୨ରୁ ୪ ଡିଗ୍ରୀ ବଢ଼ିବ ତାପମାତ୍ରା, ଘନକୁହୁଡ଼ି ପାଇଁ ୧୯ ଜିଲ୍ଲାକୁ ୟେଲୋ ୱାର୍ଣ୍ଣିଂ

ଓଡ଼ିଶାରୁ ଗାଏବ ଶୀତ । ଆହୁରି ବଢ଼ିବ ତାପମାତ୍ରା । ୨ ଦିନ ପର୍ଯ୍ୟନ୍ତ ଘନକୁହୁଡ଼ି ଲାଗି ରହିବ । ୧୯ ଜିଲ୍ଲାକୁ ୟେଲୋ ୱାର୍ଣ୍ଣିଂ ଜାରି ।

ଭୁବନେଶ୍ବର:ଶୀତ ଧିରେ ଧିରେ ଓଡ଼ିଶା ଛାଡୁଥିବା ବେଳେ ପ୍ରଭାବ ବିସ୍ତାର ଆରମ୍ଭ କଲାଣି ଖରା । କାଲି ଠାରୁ ତାପମାତ୍ରା ଆହୁରି ବଢ଼ିବ ।ଆସନ୍ତାକାଲି(ଗୁରୁବାର) ଠାରୁ ଟାଇଁ ଟାଇଁ ଖରା ହେବାକୁ ଥିବା ବେଳେ ସବୁଠି ପାରଦ ଉପରମୁଁହା ହେବ । ଏପଟେ ତାତି ବଢ଼ିଥିବା ବେଳେ ଘନକୁହୁଡ଼ି ଅସ୍ତବ୍ୟସ୍ତ କରୁଛି । ଆହୁରି ୨ ଦିନ ପର୍ଯ୍ୟନ୍ତ ଘନକୁହୁଡ଼ି ଲାଗି ରହିବ । କିଛି କିଛି ସ୍ଥାନରେ ଜିରୋ ଭିଜିବିଲିଟି ରହିବାର ସମ୍ଭାବନା ରହିଛି ।

ବଢ଼ିବ ତାତି:

ରାଜ୍ୟରେ ବର୍ତ୍ତମାନ ଶୀତ ଗାୟବ, ଆସନ୍ତାକାଲିଠୁ ଟାଇଁଟାଇଁ ଖରା । ସପ୍ତାହେ ଯାଏଁ ଗରମର ଅନୁଭୂତି ସହ ଖରାରୁ ତ୍ରାହି ନାହିଁ ବୋଲି ପୂର୍ବାନୁମାନ କରିଛି ପାଣିପାଗ ବିଭାଗ । ତେବେ ରାଜ୍ୟରେ ସବୁଠି ବଢିବ ପାରଦ ଆଉ ସବୁଠି ଗରମର ଅନୁଭୂତ ହେବ । ସ୍ବାଭାବିକ ଠାରୁ ୨ରୁ ୪ ଡିଗ୍ରୀ ପର୍ଯ୍ୟନ୍ତ ବୃଦ୍ଧି ପାଇବ ତାପମାତ୍ରା । ଆଗାମୀ ୪ରୁ ୫ ଦିନ ଯାଏଁ ଦିନ ଏବଂ ରାତ୍ରି ତାପମାତ୍ରା ଅଧିକା ରହିବ । ଆଜି ରାଜ୍ୟର ଅଧିକାଂଶ ସହରରେ ତାପମାତ୍ରା ବଢିଛି । କିଛି ସ୍ଥାନରେ ଗରମ ଅନୁଭବ ହୋଇଛି । ଆଗାମୀ ୫ ରୁ ୭ ଦିନ ଯାଏଁ ପାଗ ମୁଖ୍ୟତଃ ଶୁଖିଲା ରହିବା ସହ ରାତ୍ରି ତାପମାତ୍ରାରେ କୌଣସି ପରିବର୍ତ୍ତନ ଦେଖିବାକୁ ମିଳିବନାହିଁ । ଆଭ୍ୟନ୍ତରୀଣ ଓଡିଶାରେ ତାପମାତ୍ରାରେ ବୃଦ୍ଧି ଦେଖିବାକୁ ମିଳିଥିବା ବେଳେ ଉପକୂଳ ଓଡିଶାରେ ତାପମାତ୍ରାରେ କୌଣସି ପରିବର୍ତ୍ତନ ଦେଖିବାକୁ ମିଳିନାହିଁ ।

Odisha Weather Update (IMD)

ଘନକୁହୁଡ଼ି ୱାର୍ଣ୍ଣିଂ:

ରାଜ୍ୟରେ ସକାଳୁ ସକାଳୁ କୁହୁଡ଼ି କଲବଲ କରୁଥିବା ବେଳେ ତାତି ଅନୁଭୂତ ଆରମ୍ଭ ହେଲାଣି । ଆସନ୍ତାକାଲି ଠାରୁ ତାପମାତ୍ରା ୨ରୁ ୪ ଡିଗ୍ରୀ ପର୍ଯ୍ୟନ୍ତ ବଢ଼ିବା ସହ ଖରା ବଢ଼ିବ । ତାପମାତ୍ରା ବୃଦ୍ଧି ସହ ଆସନ୍ତା ୪୮ ଘଣ୍ଟା ଯାଏଁ ଅସ୍ତବ୍ୟସ୍ତ କରିବ ଘନକୁହୁଡି । ଆଗାମୀ ୨୪ ଘଣ୍ଟା ପାଇଁ ଘନକୁହୁଡ଼ିକୁ ନେଇ ୧୯ ଜିଲ୍ଲାକୁ ୟେଲୋ ୱାର୍ଣ୍ଣିଂ ଜାରି କରାଯାଇଛି ।

