ସ୍ତ୍ରୀକୁ ଖଣ୍ଡ ଖଣ୍ଡ କଲା, ପ୍ରେସର କୁକର୍‌ରେ ସିଝାଇ ପୋଖରୀକୁ ଫିଙ୍ଗିଦେଲା ସ୍ବାମୀ

ବର୍ବରତାର ସବୁ ସୀମା ଟପିଗଲା ସ୍ବାମୀ । ହାଇଦ୍ରାବାଦରେ ଘଟିଛି ଏମିତି ଲୋମଟାଙ୍କୁରା ହତ୍ୟାକାଣ୍ଡ ।

ହାଇଦ୍ରାବାଦ: ସ୍ତ୍ରୀକୁ ହତ୍ୟା, ତାପରେ ପ୍ରେସର କୁକରରେ ସିଝାଇ ପୋଖରୀରେ ଫିଙ୍ଗିଲା ସ୍ବାମୀ । ବର୍ବରତାର ସବୁ ସୀମା ଟପିଗଲା ସ୍ବାମୀ । କ୍ଷଣିକ କ୍ରୋଧ କେତେ ଯେ ଭୟଙ୍କର ହୋଇପାରେ ଏହି ଘଟଣାରୁ ବାରି ହୋଇ ପଡୁଛି । ହାଇଦ୍ରାବାଦରେ ଘଟିଛି ଏମିତି ଲୋମଟାଙ୍କୁରା ହତ୍ୟାକାଣ୍ଡ । ମିରପେଟ ନ୍ୟୁ ଭେଙ୍କଟରମଣ କଲୋନୀରେ ଘଟିଛି ଜଘନ୍ୟ ହତ୍ୟାକାଣ୍ଡ । ଅଭିଯୁକ୍ତ ଜଣକ ହେଉଛନ୍ତି ଅବସରପ୍ରାପ୍ତ ସେନା କର୍ମଚାରୀ ଗୁରୁମୂର୍ତ୍ତି । ସେ ନିଜ ପତ୍ନୀଙ୍କୁ ହତ୍ୟା କରିବା ପରେ ଶରୀରକୁ ଛୋଟ ଛୋଟ ଖଣ୍ଡ କରି ପ୍ରଥମେ ପ୍ରେସର କୁକୁରରେ ସିଝାଇ ଦେଇଥିଲା । ଏହାପରେ ବଳକା ଅଂଶକୁ ପାଖରେ ଥିବା ଏକ ପୋଖରୀକୁ ଫିଙ୍ଗି ଦେଇଥିଲା ।

ଗୁରୁମୂର୍ତ୍ତି ସହ ସ୍ତ୍ରୀ ମାଧବୀ (ETV Bharat)

ଏହା ପରେ ଜାନୁଆରୀ 16ରେ ନିଜ ମା’ଙ୍କ ସହ ମିରପେଟ୍‌ ଥାନାରେ ପହଞ୍ଚି ପତ୍ନୀ ଭେଙ୍କଟା ମାଧବୀ ନିଖୋଜ ହୋଇ ଯାଇଥିବା ମାମଲା ରୁଜୁ କରିଥିଲା ଗୁରୁମୂର୍ତ୍ତି । ପୋଲିସ ତଦନ୍ତ ଚଲାଇ ଥିବାବେଲେ ଏହି ଘଟମାର ପର୍ଦ୍ଦାଫାଶ ହୋଇଥିଲା । ଖୋଦ ସ୍ବାମୀ ଗୁରୁମୂର୍ତ୍ତି ପୋଲିସ ନିକଟରେ ନିଜ ଦୋଷ ସ୍ବୀକାର କରିଥିଲା ।

• ଅସଫଳ ବିବାହ ନେଲା ମାଧବୀଙ୍କ ଜୀବନ

ତଦନ୍ତରୁ ଜଣାପଡିଥିଲା ଯେ ଗୁରୁମୂର୍ତ୍ତି ଓ ମାଧବୀ ଦାର୍ଘ 13 ବର୍ଷ ପୂର୍ବେ ବିବାହ କରିଥିଲେ । ତାଙ୍କର ଦୁଇଟି ସନ୍ତାନ ଅଛନ୍ତି । କିନ୍ତୁ ଗତ କିଛି ମାସ ଧରି ସେମାନଙ୍କ ବୈବାହିକ ଜୀବନରେ ଝଡ ସୃଷ୍ଚି ହୋଇଥିଲା । ଘରେ ସବୁବେଳେ କଳହ ଲାଗି ରହୁଥିଲା । ଘରର ଅଶାନ୍ତି ପଡୋଶୀଙ୍କ କାନରେ ବି ପଡୁଥିଲା । ସମ୍ପର୍କୀୟଙ୍କ ଠୁ ଆରମ୍ଭ କରି ପଡୋଶୀଙ୍କ ପର୍ଯ୍ୟନ୍ତ ସମସ୍ତେ ତାଙ୍କ ମନମାଳିନ୍ୟ ବିଷୟରେ ଅବଗତ ଥିଲେ । ଯେତେବେଲେ ପୋଲିସ ଗୁରୁମୂର୍ତ୍ତିଙ୍କୁ ପଚରା ଉଚୁରା କରିଥିଲା ତାଙ୍କ ପତ୍ନୀ ନିଜେ କୁଆଡେ ଚାଲି ଯାଇଥିବା ସେ ପୋଲିସକୁ ଜଣାଇଥିଲା । କିନ୍ତୁ ବାରମ୍ବାର ନିଜ ବୟାନ ବଦଳାଉ ଥିଲା ଗୁରୁମୂର୍ତ୍ତି । ସେପଟେ ପରିବାରର ତିକ୍ତତା କଥା ପୋଲିସକୁ ତଦନ୍ତରେ ସହାୟକ ହୋଇଥିଲା । ସେହି ଦିଗରେ ପୋଲିସ ତଦନ୍ତ କରିବା ଆରମ୍ଭ କରି ଦେଇଥିଲା ।

