ରାଇରଙ୍ଗପୁର (ମୟୂରଭଞ୍ଜ):‘ଅଲଚିକି’ ଲିପି ହେଉଛି ସାନ୍ତାଳୀ ସମ୍ପ୍ରଦାୟ ଭାଷାର ପରିଚୟ । ଆଉ ଏହି ଲିପିର ସ୍ରଷ୍ଟା ହେଉଛନ୍ତି ସାନ୍ତାଳୀ ସମ୍ପ୍ରଦାୟର ବରପୁତ୍ର ପଣ୍ଡିତ ରଘୁନାଥ ମୁର୍ମୁ । ଦୀର୍ଘ ବର୍ଷ ଧରି ପଣ୍ଡିତ ରଘୁନାଥ ମୁର୍ମୁ ସାନ୍ତାଳୀ ଭାଷା ସମ୍ପର୍କରେ ଗବେଷଣା କରି ‘ଅଲଚିକି’ ଲିପି ପ୍ରସ୍ତୁତ କରିଥିଲେ । ଫଳରେ ପ୍ରତ୍ୟେକ ସାନ୍ତାଳୀ ଭାଷାଭାଷୀ ଲୋକେ ଏବେ ‘ଅଲଚିକି’ ଲିପିର ବ୍ୟବହାର କରି ନିଜ ମାତୃଭାଷା ସହିତ ଜଡିତ ହୋଇ ପାରୁଛନ୍ତି । ସେଥିପାଇଁ ଆଜି ମଧ୍ୟ ପଣ୍ଡିତ ରଘୁନାଥ ମୁର୍ମୁଙ୍କୁ ମନେ ପକାଇ ତାଙ୍କୁ ‘ଅଲଚିକି’ ଲିପିର ଜନକ ମଧ୍ୟ କୁହାଯାଏ ।
ସେହିପରି ଏବେ ସାନ୍ତାଳୀ ଭାଷାକୁ ଘରେ ଘରେ ଓ ଦେଶ-ବିଦେଶରେ ପହଞ୍ଚାଇବାକୁ ଡିଜିଟାଲାଇଜେସନ ମାଧ୍ୟମରେ ଉଦ୍ୟମ ହୋଇଛି । ଆଉ ଏହି ଉଦ୍ୟମ କରି ସଫଳ ହୋଇଛନ୍ତି ଜଣେ ସାନ୍ତାଳୀ ପୁଅ । ସେ ପୁଣି ମୟୂରଭଞ୍ଜ ଜିଲ୍ଲା ରାଇରଙ୍ଗପୁର ଉପଖଣ୍ଡର ବାସିନ୍ଦା । ଯାହାଙ୍କ ପ୍ରୟାସ ଓ ସଫଳତାକୁ ପ୍ରଶଂସା କରିଛନ୍ତି ନିଜେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଗୋଟିଏ ଗରିବ ପରିବାରରେ ଜନ୍ମଗ୍ରହଣ କରିଥିବା ଯୁବକ ରାମଜିତ କିପରି ଏ ଦିଗରେ ସଫଳ ହେଲେ ଓ ପ୍ରଧାନମନ୍ତ୍ରୀଙ୍କ ମୋଦିଙ୍କ ପ୍ରଶଂସାର ପାତ୍ର ହୋଇ ପାରିଛନ୍ତି, ଆସନ୍ତୁ ଦେଖିବା ମୟୂରଭଞ୍ଜ ଜିଲ୍ଲା ବାଦାମପାହାଡ ବ୍ଲକ ଅନ୍ତର୍ଗତ ଗୋବିନ୍ଦପୁର ଗ୍ରାମରୁ ‘ଇଟିଭି ଭାରତ’ର ଏହି ସ୍ବତନ୍ତ୍ର ରିପୋର୍ଟ ।
- ପ୍ରଧାନମନ୍ତ୍ରୀଙ୍କ ମୁହଁରୁ ଦେଶ ଶୁଣିଥିଲା ରାମଜିତ ଟୁ଼ଡୁଙ୍କ କାହାଣୀ
ବାଦାମପାହାଡ ବ୍ଲକ ଗୋବିନ୍ଦପୁର ଗ୍ରାମର ରାମଜିତ ଟୁଡୁ ନିଜ ମାତୃଭାଷା ପାଇଁ ଗୌରବ ଆଣିଛନ୍ତି । ବହୁ ପରିଶ୍ରମ ପରେ ସାନ୍ତାଳୀ ଭାଷାକୁ ଡିଜିଟାଲାଇଜେସନ କରି ପାରିଛନ୍ତି ରାମଜିତ । ଫଳରେ ଲକ୍ଷ ଲକ୍ଷ ସାନ୍ତାଳୀ ଲୋକଙ୍କ ହୃଦୟରେ ସେ ଏବେ ସ୍ଥାନ ପାଇଛନ୍ତି । ତେବେ ‘ଅଲଚିକି’ ଲିପିକୁ ଡିଜିଟାଲାଇଜେସନ୍ କରିବା ଦିଗରେ ରାମଜିତ ସଫଳ ହେବା ପରେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ନିଜ ସପ୍ତାହିକ ରେଡିଓ ସମ୍ବାଦ କାର୍ଯ୍ୟକ୍ରମ ‘ମନ୍ କି ବାତ୍’ ଜରିଆରେ ରାମଜିତଙ୍କୁ ପ୍ରଶଂସା କରିଥିଲେ । ପ୍ରଧାନମନ୍ତ୍ରୀଙ୍କ ମୁହଁରୁ ଦେଶ ଶୁଣିଥିଲା ଆଦିବାସୀ ଯୁବକ ରାମଜିତଙ୍କ ଭାଷାପ୍ରେମ ଓ ନବସୃଜନର ସଫଳ କାହାଣୀ । ପ୍ରଧାନମନ୍ତ୍ରୀଙ୍କ ଠାରୁ ପ୍ରଶଂସିତ ହେବା ପରେ ମୟୂରଭଞ୍ଜରେ ଆୟୋଜିତ ‘ସୁଭଦ୍ରା’ ଯୋଜନା କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ମଧ୍ୟ ରାମଜିତଙ୍କୁ ସମ୍ମାନିତ କରିଥିଲେ । ଏନେଇ ରାମଜିତଙ୍କ ଘରକୁ ଗାଁ ଓ ଆଖପାଖ ଓ ଜିଲ୍ଲାବାସୀଙ୍କ ଲୋକଙ୍କ ସୁଅ ଛୁଟିବାରେ ଲାଗିଛି ।
- ଏବେ ଇଣ୍ଟରନେଟରେ ସାନ୍ତାଳୀ ଲିପି ‘ଅଲଚିକ୍’
ନିଜର ଦୃଢ଼ ଇଚ୍ଛା ଶକ୍ତି ଓ ସାଧନା ବଳରେ ନିପଟ ମଫସଲର ଆଦିବାସୀ ଯୁବକ ରାମଜିତ ଟୁଡୁ ଆଜି ସାରା ଦେଶରେ ଏକ ଚର୍ଚ୍ଚିତ ଚେହେରା ପାଲଟିଛନ୍ତି । ନିଜ ମାତୃଭାଷା ପ୍ରତି ରାମଜିତଙ୍କ ଭଲ ପାଇବା ହିଁ ସାନ୍ତାଳୀ ଭାଷା ଡିଜିଟାଲାଇଜେସନର ପ୍ରତିଫଳନ । ଏ ପ୍ରୟାସ ସହଜ ନଥିଲା ବରଂ ଦୀର୍ଘ ବର୍ଷର ସଂଘର୍ଷ ପରେ ଏବେ ‘ଅଲଚିକି’ ଲିପି ତଥା ସାନ୍ତାଳୀ ଭାଷା ଇଣ୍ଟରନେଟରେ ସ୍ଥାନ ପାଇଛି । ଫଳରେ ଏବେ ଆଦିବାସୀ ତଥା ସାନ୍ତାଳୀ ସମ୍ପ୍ରଦାୟର ନୂଆ ପିଢ଼ି ଘରେ ରହି ‘ଅଲଚିକି’ ଲିପି ଓ ସାନ୍ତାଳୀ ଭାଷା ବିଷୟରେ ଅବଗତ ହୋଇପାରିବେ । ସାନ୍ତାଳୀ ଭାଷାରେ ଲେଖିବା ଓ ପଢିବା ପାଇଁ ଅସୁବିଧାର ସମ୍ମୁଖୀନ ହେବାକୁ ପଡ଼ିବନି । ସାନ୍ତାଳୀ ଭାଷାର ପ୍ରଚାର ପ୍ରସାର ପାଇଁ ଏହି ବ୍ଲକ ଅନ୍ତର୍ଗତ ଗୋବିନ୍ଦପୁର ଗ୍ରାମର ରାମଜିତ ଟୁଡୁଙ୍କ ଉଦ୍ୟମ ନିଶ୍ଚିତ ଭାବେ ପ୍ରଶଂସନୀୟ । ନିଶ୍ଚିତ ଭାବେ ଆଗାମୀ ପିଢ଼ି ରାମଜିତଙ୍କଠାରୁ ପ୍ରେରଣା ପାଇବେ ବୋଲି କହିଛନ୍ତି ଗ୍ରାମବାସୀ ।
- ୨୦୧୪ରୁ ଆରମ୍ଭ କରିଥିଲେ ଗବେଷଣା
