କଟକ: ପୂର୍ବତନ ସ୍ୱାସ୍ଥ୍ୟ ମନ୍ତ୍ରୀ ନବ ଦାସଙ୍କ ହତ୍ୟାକାଣ୍ଡ ମାମଲାରେ ସିବିଆଇ ତଦନ୍ତ ଦାବି । ଏନେଇ ହାଇକୋର୍ଟରେ ପୁଣି ମାମଲା ରୁଜ୍ଜୁ ହୋଇଛି। ଭାରତୀୟ ବିକାଶ ପରିଷଦ ପକ୍ଷରୁ ହାଇକୋର୍ଟରେ ଏହି ମାମଲା ରୁଜ୍ଜୁ କରାଯାଇଛି । ପୂର୍ବରୁ ମଧ୍ୟ ଭାରତୀୟ ବିକାଶ ପରିଷଦ ପକ୍ଷରୁ ସମାନ ପ୍ରାର୍ଥନା ନେଇ ହାଇକୋର୍ଟରେ ଆବେଦନ ହୋଇଥିବା ବେଳେ ସେହି ଆବେଦନକୁ ହାଇକୋର୍ଟ ଖାରଜ କରିଥିଲେ ।
ନବ ଦାସ ହତ୍ୟା ମାମଲାରେ ସିବିଆଇ ତଦନ୍ତ ଦାବି:
୨୦୨୩ ମସିହା ଜାନୁଆରୀ ୨୯ ତାରିଖରେ ବ୍ରଜରାଜନଗରରେ ପୂର୍ବତନ ସ୍ୱାସ୍ଥ୍ୟ ମନ୍ତ୍ରୀ ନବ ଦାସଙ୍କୁ ହତ୍ୟା କରାଯାଇଥିଲା । ଏହାପରେ ଏହି ମାମଲାର ସିବିଆଇ ତଦନ୍ତ ଦାବି କରି ଭାରତୀୟ ବିକାଶ ପରିଷଦ ପକ୍ଷରୁ ଏକ ଜନସ୍ୱାର୍ଥ ମାମଲା ରୁଜ୍ଜୁ ହୋଇଥିଲା । ତେବେ ତଦନ୍ତ ପ୍ରାରମ୍ଭିକ ସ୍ଥିତିରେ ଥିବାରୁ ୨୦୨୩ ଫେବ୍ରୁଆରୀ ୯ ତାରିଖରେ ମାମଲାକୁ ଖାରଜ କରିଥିଲେ । ଏହି ମାମଲାର ତଦନ୍ତ ଭାର ନେଇଥିଲା ଓଡିଶା କ୍ରାଇମବ୍ରାଞ୍ଚ ।
ହାଇକୋର୍ଟରେ ଜନସ୍ୱାର୍ଥ ମାମଲା ରୁଜ୍ଜୁ:
ହାଇକୋର୍ଟଙ୍କ ଅବସରପ୍ରାପ୍ତ ବିଚାରପତି ଜଷ୍ଟିସ ଜେ ପି ଦାସଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ମାମଲାର ତଦନ୍ତ ଚାଲିଥିଲା । କ୍ରାଇମବ୍ରାଞ୍ଚ ଚାର୍ଜଫ୍ରେମ କରିଥିବା ବେଳେ ମାମଲାର ଶୁଣାଣି ଝାରୁସୁଗୁଡା ଜିଲ୍ଲା କୋର୍ଟରେ ଚାଲିଛି । ଇତିମଧ୍ୟରେ ଦୁଇ ବର୍ଷ ଅତିକ୍ରାନ୍ତ ହେବାକୁ ବସିଲାଣି । ଏଭଳି ସ୍ଥିତିରେ ତଦନ୍ତର ସଠିକ ଅଗ୍ରଗତି ହୋଇ ନଥିବା ଦର୍ଶାଇ ଭାରତୀୟ ବିକାଶ ପରିଷଦ ପକ୍ଷରୁ ପୁଣି ଏକ ଜନସ୍ୱାର୍ଥ ମାମଲା ରୁଜ୍ଜୁ ହୋଇଛି । ଏହି ମାମଲାରେ ସିବିଆଇ, ମୁଖ୍ୟ ସଚିବ, ଗୃହ ସଚିବ, ପୋଲିସ ଡ଼ିଜି ଓ କ୍ରାଇମବ୍ରାଞ୍ଚ ଡ଼ିଜିଙ୍କୁ ପକ୍ଷଭୁକ୍ତ କରାଯାଇଛି।
ଏନେଇ ଭାରତୀୟ ବିକାଶ ପରିଷଦସଭାପତି ସୁରେନ୍ଦ୍ର ପାଣିଗ୍ରାହୀ କହିଛନ୍ତି," ପୂର୍ବତନ ସ୍ୱାସ୍ଥ୍ୟମନ୍ତ୍ରୀ ନବ ଦାସ ହତ୍ୟାକାଣ୍ଡ ମାମଲାରେ ହାଇକୋର୍ଟରେ ଏକ ଜନସତ୍ତ୍ୱ ମାମଲା ଦାୟର କରାଯାଇଛି । ମାମଲାରେ ସିବିଆଇ ତଦନ୍ତ କରିବା ନେଇ ମାମଲା ଦାୟର କରାଯାଇଛି । ପୋଲିସ ଅଫିସର ହତ୍ୟା କରିଥିଲେ ଯଦି ଏହି ମାମଲାରେ ଜଣେ ପୋଲିସ ଅଫିସର ତଦନ୍ତ କରିବେ ତେବେ ତଦନ୍ତ ବାଟମଣା ହେବ । ସେଥିପାଇଁ ସିବିଆଇ ତଦନ୍ତ କରିବା ପାଇଁ ଦାବି କରାଯାଇଛି । ତେବେ ଏଥିରେ ସିବିଆଇ, ମୁଖ୍ୟ ସଚିବ, ଗୃହ ସଚିବ, ପୋଲିସ ଡ଼ିଜି ଓ କ୍ରାଇମବ୍ରାଞ୍ଚ ଡ଼ିଜିଙ୍କୁ ପକ୍ଷଭୁକ୍ତ କରାଯାଇଛି ।"