• ସତ ମାନିଗଲା ସ୍ବାମୀ

ପୋଲିସ ତଦନ୍ତ ବେଳେ ସବୁ ସତ ମାନିଯାଇଥିଲା ରାକ୍ଷସ ସ୍ବାମୀ । ସେ ହିଁ ପତ୍ନୀ ମାଧବୀଙ୍କୁ ହତ୍ୟା କରିଥିବା ପୋଲିସ ନିକଟରେ ମାନି ଯାଇଥିଲା । ଗତ ଜାନୁଆରୀ 15ରେ ଉଭୟ ପତିପତ୍ନୀଙ୍କ ମଧ୍ୟରେ ଜୋରଦାର ପାଟିତୁଣ୍ଡ ହୋଇଥିଲା । ଏହି ସମୟରେ ଉତକ୍ଷିପ୍ତ ହୋଇ ପତ୍ନୀଙ୍କୁ ହତ୍ୟା କରିଥିଲା ଗୁରୁମୂର୍ତ୍ତି। ହେଲେ ଏହାପରେ ସେ ଯେଉଁ ଅମାନୁଷିକ କାଣ୍ଡ ଘଟାଇଥିଲା ତାହା ନିଶ୍ଚିତରୂପେ ବିରଳ ଅପରାଧ କହିଲେ ଭୁଲ ହେବ ନାହିଁ । ଏହା ପରେ ସେ ସ୍ତ୍ରୀର ଶରୀରକୁ ଏକ ଧାରୁଆ ଅସ୍ତ୍ରରେ ପିସ୍‌ ପିସ୍‌ କରି କାଟି ଦେଇଥିଲା । ତଥାପି ଗୁରୁମୂର୍ତ୍ତିର ରାଗ ଥମି ନଥିଲା । ପତ୍ନୀର ସ୍ମୃତିକୁ ସବୁଦିନ ପାଇଁ ହଟେଇ ଦେବାକୁ ସେ ଏକ ପ୍ରେସର କୁକୁର୍‌ରେ ସିଝାଇ ଦେଇଥିଲା । ଏହା ପରେ ସେ ଜିଲେଲାଗୁଡା ପୋଖରୀରେ ସମସ୍ତ ଅଂଶବିଶେଷ ଫିଙ୍ଗି ଦେଇଥିଲା । ପାଣିରେ ସମସ୍ତ ପ୍ରମାଣ ନଷ୍ଟ ହୋଇଯିବ ଭାବି ସେ ପୋଖରୀକୁ ବାଛିଥିଲା ।

ସ୍ତ୍ରୀ ମାଧବୀ (ETV Bharat)

• ପୋଖରୀରେ ପୋଲିସର ସର୍ଚ୍ଚ ଅପରେସନ

ଜିଲେଲାଗୁଡା ପୋଖରୀରେ ଏବେ ପ୍ରମାଣ ଖୋଜୁଛି ମିରପେଟ୍‌ ପୋଲିସ । ଫରେନ୍ସିକ ଏକ୍ସର୍ପଟଙ୍କ ସହ ବୁଡାଳୀ ମଧ୍ୟ ମୃତଦେହ ସନ୍ଧାନରେ ଅଛନ୍ତି । ଅଭିଯୁକ୍ତର ବୟାନ ଆଧାରରେ ଆମେ ସମସ୍ତ ପ୍ରମାଣ ଯୋଗାଡ କରିବାକୁ ଚେଷ୍ଟା କରୁଛୁ । ଆମ ଚାକିରୀ କାଳ ଭିତରେ ଏମିତି ଜଘନ୍ୟ ଘଟଣା କେବେ ଦେଖିନୁ ବୋଲି ଜଣେ ବରିଷ୍ଠ ପୋଲିସ ଅଧିକାରୀ କହିଛନ୍ତି । ତଦନ୍ତକାରୀ ଟିମ ହତ୍ୟାରେ ବ୍ୟବହୃତ ଅସ୍ତ୍ର ଓ ବାସନ ଗୁରୁମୂର୍ତ୍ତିର ଘରୁ ଜବତ କରିଛି । ଏସବୁକୁ ଜବତ କରି ଫରେନ୍ସିକ ଲ୍ୟାବ ପଠାଇଛି ପୋଲିସ । ଗୁରୁମୂର୍ତ୍ତିର ଘରକୁ ସିଲ୍‌ କରି ପୋଲିସ ତଦନ୍ତ ଚଳାଇଛି ।

