ଭାବନୀପାଟଣା: ସରକାରୀ କ୍ୱାଟରରେ ଫରେଷ୍ଟର ସଞ୍ଜୟ ନାୟକଙ୍କ ମୃତ୍ୟୁ ଘଟଣାରେ ଚାକିରିରୁ ନିଲମ୍ବିତ ହେଲେ ରାୟଗଡା DFO ଦେବେନ୍ଦ୍ର ବେହେରା । ଡିଏଫଓଙ୍କ ବିରୋଧରେ ମାନସିକ ନିର୍ଯାତନା ପରି ସଙ୍ଗୀନ ଅଭିଯୋଗ ଆଣିଥିଲେ ମୃତ ଫରେଷ୍ଟରଙ୍କ ପରିବାର ସଦସ୍ୟ । ଏନେଇ ଭବାନୀପାଟଣା ଟାଉନ ଥାନା ପୋଲିସ ଭାରତୀୟ ନ୍ୟାୟ ସଂହିତା (ବିଏନଏସ)ର ଧାରା-୧୦୮ରେ ମାମଲା ରୁଜୁ କରି ତଦନ୍ତ ଜାରି ରଖିଛି । ଗତକାଲି ଜଙ୍ଗଲ ଓ ପରିବେଶ ବିଭାଗ ‘ଡିଏଫଓ’ ଦେବେନ୍ଦ୍ରଙ୍କୁ କାର୍ଯ୍ୟରୁ ନିଲମ୍ବିତ କରିଛନ୍ତି । ନିଲମ୍ବନ ଅବଧି ମଧ୍ୟରେ ତାଙ୍କୁ କାର୍ଯ୍ୟାଳୟ ନଛାଡିବାକୁ ମଧ୍ୟ ନିର୍ଦ୍ଦେଶ ଦେଇଛନ୍ତି ସରକାର ।
- କ’ଣ ଥିଲା ପୂରା ଘଟଣା:-
ଗତମାସ (ସେପ୍ଟେମ୍ବର)୧୮ତାରିଖରେ କଳାହାଣ୍ଡି ଜିଲ୍ଲା ଜାରିଙ୍ଗ ସିଲଭି କଳଚର୍ ଫରେଷ୍ଟର ସଞ୍ଜୟ ନାୟକଙ୍କ ମୃତଦେହ ଭବାନୀପାଟଣା ସ୍ଥିତ ସରକାରୀ କ୍ୱାଟରରୁ ସନ୍ଦେହଜନକ ଅବସ୍ଥାରେ ମିଳିଥିଲା । ମୃତଦେହ ନିକଟରୁ ପୋଲିସ ଏକ ସୁଇସାଇଡାଲ୍ ନୋଟ୍ ମଧ୍ୟ ଜବତ କରିଥିଲା । ଏଥିରେ ରାୟଗଡ଼ା ସିଲଭି କଳଚର DFO ଦେବେନ୍ଦ୍ର ବେହେରା ସଞ୍ଜୟଙ୍କୁ ମାନସିକ ନିର୍ଯାତନା ଦେଉଥିବା ସହ ବାରମ୍ବାର ‘ପିସି’ ମାଗିବା ପରେ ତାଙ୍କୁ ବଲାଙ୍ଗୀରକୁ ବଦଳି କରିଦେଇଥିଲେ ବୋଲି ଉଲ୍ଲେଖ ଥିବା ପରିବାର ସଦସ୍ୟ ଅଭିଯୋଗ କରିଥିଲେ । ଏନେଇ ‘ଡିଏଫଓ’ ଦେବେନ୍ଦ୍ରଙ୍କ ବିରୋଧରେ ମୃତ ଫରେଷ୍ଟରଙ୍କ ଭାଇ ରବି ନାରାୟଣ ନାୟକ ଭବାନୀପାଟଣା ଟାଉନ ଥାନାରେ ଲିଖିତ ଅଭିଯୋଗ କରିବା ପର ପୋଲିସ ଏନେଇ ତଦନ୍ତ ଆରମ୍ଭ କରିଥିଲା ।
- DFO ଲାଞ୍ଚ ମାଗି ମାନସିକ ନିର୍ଯାତନା ଦେଉଥିଲେ ବୋଲି ଅଭିଯୋଗ:-
ମୃତକଙ୍କ ପରିବାର ପକ୍ଷରୁ ହୋଇଥିବା ଅଭିଯୋଗ ଅନୁଯାୟୀ ପୋଲିସ DFO ଦେବେନ୍ଦ୍ର ବେହେରାଙ୍କୁ ଥାନାରେ ହାଜର ହେବାକୁ ପାଇଁ ସମନ କରିଥିଲା । ମାତ୍ର DFO ପୋଲିସକୁ ସହଯୋଗ କରିବା ପରିବର୍ତ୍ତେ ଫେରାର ହୋଇଯାଇଥିଲେ । ପରେ DFO ହାଇକୋର୍ଟରେ ଆଗୁଆ ଜାମିନ ଆବେଦନ କରିଥଲେ । ହେଲେ କୋର୍ଟ ବେଲ୍ ପିଟିସନକୁ ଖାରଜ କରିବା ସହ ପୋଲିସକୁ ତଦନ୍ତରେ ସହଯୋଗ କରିବା ପାଇଁ ନିର୍ଦ୍ଦେଶ ଦେଇଥିଲେ । ଗତ ଦୁଇ ଦିନ ଧରି ପୋଲିସ୍ DFOଙ୍କୁ ବିଭିନ୍ନ ଦିଗକୁ ନେଇ ଜେରା କରିଥିବା ବେଳେ ଗତକାଲି ସରକାର ତାଙ୍କୁ ଚାକିରିରୁ ନିଲମ୍ବିତ କରିଛନ୍ତି । ଗତ ଦୁଇଦିନ ଧରି DFO ଭବାନୀପାଟଣା ଟାଉନ ଥାନାରେ ଜେରା ପାଇଁ ହାଜର ହୋଇଥିଲେ । ଗତକାଲି ଭବାନୀପାଟଣା ଟାଉନ ଥାନାରେ ପୋଲିସ ରାୟଗଡା ଏରିଆ ରେଞ୍ଜର ପ୍ରକାଶ ରଥ, DFO ଦେବେନ୍ଦ୍ର ବେହେରା, ଭୁବନେଶ୍ୱର ACF ସିଲଭି କଲଚର୍ ରଜନୀକାନ୍ତ ରାଉତଙ୍କୁ ଦୀର୍ଘ ୮ ଘଣ୍ଟା ଧରି ଜେରା କରିଥିଲା ।