Odisha Weather Update (IMD)

19 ଜିଲ୍ଲା ଗୁଡିକ ହେଲା:

1. ମାଲକାନଗିରି
2. କୋରାପୁଟ
3. ରାୟଗଡା
4. ଗଜପତି
5. ଗଞ୍ଜାମ
6. କନ୍ଧମାଳ
7. ନୟାଗଡ
8. ଖୋର୍ଦ୍ଧା
9. ପୁରୀ
10. ଜଗତସିଂହପୁର
11. କଟକ
12. କେନ୍ଦ୍ରାପଡା
13. ଯାଜପୁର
14. ଢେଙ୍କାନାଳ
15. ଅନୁଗୋଳ
16. କେନ୍ଦୁଝର
17. ମୟୂରଭଞ୍ଜ
18. ଦେବଗଡ
19. ସମ୍ବଲପୁର

ଆସନ୍ତାକାଲି ପାଇଁ ୱାର୍ଣ୍ଣିଂ:

ସେହିପରି ଆସନ୍ତାକାଲି ୧୧ ଜିଲ୍ଲାରେ ଘନକୁହୁଡ଼ି ଦୃଶ୍ୟମାନ ହେବ । ଏଥିପାଇଁ ଗଜପତି, ଗଞ୍ଜାମ, ଖୋର୍ଦ୍ଧା, ନୟାଗଡ଼, ପୁରୀ, କଟକ, ଜଗତସିଂହପୁର, କେନ୍ଦ୍ରାପଡ଼ା, ଅନୁଗୋଳ, କେନ୍ଦୁଝର ଓ ମୟୂରଭଞ୍ଜ ଜିଲ୍ଲାକୁ ୟେଲୋ ୱାର୍ଣ୍ଣିଂ ଜାରି କରିଛି ପାଣିପାଗ ବିଭାଗ । ୱାର୍ଣ୍ଣିଂ ଜାରି କରାଯାଇଥିବା ଜିଲ୍ଲାଗୁଡ଼ିକରେ ଦୃଶ୍ୟମାନର ଦୂରତା ୫୦ରୁ ୨୦୦ ମିଟର ଭିତରେ ରହିବ । ଯାହାକୁ ନେଇ ଯାତାୟତ ବେଳେ ସତର୍କ ରହିବାକୁ ପରାମର୍ଶ ଦେଇଛି ପାଣିପାଗ ବିଭାଗ । ସେହିପରି ବାଲେଶ୍ବର, ଭଦ୍ରକ, କଳାହାଣ୍ଡି, ରାୟଗଡ଼ା, ସୁନ୍ଦରଗଡ଼ ଜିଲ୍ଲାରେ ହାଲୁକାରୁ ମଧ୍ୟମ ଧରଣର କୁହୁଡ଼ି ଦେଖାଯିବାର ସମ୍ଭାବନା ରହିଛି । ମୁଖ୍ୟତଃ ଭୋର ସମୟରେ ଅଧିକ କୁହୁଡ଼ି ଦୃଶ୍ୟମାନ ହେବାର ସମ୍ଭାବନା ରହିଛି ।

ଏହା ମଧ୍ଯ ପଢ଼ନ୍ତୁ.

କେଉଁଠି କେତେ ତାପମାତ୍ରା:

ଗତ ୨୪ ଘଣ୍ଟା ମଧ୍ୟରେ ପାହାଡ଼ିଆ ଅଞ୍ଚଳ ଭାବରେ ଜି. ଉଦୟଗିରିରେ ସର୍ବନିମ୍ନ ତାପମାତ୍ରା ୯.୬ ଡିଗ୍ରୀ ରେକର୍ଡ କରାଯାଇଥିବା ବେଳେ ସମତଳ ଅଞ୍ଚଳ ଭାବରେ ରାଉରକେଲାରେ ୧୦.୦ ଡିଗ୍ରୀ ସଲସିୟସ ତାପମାତ୍ରା ରେକର୍ଡ କରାଯାଇଛି । ସେପଟେ ତାପମାତ୍ରା ବୃଦ୍ଧି ପାଉଥିବା ବେଳେ ବରଗଡ଼ରେ ସର୍ବାଧିକ ୩୩.୦ ଡିଗ୍ରୀ ରେକର୍ଡ କରାଯାଇଛି । ଅନ୍ୟପଟେ କିଛି ଜିଲ୍ଲାରେ ଘନକୁହୁଡ଼ି ଅସ୍ତବ୍ୟସ୍ତ କରିଥିବା ବେଳେ ଅନୁଗୋଳ, କୋରାପୁଟ ଓ ନୟାଗଡ଼ରେ ପ୍ରବଳ ଘନକୁହୁଡ଼ି ଦେଖାଯିବା ସହ ଦୃଶ୍ୟମାନର ଦୂରତା ୫୦ ମିଟର ରହିଥିଲା ।

ଇଟିଭି ଭାରତ, ଭୁବନେଶ୍ବର