ପୁଅର ପ୍ରେମ ହେଲା କାଳ, ଘର ପୋଡ଼ିଦେଲେ ପ୍ରେମିକାଙ୍କ ପରିବାର ଲୋକେ

Fire Broke Out In Keonjhar: ପ୍ରତିଶୋଧ ନେଲେ ପ୍ରେମିକାର ପରିବାର । ପ୍ରେମିକର ଘର ପୋଡ଼ିଦେଲେ ପ୍ରେମିକାଙ୍କ ପରିବାର ଲୋକେ । ଏଭଳି ଏକ ଘଟଣା ଘଟିଛି କେନ୍ଦୁଝର ଜିଲ୍ଲାରେ । ଅଧିକ ପଢନ୍ତୁ

କେନ୍ଦୁଝର:ଚାଲିଛି ପ୍ରେମର ସପ୍ତାହ । ଆସନ୍ତା ୧୪ ତାରିଖ ଭେଲେଣ୍ଟାଇନ୍ ଦିବସ ପର୍ଯ୍ୟନ୍ତ ଏହି ସପ୍ତାହ ପାଳନ ହେଇ ଥିବାବେଳେ ଏହି ଦିନରେ ପ୍ରେମୀ ଯୁଗଳମାନେ କାହିଁ କେତେ ସ୍ବପ୍ନ ଦେଖିଥାଆନ୍ତି । କିନ୍ତୁ ଏହି ପ୍ରେମ ପାଇଁ ଘର ଲୋକଙ୍କ ମଧ୍ୟରେ ତିକ୍ତତା ଯୋଗୁଁ ଘରପୋଡି ହେବା ନୂଆ ଘଟଣା ସାମ୍ନାକୁ ଆସିଛି । ପୁଅର ପ୍ରେମ ଘର ଲୋକଙ୍କ ପାଇଁ ହୋଇଛି କାଳ । ପ୍ରେମିକର ଘର ପୋଡ଼ିଦେଲେ ପ୍ରେମିକାଙ୍କ ପରିବାର ଲୋକେ । ଏପରି ଏକ ଅଭାବନୀୟ ଘଟଣା ଦେଖିବାକୁ ମିଳିଛି କେନ୍ଦୁଝରର ହାଟଡିହି ବ୍ଲକର ନନ୍ଦିପଦା ଥାନା ଅନ୍ତର୍ଗତ ଇଞ୍ଚୋଳ ପଞ୍ଚାୟତ ଭୁତପଦା ଗ୍ରାମରେ ।

ଅଭିଯୋଗ ଅନୁଯାୟୀ ଭୁତପଦା ଗ୍ରାମର ପିତାମ୍ବର ଯେନାଙ୍କ ପୁଅ ଗତ କିଛିଦିନ ତଳେ ବନ୍ତ ଥାନା ବାଇପୁର ଗ୍ରାମର ଜଣେ ଝିଅକୁ ଭଲପାଇବା ସହିତ ତାକୁ ନେଇ ଘରୁ ଦୁହେଁ ଫେରାର ହୋଇଯାଇଛନ୍ତି । ହେଲେ ଝିଅଘର ଲୋକେ ଏନେଇ ବନ୍ତ ଥାନାରେ ଅଭିଯୋଗ କରିବା ପରେ ପୋଲିସ ପିତାମ୍ବରଙ୍କ ପରିବାର ଲୋକଙ୍କୁ ଉଠାଇ ନେଇ ପଚରାଉଚରା କରିବା ସହିତ ଝିଅକୁ ଆଣି ଛାଡିବା ପାଇଁ କହି ଛାଡ଼ିଦେଇଥିଲେ । ଏପରିକି ବାରମ୍ବାର ଝିଅ ଘର ଲୋକମାନେ ଆସି ପିତାମ୍ବରଙ୍କ ପରିବାରକୁ ଧମକ ଚମକ ଦେଉଥିବା ଅଭିଯୋଗ ହୋଇଛି । ସେପଟେ ଭୟରେ ପିତାମ୍ବରଙ୍କ ପରିବାର ଲୋକେ ଘର ଛାଡ଼ି ବାହାରେ ରହୁଥିଲେ ।

ସେପଟେ ରବିବାର ବିଳମ୍ବିତ ରାତିରେ ପିତାମ୍ବରଙ୍କ ସ୍ତ୍ରୀ ମନୋରମା ଘରେ ଏକୁଟିଆ ଥିବାବେଳେ ଝିଅଘର ଲୋକମାନେ ରାତିରେ ଆସି କବାଟ ଖୋଲି ମନୋରମାକୁ ମାରପିଟ କରିଥିବା ଅଭିଯୋଗ ହୋଇଛି । ଏହା ସହ ଘରେ ଥିବା ସୁନାରୁପା ମଧ୍ୟ ନେଇ ଯାଇ ଘରେ ନିଆଁ ଲଗାଇ ଦେଇଥିବା ଅଭିଯୋଗ କରିଛନ୍ତି ମନୋରମା । ସେପଟେ ନିଆଁ ଦେଖି ଗ୍ରାମବାସୀମାନେ ଘଟଣା ସ୍ଥଳରେ ପହଞ୍ଚିଥିଲେ ।ଏହା ପରେ ଉକ୍ତ ଝିଅ ଘର ଲୋକେ ଘଟଣା ସ୍ଥଳରୁ ଚମ୍ପଟ ମାରିଥିଲେ ।

ସେପଟେ ମନୋରମା ନନ୍ଦିପଦା ଥାନାରେ ଅଭିଯୋଗ କରି ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଛନ୍ତି । ନନ୍ଦିପଦା ପୋଲିସ ମନୋରମାଙ୍କ ଅଭିଯୋଗ ଆଧାରରେ ଥାନା କେଶ ନଂ ୮୬/୨୦୨୪ରେ ମାମଲା ରୁଜୁ କରି ତଦନ୍ତ ଆରମ୍ଭ କରିଛି । ଏନେଇ କୌଣସି ପୋଲିସ ଅଧିକାରୀଙ୍କ ପ୍ରତିକ୍ରିୟା ମିଳି ପାରିନାହିଁ ।

ଇଟିଭି ଭାରତ,କେନ୍ଦୁଝର