• ଅବସରପ୍ରାପ୍ତ ସେନା କର୍ମଚାରୀରୁ ମୁଖ୍ୟ ଅଭିଯୁକ୍ତ

45 ବର୍ଷୀୟ ଗୁରୁମୂର୍ତ୍ତି କିଛି ବର୍ଷ ପୂର୍ବରୁ ଭାରତୀୟ ସେନାରୁ ଅବସର ନେଇଥିଲେ । ଏହା ପରେ ସେ କାଞ୍ଚନବାଗର ଏକ ସଂସ୍ଥାରେ ସିକ୍ୟୁରିଟି ଗାର୍ଡ ଭାବେ କାମ କରୁଥିଲେ । ଜଣେ ଶୃଙ୍ଖଳିତ ସେନା କର୍ମଚାରୀ ଏଭଳି ଜଘନ୍ୟ କାଣ୍ଡ ଘଟାଇପାରେ ବୋଲି କେହି ମଧ୍ୟ ବିଶ୍ବାସ କରିପାରୁ ନାହାନ୍ତି । ସ୍ବଭାବରେ ଶାନ୍ତ ଓ ଭଦ୍ର ନମ୍ର ଗୁରୁମୂର୍ତ୍ତି ଯେ ଏଭଳି କାଣ୍ଡ ଘଟାଇ ପାରନ୍ତି କାହାକୁ ବିଶ୍ବାସ ହେଉ ନାହିଁ ବୋଲି ପଡୋଶୀ କହିଛନ୍ତି ।

ତାଙ୍କର ଏଭଳି ଜଘନ୍ୟ କାଣ୍ଡ ପୁରା ପରିବାରକୁ ନଷ୍ଟ କରିଦେଲା ବୋଲି ସମ୍ପର୍କୀୟ କହିଛନ୍ତି । ସେପଟେ ମାଧବୀଙ୍କ ପରିବାର ନ୍ୟାୟ ଦାବି କରିଛନ୍ତି । ଏଭଳି ଜଘନ୍ୟ କାଣ୍ଡ ଘଟାଇଥିବା ଦୋଷୀକୁ ଦଣ୍ଡ ମିଳିଲେ ଝିଅର ଆତ୍ମା ଶାନ୍ତି ପାଇବ ବୋଲି ସେମାନେ କହିଛନ୍ତି। ଗୁରୁମୂର୍ତ୍ତିଙ୍କ ଏଭଳି କାଣ୍ଡ ପୁରା ପରିବାରକୁ ଦୋହଲାଇ ଦେଲା । ତାଙ୍କର ଦୁଇ ପିଲା ଅନାଥ ହୋଇଗଲେ । ସେମାନେ ଏବେ ସମ୍ପର୍କୀୟଙ୍କ ପାଖରେ ଅଛନ୍ତି । ଜଣେ ଭଲ ସ୍ବାମୀ ଆଉ ଭଲ ବାପା ବୋଲି ତାଙ୍କୁ ଆମେ ଭାବୁଥିଲୁ । କିନ୍ତୁ ସେ ସମସ୍ତଙ୍କୁ ଧୋକା ଦେଲେ ବୋଲି ମାଧବୀଙ୍କ ପରିବାର ଅଭିଯୋଗ କରିଛନ୍ତି ।

ଏହି ଘଟଣା ପରେ ସୋସିଆଲ ମିଡିଆରେ ଏବେ ପାରିବାରିକ ହିଂସା ଓ ମାନସିକ ସ୍ବାସ୍ଥ୍ୟକୁ ନେଇ ଚର୍ଚ୍ଚା ଜୋର ଧରିଛି । ପାରିବାରିକ ବିବାଦ ପରବର୍ତ୍ତୀ ମୁହୂର୍ତ୍ତରେ କିଭଳି ହିଂସାର ରୂପ ନେଇପାରେ ତାହା ଅନ୍ୟମାନଙ୍କ ପାଇଁ ନିଶ୍ଚିତ ରୂପେ ଏକ ସତର୍କ ଘଣ୍ଟି । ସେପଟେ ପୋଲିସ ଭେଙ୍କଟ ମାଧବୀ ଓ ତାଙ୍କ ପରିବାରକୁ ନ୍ୟାୟ ଦେବାକୁ ପ୍ରତିଶ୍ରୁତି ଦେଇଛି ।