ପୁରୀ: ଆଉ ଦୁଇଦିନ ପରେ ଅନୁଷ୍ଠିତ ହେବାକୁ ଯାଉଛି ବହୁ ପ୍ରତିକ୍ଷିତ ସ୍ନାନଯାତ୍ରା । ଏହିଦିନ ମହାପ୍ରଭୁ ଜଗନ୍ନାଥ ୧୦୮ ଗଡୁ ସୁବାସିତ ଜଳରେ ସ୍ନାନ କରିବା ପରେ ଦୁର୍ଲ୍ଲଭ ହାତୀବେଶ ପରିଧାନ କରିବେ। ସେଥିପାଇଁ ରାଘବଦାସ ମଠରେ ମହାପ୍ରଭୁଙ୍କ ହାତୀ ବେଶ ପାଇଁ ଲାଗି ପଡ଼ିଛନ୍ତି ସେବାୟତ । ମହାପ୍ରଭୁଙ୍କ ଗଜାନନ ବେଶ ପ୍ରସ୍ତୁତି ଶେଷ ପର୍ଯ୍ୟାୟରେ ଥିବା ସୂଚନା ମିଳିଛି। ପବିତ୍ର ଅକ୍ଷୟ ତୃତୀୟା ଠାରୁ ହାତୀବେଶ ପାଇଁ ଅନୁକୂଳ ଆରମ୍ଭ ହୋଇ ସ୍ନାନପୂର୍ଣ୍ଣିମା ପର୍ଯ୍ୟନ୍ତ ଏହି ବେଶ ନିର୍ମାଣ ଜାରି ରହିଥାଏ ।
ମହାପ୍ରଭୁଙ୍କ ଏହି ଦୁର୍ଲଭ ହାତୀ ବେଶ ପାଇଁ ସୋଲ, ଜରି, ଜମ୍ବୁରା, କଦଳିପଟୁକା, କଇଁଥ ଅଠାରେ ଶିଳ୍ପୀ ତଥା ବେଶ କାରିଗର ମାନେ ଶ୍ରୀଜିଉଙ୍କ ନିମନ୍ତେ ମନଲୋଭା ହାତୀବେଶ ପ୍ରସ୍ତୁତ କରିଥାନ୍ତି । ହାତୀବେଶର ବିଭିନ୍ନ ଅଂଶ ମଧ୍ୟରେ କିଆଫଳି, ଚନ୍ଦ୍ରସୂର୍ଯ୍ୟ, ଡାଳି, କାନ, ଥୋଡ, ହାଣ୍ଡିଆ ଆଦି ରହିଛି। ଜଳ ଲାଗି ପରେ ମହାପ୍ରଭୁ ଦୁର୍ଲଭ ହାତୀବେଶରେ ସଜ୍ଜିତ ହୋଇ ସ୍ନାନ ମଣ୍ଡପରେ ଭକ୍ତ ଜନଙ୍କୁ ଦର୍ଶନ ଦେବେ। ପବିତ୍ର ଅକ୍ଷୟ ତୃତୀୟା ତିଥିରୁ ଶିଳ୍ପୀ ମାନେ ଅତି ନିଷ୍ଠା ଓ ପବିତ୍ରତାର ସହ ଏହି ବେଶ ପ୍ରସ୍ତୁତି କରୁଥିବା ବେଳେ ଏହି ସେବା କରିବାର ସୌଭାଗ୍ୟ ପାଇ ବେଶ ଖୁସିଥିବା ବ୍ୟକ୍ତ କରିଛନ୍ତି । ରାଘବଦାସ ମଠ ଓ ଗୋପାଳ ତୀର୍ଥ ମଠ ପକ୍ଷରୁ ମହାପ୍ରଭୁଙ୍କ ହାତୀବେଶ ପ୍ରସ୍ତୁତ କରି କାହିଁ କେତେ ବର୍ଷ ହେବ ପ୍ରଦାନ କରାଯାଉ ଅଛି।