ବାଲେଶ୍ବର: ଦୁଇ ମହିଳା ଓ ଦୁଇ ଯୁବକଙ୍କୁ ଗଛରେ ଭାଙ୍ଗି ନିସ୍ତୁକ ମାଡ଼ ମାରିଲେ ଗ୍ରାମବାସୀ । ସେମାନେ ଦେହ ବ୍ୟବସାୟରେ ସମ୍ପୃକ୍ତ ଥିବା ଅଭିଯୋଗ ହୋଇଛି । ଯେଉଁଥିପାଇଁ ଆଇନକୁ ହାତକୁ ନେଇ ଏଭଳି ମାଡ଼ ମାରିଛନ୍ତି ଗ୍ରାମବାସୀ । ବାଲେଶ୍ୱର ଜିଲ୍ଲା ଭୋଗରାଇ ଥାନା ଅନ୍ତର୍ଗତ ଲକ୍ଷ୍ମୀପାଟଣା ଗ୍ରାମରେ ଏପରି ଘଟଣା ଘଟିଛି । ଗ୍ରାମବାସୀଙ୍କ ଅଭିଯୋଗ ଅନୁସାରେ, ଗ୍ରାମର ରାସ୍ତା କଡ଼ରେ ଥିବା ଏକ କୁଡ଼ିଆ ଘରେ ଦୀର୍ଘଦିନ ହେବ ଦେହ ବ୍ୟବସାୟ ଚାଲିଆସୁଥିଲା । ପଶ୍ଚିମବଙ୍ଗର ଜଣେ ଯୁବକ ସେହି କୁଡ଼ିଆରେ ରହି କିଛି ମହିଳା ଏବଂ ଯୁବତୀଙ୍କୁ ରଖି ଏମିତି ଦେହ ବ୍ୟବସାୟ ଚଳାଇଥିବା ଅଭିଯୋଗ ହୋଇଛି ।
ଗ୍ରାମବାସୀମାନେ ଏହି କାର୍ଯ୍ୟକୁ ବିରୋଧ କରିଆସୁଥିଲେ । ଏପରିକି ଘଟଣାକୁ ନେଇ ଅନେକ ସମୟରେ ଅପ୍ରୀତିକର ପରିସ୍ଥିତି ଉପୁଜିଥିଲା । ଅନେକ ସମୟରେ ଗ୍ରାମବାସୀଙ୍କୁ ସମ୍ପୃକ୍ତ ପଶ୍ଚିମବଙ୍ଗ ଯୁବକ ଧମକ ଚମକ ଦେଉଥିଲେ । ଆଉ ଗ୍ରାମବାସୀଙ୍କୁ ଭୟଭୀତ କରାଇ ଏଭଳି ଅନୈତିକ କାର୍ଯ୍ୟକଳାପ ଜାରି ରଖିଥିଲେ । ଗ୍ରାମର ପରିବେଶ ଦିନକୁ ଦିନ ବିଗିଡ଼ିବା ଯୋଗୁଁ ଶେଷରେ ଗ୍ରାମବାସୀମାନେ ଏକଜୁଟ ହୋଇ ସେହି କୁଡ଼ିଆ ଘରେ ଧସେଇ ପଶିଥିଲେ । କବାଟ ନ ଖୋଲିବାରୁ ଘରର କବାଟ ଭାଙ୍ଗି ଘର ଭିତରେ ପଶି ଗ୍ରାମବାସୀ ଦୁଇଜଣ ମହିଳା ଏବଂ ଦୁଇଜଣ ଯୁବକ ଥିବା ଦେଖିବାକୁ ପାଇଥିଲେ ।
ଏହା ବି ପଢନ୍ତୁ...ରାଜଧାନୀରେ ଦେହ ବ୍ୟବସାୟ ନେଇ ଆତଙ୍କ ରାଜ୍, ଢେଲା ପଥର ମାରି ଭାଙ୍ଗିଲେ କାର କାଚ, ୨ ଅଟକ