ଭୁବନେଶ୍ବର:ଦୁର୍ନୀତି ରୋକିବାକୁ ରାଜ୍ୟ ସରକାରଙ୍କ ଗୁରୁତ୍ବପୂର୍ଣ୍ଣ ପଦକ୍ଷେପ । ଏଣିକି ଧାନ ମଣ୍ଡିରେ ଲାଗିବ ସିସିଟିଭି କ୍ୟାମେରା । ଏପରିକି ଧାନ ନେଇ ଯାଉଥିବା ଗାଡ଼ିରେ ଲାଗିବ ଜିପିଏସ । ଯାହାକି ଗାଡ଼ି ସଠିକ ଠିକଣାରେ ପହଞ୍ଚୁଛି କି ନାହିଁ କି ଅନ୍ୟତ୍ର ସ୍ଥାନକୁ ଯାଉଛି ତାହା ଟ୍ରାକ କରି ଜଣାପଡ଼ିଛି । ଆଜି (ଶନିବାର) ଗଣମାଧ୍ୟମକୁ ସୂଚନା ଦେଇ ଏପରି କହିଛନ୍ତି ରାଜ୍ୟ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀ କୃଷ୍ଣପାତ୍ର ।
ସେ କହିଛନ୍ତି, "ଦୁର୍ନୀତି ରୋକିବାକୁ ଟେକ୍ନୋଲୋଜି ବ୍ୟବହାର କରାଯିବ । ମଣ୍ଡିରୁ ଧାନ ଯେତେବେଳେ ମିଲର୍ ପାଖକୁ ଯାଉଛି ସେହି ସମୟରେ ଗାଡିରେ ଆମେ GPS ଲଗାଇବୁ । ତାକୁ ଆମେ ଚେକ୍ କହିବୁ ଯେ ପ୍ରକୃତ ମଣ୍ଡିରୁ ମିଲର୍ ପାଖକୁ ଯାଉଛି ନା ନାହିଁ । ଏଥିପାଇଁ ଜିଲ୍ଲାପାଳଙ୍କୁ ଅବଗତ କରାଯାଇଛି । ଆସନ୍ତା ୨ ମାସ ମଧ୍ୟରେ ପ୍ଲାନ୍ କରି କାର୍ଯ୍ୟ ଜାରି କରାଯିବ ।"
ଦରଦାମ ବୃଦ୍ଧି ପ୍ରସଙ୍ଗ:
ଦରଦାମକୁ ଆମେ ଗୋଟେ କଣ୍ଟ୍ରୋଲକୁ ଆଣୁଛୁ । ପିଆଜ ଆଳୁ ଦର ଏବେ ସ୍ଥିର ରହିଛି । ଅଧିକ ଉପରକୁ ଯାଉନାହିଁ । ମହାରାଷ୍ଟ୍ରର ନାଶିକ, ଆନ୍ଧ୍ର ପ୍ରଦେଶ ଓ ପଶ୍ଚିମବଙ୍ଗରୁ ପିଆଜ ଆଳୁ ଆସୁଛି । ସେଠି ଦର ଅଧିକ ଅଛି । ଆମେ ସବୁ ଗୋଦାମ ସର୍ଚ୍ଚ କରୁଛୁ କିଣା ବିଲ୍ ଦେଖୁଛୁ । ଯଦି କିଏ ଚଢ଼ା ଦରରେ ବିକ୍ରି କରେ ତାହା ହେଲେ ରେଡ୍ ହେବ । ଖୁଚୁରା ବ୍ୟବସାୟ ବହୁତ ଅଧିକ ଲାଭ ରଖି ବିକ୍ରି କରୁଥିବେ ତାହାଲେ ସେମାନଙ୍କ ଉପରେ ମଧ୍ୟ ରେଡ୍ ହେବ । ଆଜି ମଧ୍ୟ ମୁଁ ନିର୍ଦ୍ଦେଶ ଦେଇଛି ବିଭାଗୀୟ ଅଧିକାରୀଙ୍କୁ । ସେମାନେ ଏହାର ଯାଞ୍ଚ କରିବେ ବୋଲି ମନ୍ତ୍ରୀ କହିଛନ୍ତି ।