ମାଲକାନଗିରି:କାନ୍ଥ କଣା କରି ଲୁଟିଲେ ଦୁର୍ବୃତ୍ତ । ଦେଢ କୋଟିରୁ ଉର୍ଦ୍ଧ୍ବ ଟଙ୍କାର ମୋବାଇଲ ଚୋରି । ଏଭଳି ଏକ ହାଇପ୍ରୋଫାଇଲ ଚୋରି ଘଟଣା ସାମ୍ନାକୁ ଆସିଛି ମାଲକାନଗିରି ସହରରୁ । ଯାହା ପୋଲିସର ମୁଣ୍ଡ ବ୍ୟଥାର କାରଣ ପାଲଟିଛି । ଏକ ବଡ ମୋବାଇଲ ଦୋକାନର କାନ୍ଥକୁ କଣା କରି ଦେଢ କୋଟିରୁ ଉର୍ଦ୍ଧ୍ବ ଟଙ୍କାର ମୋବାଇଲ ଚୋରି କରି ନେଇଛନ୍ତି ଲୁଟେରା । ସିସିଟିଭିରେ କଏଦେ ହେଲା ସମ୍ପୂର୍ଣ୍ଣ ଘଟଣା । ପୋଲିସର ଛାନଭିନ ଆରମ୍ଭ ।
ଦେଢ କୋଟିରୁ ଉର୍ଦ୍ଧ୍ବ ଟଙ୍କାର ମୋବାଇଲ ଚୋରି:
ମାଲକାନଗିରି ସହରର ସବୁଠାରୁ ବଡ ମୋବାଇଲ ଦୋକାନ ହେଉଛି ଓମ୍ ମୋବାଇଲ କେୟର । ଏହି ଦୋକାନରେ ଛୋଟରୁ ବଡ ବଡ ମୋବାଇଲ ସେଟ ମିଳିଥାଏ । ଏପରିକି ସହଜ କିସ୍ତିରେ ମଧ୍ୟ ମୋବାଇଲ ମିଳିଥାଏ । ତେବେ ଲୁଟେରାମାନେ ଗତକାଲି(ବୁଧବାର) ରାତିରେ ଏହି ଦୋକାନକୁ ଟାର୍ଗେଟ କରିଥିଲେ । ଏହି ଦୋକାନଟି ଥାନା ଠାରୁ ପ୍ରାୟ ଏକ କିଲୋମିଟର ଦୂରରେ ରହିଛି । ରାତି ପ୍ରାୟ ସାଢେ ୩ଟା ବେଳେ ଚୋରମାନେ ଦୋକାନର ପଛ କାନ୍ଥକୁ କଣା କରିଥିଲେ । ସେହି କଣାରେ ଜଣେ ମାତ୍ର ଚୋର ମୋବାଇଲ ଦୋକାନରେ ପଶି ଦାମୀ ମୋବାଇଲ ସେ ବସ୍ତାରେ ଭର୍ତ୍ତି କରି ବାହାରେ ଥିବା ଦୁଇ ଜଣ ସାଥୀଙ୍କୁ ବଢାଇ ଦେଉଥିଲା । ଯାହାର ସିସିଟିଭି ଫୁଟେଜରେ ସ୍ପଷ୍ଟ ଦେଖାଯାଉଛି । ତେବେ ଚୋର ୫ ହଜାରର ମୋବାଇଲ ସେଟ୍ ଛାଡି ଦେଇଥିବାବେଳେ କେବଳ ୨୦ ହଜାରରୁ ଦେଢ ଲକ୍ଷ ଟଙ୍କାର ମୋବାଇଲ ଚୋରି କରି ନେଇଥିବା ଦେଖିବାକୁ ମିଳିଛି ।
କିପରି ଜାଣିଲେ ଦୋକାନ ମାଲିକ ?
ଦୋକାନ ମାଲିକ ଦୀପଙ୍କର ମଣ୍ଡଲ କହିଛନ୍ତି,"ମୁଁ ଦୋକାନ ଖୋଲିବାକୁ ଆସିବାବେଳେ ଦୋକାନରେ ମୋବାଇଲ ଫିଙ୍ଗା ଫୋପଡା ହୋଇଥିବା ଦେଖିବାକୁ ପାଇଥିଲେ । ପରେ ଦୋକାନର କାନ୍ଥ କଣା ହୋଇଥିବା ଦେଖିବାକୁ ପାଇଥିଲି । ପରେ ମାଲାକନଗିରି ପୋଲିସକୁ ଖବର ଦେଇଥିଲି । ଚୋରମାନେ ମୋବାଇଲର ସମସ୍ତ ଖୋଳକୁ ବାହାରେ ଫିଙ୍ଗି ଦେବା ସହ ମୋବାଇଲ ଆସେସୋରିସ ଗୁଡିକ ନେଇ ଚାଲିଯାଇଛନ୍ତି ।"