୟରିଂ ବିଭାଗରୁ ଅଧ୍ୟୟନ ଶେଷ କରିଛନ୍ତି । ଅନ୍ୟତମ ସଫଳ ଛାତ୍ର ବିଶ୍ୱଜିତ ପଣ୍ଡା ରାଙ୍କ 343ରେ ରହିଛନ୍ତି । ସେ ଇଲେକ୍ଟ୍ରିକାଲ ଇଞ୍ଜିନିୟରିଂରେ 2016 ମସିହାରେ ସଂସ୍ଥାନର ପାସଆଉଟ ହୋଇଥିଲେ । ସଂସ୍ଥାନର ଅନ୍ୟତମ ଛାତ୍ରୀ ଅନୁଷ୍କା ସରକାର ମଧ୍ୟ ସିଭିଲ ସେବାରେ ଚଳିତ ଥର 426 ସ୍ଥାନରେ ରହିଛନ୍ତି । ଏମଏ- ଇନ-ଡେଭଲପମେଣ୍ଟ ଷ୍ଟଡିଜରେ ସେ 2019 ଏନ୍ଆଇଟି ରାଉରକେଲାରୁ ପାସ ଆଉଟ ହୋଇଥିଲେ । ରାଙ୍କ 992ରେ ରହିଛନ୍ତି କଲ୍ଲୋଳ ହଜାରିକା । ସେ ମେକାନିକାଲ୍ ଇଞ୍ଜିନିୟରିଂରେ 2016 ବ୍ୟାଚରେ ଏନ୍ଆଇଟି ରାଉରକେଲାରୁ ପାସଆଉଟ ହୋଇଥିଲେ ।