ଭୁବନେଶ୍ବର: ଅଧିକ ଲାଭର ଲୋଭ ହେଲା କାଳ । ରାଜଧାନୀରେ ରିଚାର୍ଜ ସ୍କିମ୍ ରିଟର୍ଣ୍ଣ ଲୋଭ ଦେଖାଇ ଠକିନେଲେ ୫୦କୋଟି । ଏସଏଚଜି ଗ୍ରୁପ୍, ପାନ ଦୋକାନୀ, ଅଟୋ ଚାଳକ ଭଳି ଲୋକମାନେ ହୋଇଛନ୍ତି ଠକେଇର ଶିକାର । ଏଭଳି ଅଭିଯୋଗ ଆସିଛି ୱେ ଟୁ ଆଡ୍ ପ୍ରାଇଭେଟ ଲିମିଟେଡ (WAY TO ADD PVT LTD) ସଂସ୍ଥା ନାଁରେ । ସଂସ୍ଥାର ସିଏମଡି ଓ ତାଙ୍କ ପତ୍ନୀ ଓ ସେମାନଙ୍କ ସହଯୋଗୀ ଛୁ ମାରିଛନ୍ତି । ଯାହାକୁ ନେଇ ନିବେଶକାରୀମାନେ ଅର୍ଥନୈତିକ ଅପରାଧ ଶାଖାରେ ଅଭିଯୋଗ କରିଛନ୍ତି ।
ଅଭିଯୋଗ ମୁତାବକ ଏହି ଠକ ଗୋଷ୍ଠୀ ୨୦୧୭ରୁ ଭୁବନେଶ୍ବର ସ୍ଥିତ ପଳାଶୁଣି ପ୍ରାଚୀବିହାରରେ ଏକ WAY TO ADD Pvt Ltd ସଂସ୍ଥା ଖୋଲି ବିଭିନ୍ନ ସ୍କିମରେ ଲୋକଙ୍କୁ ୧୦ ପ୍ରତିଶତ ଲାଭାଂଶ ଆଳରେ ନିବେଶର ଲୋଭ ଦେଖାଇଥିଲେ । ଲୋକଙ୍କ ଭରସା ଓ ବିଶ୍ବାସ ପାଇଁ କମ୍ପାନିର ରେଜିଷ୍ଟ୍ରେସନ ପେପର, ଜିଏସଟି ପେପର୍ ଦେଖାଇବା ସହ ଏହାର ସ୍କିମରେ ମଧ୍ୟ ପ୍ରଥମେ ପ୍ରଥମେ ଭଲ ମୁନାଫା ଦେଇଥିଲେ । ଏପରିକି ରିଚାର୍ଜ ସ୍କିମ୍ ରେ ୧୦୦୦ଟଙ୍କା ରିଚାର୍ଜ କିଣିଲେ ୧୧୦୦ଟଙ୍କାର ପ୍ରଫିଟ ମଧ୍ୟ ମିଳୁଥିଲା । ତା ସହିତ ଆଲକାଲାଇନ ପାଣି ମେସିନ ସହ ଆୟୁର୍ବେଦିକ ସାବୁନ ଓ ବିଭିନ୍ନ ଜିନିଷର ଓ ଜମିବାଡ଼ି ଭଳି ସ୍କିମ ମଧ୍ୟ ରହିଥିଲା । ପ୍ରଥମେ ପ୍ରଥମେ ନିବେଶ କରିଥିବା ନିବେଶକାରୀ ଛୋଟ ପରିମାଣର ନିବେଶରେ ଭଲ ମୁନାଫା ପାଇ ଭରସା କରିଥିଲେ ଓ ପରେ ବଡ଼ ମୁନାଫା ପାଇଁ ବଡ଼ ପରିମାଣର ନିବେଶ କରିଥିଲେ । ଏନେଇ ଧୀରେ ଧୀରେ ଲୋକଙ୍କ ଭିତରେ ମାର୍କେଟିଂ ହେବା ସହ ଗାଁରେ ଓ ସହରରେ ଥିବା ବିଭିନ୍ନ SHG ମହିଳା ଗ୍ରୁପର ସଦସ୍ୟା ମଧ୍ୟ ନିଜର ଗ୍ରୁପରୁ ଟଙ୍କା ଆଣି ଏହି ସ୍କିମରେ ନିବେଶ କରିଥିଲେ । ଅଟୋ ଚାଳକ, କ୍ଷୀର ବେପାରୀଠାରୁ ଆରମ୍ଭ କରି ବଡ଼ ବଡ଼ ବ୍ୟବସାୟୀ ମଧ୍ୟ ଲାଭ ଆଶାରେ ଏଥିରେ ନିବେଶ କରିଥିଲେ ।