ହାଇଦ୍ରାବାଦ: ଟିଭି ଇଣ୍ଡଷ୍ଟ୍ରିରୁ ଆସିଲା ପୁଣି ଦୁଃଖଦ ଖବର । ଟିଭି ଅଭିନେତା ଯୋଗେଶ ମହାଜନଙ୍କ ପରଲୋକ । ଯୋଗେଶ ମହାଜନଙ୍କ ଜାନୁଆରୀ ୧୯ ତାରିଖରେ ତାଙ୍କ ଉମରଗାଁଓ ଫ୍ଲାଟରେ ଦେହାନ୍ତ ହୋଇଛି । ସୂଚନା ଅନୁସାରେ, ଅଭିନେତା ସୁଟିଂ ସେଟରେ ନ ପହଞ୍ଚିନଥିଲେ । ରୁମରେ ଅଚେତ ଅବସ୍ଥାରେ ପଡିରହିଥିଲେ । ଯାହା ପରେ ତାଙ୍କୁ ଡାକ୍ତରଖାନା ନିଆଯାଇଥିଲା ଯେଉଁଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ତେବେ ଅଭିନେତା ହୃଦଘାତରେ ଆଖି ବୁଜିଥିବା ଜଣାପଡିଥିଲା । ତେବେ ତାଙ୍କ ବିୟୋଗରେ ପରିବାର ଏବଂ ଇଣ୍ଡଷ୍ଟ୍ରିରେ ଶୋକର ଛାୟା ଖେଳିଯାଇଛି ।
ଫ୍ଲାଟରୁ ଅଚେତ୍ ଅବସ୍ଥାରେ ମିଳିଲେ ଯୋଗେଶ
'ଶିବ ଶକ୍ତି ତପ ତ୍ୟାଗ ତାଣ୍ଡବ' ଫେମ୍ ଅଭିନେତା ଯୋଗେଶଙ୍କ ଆପାର୍ଟମେଣ୍ଟ ସୁଟିଂ ସେଟ୍ ପାଖରେ ଥିଲା ଏବଂ ଯେତେବେଳେ ସେ ସୁଟିଂ ପାଇଁ ଆସିନଥିଲେ, କ୍ରୁ ସଦସ୍ୟମାନେ ତାଙ୍କୁ ଖୋଜିବା ପାଇଁ ତାଙ୍କ ଘରକୁ ଯାଇଥିଲେ । ଯେତେବେଳେ ଘରର ଦ୍ୱାର ବହୁତ ସମୟ ପର୍ଯ୍ୟନ୍ତ ଖୋଲା ନଥିଲା, କ୍ରୁ ସଦସ୍ୟମାନେ ଦ୍ୱାର ଭାଙ୍ଗି ଘର ଭିତରକୁ ପ୍ରବେଶ କରିଥିଲେ । ସେଠାରେ ତାଙ୍କୁ ଅଚେତ ଅବସ୍ଥାରେ ଉଦ୍ଧାର କରାଯାଇଥିଲା । ତାଙ୍କୁ ତୁରନ୍ତ ହସ୍ପିଟାଲ ନିଆଯାଇଥିଲା ଯେଉଁଠାରେ ତାଙ୍କୁ ମୃତ ଘୋଷଣା କରାଯାଇଥିଲା । ଡାକ୍ତରମାନେ ତାଙ୍କ ମୃତ୍ୟୁକୁ ନିଶ୍ଚିତ କରିଥିଲେ ଏବଂ ହୃଦଘାତର କାରଣ ବୋଲି କହିଥିଲେ ।
ପଞ୍ଚଭୂତରେ ଲୀନ ହେଲେ ଅଭିନେତା
ରିପୋର୍ଟ ଅନୁଯାୟୀ, ତାଙ୍କର ଅନ୍ତିମ ସଂସ୍କାର ଜାନୁଆରୀ 20, 2025 ରେ ବୋରିଭାଲି ପଶ୍ଚିମ ମୁମ୍ବାଇର ପ୍ରଗତି ହାଇସ୍କୁଲ ନିକଟସ୍ଥ ଗୋରାରି-2 ଶ୍ମଶାନରେ କରାଯାଇଛି । ଏହି ଅଭିନେତା 'ମୁମ୍ବାଇଚେ ଶାହଣେ' ଏବଂ 'ସଂସାରଚି ମାୟା' ଭଳି ମରାଠୀ ଫିଲ୍ମ ପାଇଁ ଜଣାଶୁଣା । ଯୋଗେଶ ହିନ୍ଦୀ ଧାରାବାହିକ 'ଶିବ ଶକ୍ତି-ତପ, ତ୍ୟାଗ, ତାଣ୍ଡବ'ରେ ଶୁକ୍ରାଚାର୍ଯ୍ୟ ଚରିତ୍ରରେ ଅଭିନୟ କରିଥିଲେ । ଏହି ଭୂମିକାରେ ତାଙ୍କୁ ବେଶ ପସନ୍ଦ କରାଯାଇଥିଲା ।
ଏହା ମଧ୍ୟ ପଢନ୍ତୁ: 'କ୍ଲିନିକାଲି ମୁଁ ମରିଯାଇଥିଲି', ହାର୍ଟ ଆଟାକରୁ ସୁସ୍ଥ ପରେ ଅନୁଭୂତି ବଖାଣିଲେ ଶ୍ରେୟସ
କହିରଖୁଛୁ କି, ଯୋଗେଶଙ୍କ ପରିବାରରେ ତାଙ୍କ ସ୍ତ୍ରୀ ଏବଂ ସାତ ବର୍ଷର ପୁଅ ଅଛନ୍ତି । ତେବେ ତାଙ୍କ ଅଚାନକ ବିୟୋଗରେ ପରିବାର ଲୋକେ ସହଜରେ ଗ୍ରହଣ କରିପାରୁନାହିନ୍ତି । ସେପଟେ ଗଣମାଧ୍ୟମ ସହିତ କଥାବାର୍ତ୍ତା ସମୟରେ ତାଙ୍କ ସହ-ଅଭିନେତ୍ରୀ ଆକାଂକ୍ଷା ରାୱତ କହିଛନ୍ତି, 'ସେ ଜଣେ ବହୁତ ଖୁସି ବ୍ୟକ୍ତି ଥିଲେ ଏବଂ ତାଙ୍କର ହାସ୍ୟରସ ଭାବନା ବହୁତ ଭଲ ଥିଲା ।' ଆମେ ଗୋଟିଏରୁ ଅଧିକ ଥର ପାଇଁ ସୁଟିଂ କରିଆସୁଛୁ । ଏହି ମୁହୂର୍ତ୍ତରେ, ତାଙ୍କ ବିୟୋଗରେ ଆମେ ସମସ୍ତେ ଦୁଃଖିତ ଏବଂ ମର୍ମାହତ ।
ବ୍ୟୁରୋ ରିପୋର୍ଟ, ଇଟିଭି ଭାରତ
