ଭୁବନେଶ୍ୱର: ଭରତପୁର ଜଙ୍ଗଲରେ ବୋମା ବିସ୍ଫୋରଣର ଶିକାର ହୋଇଥିବା ଦନ୍ତା ହାତୀର ମୃତ୍ୟୁ ହୋଇଛି । ହାତୀଟିର ପାଟିରେ ବୋମା ଫୁଟିଥିବା ସନ୍ଦେହ କରାଯାଉଥିଲା । ବିସ୍ଫୋରଣର ଶିକାର ହୋଇଥିବା ଏହି ହାତୀକୁ ଆହତ ଅବସ୍ଥାରେ ଉଦ୍ଧାର କରିବା ପରେ OUAT ଓ ନନ୍ଦନକାନନ ପ୍ରାଣୀ ଚିକିତ୍ସକଙ୍କ ଦ୍ୱାରା ଚିକିତ୍ସା ଜାରି ରହିଥିଲା । ତେବେ ସୋମବାର ମଧ୍ୟରାତ୍ରରେ ଏହି ଦନ୍ତା ହାତୀର ମୃତ୍ୟୁ ହୋଇଥିବା ଜଣାପଡିଛି ।
ବନ ବିଭାଗ ପକ୍ଷରୁ ମିଳିଥିବା ସୂଚନା ଅନୁଯାୟୀ, ପ୍ରାୟ 10ରୁ 15 ଦିନ ତଳେ ହାତୀଟି ଖୋର୍ଦ୍ଧା ଜଙ୍ଗଲରୁ ଭରତପୁର ଜଙ୍ଗଲକୁ ଚାଲି ଆସିଥିଲା । ସେଠାରେ ଅନ୍ୟ ହାତୀମାନଙ୍କ ସହ ଚଳପ୍ରଚଳ କରୁଥିଲା । ତେବେ 3ରୁ 4 ଦିନ ତଳେ ହାତୀଟି ଚଲାବୁଲା କରିପାରୁନଥିବା ବେଳେ ଜଙ୍ଗଲ ରାସ୍ତାରେ ପଡିରହିଥିବା ନେଇ ଗତକାଲି (ସୋମବାର) ପାଟ୍ରୋଲିଂ ସମୟରେ ବନ କର୍ମଚାରୀ ଦେଖିବାକୁ ପାଇଥିଲେ । ହାତୀଟିର ମୁହଁ ସମ୍ପୂର୍ଣ୍ଣ ନଷ୍ଟ ହୋଇଯାଇଥିବା ଦେଖିବାକୁ ପାଇଥିଲେ । ହାତୀର ଜିଭ ଛିଡିଯିବା ସହ ମାଢି ହାଡ ଫାଟି ନଷ୍ଟ ହୋଇଯାଇଥିଲା । ଗୁରୁତର ଅବସ୍ଥାରେ ହାତୀଟିକୁ ଉଦ୍ଧାର କରାଯାଇ ତା'ର ଚିକିତ୍ସା ଆରମ୍ଭ କରାଯାଇଥିଲା । ଓୟୁଏଟି ଓ ନନ୍ଦନକାନନ ପ୍ରାଣୀ ଉଦ୍ୟାନର ପ୍ରାଣୀ ଚିକିତ୍ସକମାନେ ମିଶି ହାତୀର ଚିକିତ୍ସା କରୁଥିଲେ । ହେଲେ ହାତୀର ଅବସ୍ଥା ସଙ୍କଟାପନ୍ନ ଥିବାବେଳେ ଗତକାଲି ମଧ୍ୟରାତିରେ ତା'ର ମୃତ୍ୟୁ ହୋଇଛି ।