ତୁଳସୀ ଦୁଇପତ୍ରରୁ ବାସିଲା ପରି ପିଲାଦିନରୁ ରାମଜିତ ମଧ୍ୟ ବେଶ ପରିଶ୍ରମୀ ଓ ପ୍ରତିଭାଶାଳୀ ଥିଲେ । କିପରି ମୋବାଇଲ ମାଧ୍ୟମରେ ଲୋକେ ଜାଣିପାରିବେ ଓ ସାନ୍ତାଳୀ ଭାଷା କିପରି ମୋବାଇଲ ମାଧ୍ୟମରେ ଉପଲବ୍ଧ ହେବ ସେ ସମ୍ପର୍କରେ ଗବେଷଣା ଆରମ୍ଭ କରିଥିଲେ ରାମଜିତ । ବହୁ ସଂଘର୍ଷ ପରେ ସଫଳତା ମିଳିଥିଲା । ବହୁ ରିସର୍ଚ୍ଚ ପରେ ସହଯୋଗୀ ଅଶ୍ବିନୀ ମୁର୍ମୁ ଓ ବାପି ମୁର୍ମୁଙ୍କ ସହିତ ‘ଅଲଚିକି ଟେକ୍’ ନାମକ ଏକ ଓ୍ବେବ-ସାଇଟ୍ ଗଠନ କରି ସାନ୍ତାଳୀ ଭାଷାକୁ ଡିଜିଟାଲାଇଜେସନ୍ କରିବାରେ ସଫଳ ହୋଇଥିଲେ ରାମଜିତ । ଏବେ ସାରା ଭାରତ ସମେତ ବିଦେଶରେ ମଧ୍ୟ ଥିବା ସାନ୍ତାଳୀ ଛାତ୍ରଛାତ୍ରୀ ସାନ୍ତାଳୀ ଭାଷା ସହଜରେ ଶିକ୍ଷା ଲାଭ କରିପାରିବେ ଏବଂ ତାଙ୍କଠାରୁ ପ୍ରେରଣା ମଧ୍ୟ ପାଇବେ ବୋଲି କହିଛନ୍ତି ରାମଜିତଙ୍କ ଗାଁ ଓ ସାହି ଲୋକେ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଦ୍ଵାରା ପ୍ରଶଂସିତ ହେବା ପରେ ରାମଜିତ ଟୁଡୁଙ୍କ ପରିବାର ଓ ଗାଁ ଲୋକେ ବେଶ୍ ଖୁସି ଓ ଉତ୍ସାହିତ ଥିବା କହିଛନ୍ତି ।
- ଇଣ୍ଟରନେଟରେ ନିଜ ଭାଷା ନଥିବା ବ୍ୟଥିତ କରିଥିଲା:-
ନିଜ ଭାଷା ଓ ଲିପି ଥାଇ ମଧ୍ୟ ଇଣ୍ଟରନେଟରେ ବ୍ୟବହାର କରି ପାରୁନଥିବା ବ୍ୟଥିତ କରିଥିଲା ରାମଜିତଙ୍କୁ । ଯାହା ଫଳରେ ଇଣ୍ଟରନେଟରେ କିଭଳି ସାନ୍ତାଳୀ ଭାଷାକୁ ବ୍ୟବହାର କରିହେବ ସେନେଇ ରିସର୍ଚ୍ଚ ଆରମ୍ଭ କରି ପରେ ସଫଳ ହୋଇଥିଲେ ରାମଜିତ । ଏଥି ସହିତ "ବିର ମାଲି" (ବଣ ମଲ୍ଲୀ) ନାମକ ଏକ ୱେବ-ସାଇଟ୍ ମଧ୍ୟ ଖୋଲିଛନ୍ତି । ନିଜ ମାତୃଭାଷାକୁ ବଞ୍ଚାଇବାକୁ ଉଦ୍ୟମ ଜାରି ରଖିବା ପ୍ରତ୍ୟକଙ୍କ କର୍ତ୍ତବ୍ୟ ବୋଲି କହିବା ସହିତ ମୋଦିଙ୍କ ପ୍ରଶଂସାର ପାତ୍ର ହୋଇ ଅତି ଖୁସି ଓ ଉତ୍ସାହିତ ଅଛନ୍ତି ରାମଜିତ । ଦୀର୍ଘ ବର୍ଷର ସଂଘର୍ଷ ପରେ ରାମଜିତ ନିଜ ମାତୃଭାଷା ସାନ୍ତାଳୀ ଭାଷାର ଡିଜିଟାଲାଇଜେସନ କରି ପାରିଛନ୍ତି, ଯାହାକି ଏହି ଡିଜିଟାଲ ଯୁଗରେ ଆଗାମୀ ସାନ୍ତାଳୀ ପିଢ଼ି ପାଇଁ ନିଶ୍ଚିତ ଭାବେ ପ୍ରେରଣାର ଉତ୍ସ ଯୋଗେଇବ ।