ସମ୍ବଲପୁର: କଥାରେ ଅଛି ସା ବିଦ୍ୟା ଯା ବିମୁକ୍ତୟେ । ଅର୍ଥାତ୍ ଯାହା ମନୁଷ୍ୟକୁ ଅଜ୍ଞାନତାରୁ ମୁକ୍ତି ପ୍ରଦାନ କରେ ତାହା ହିଁ ବିଦ୍ୟା ବା ଶିକ୍ଷା । ଶିକ୍ଷା ସମାଜରେ ବୈପ୍ଲବିକ ପରିବର୍ତ୍ତନ ଆଣିଥାଏ । ତେଣୁ ଶିକ୍ଷାକୁ ଆମ ଭାରତୀୟ ସମାଜରେ ବହୁତ ଗୁରୁତ୍ବ ଦିଆଯାଇଛି । ବର୍ତ୍ତମାନର ଶିକ୍ଷା ବ୍ୟବସ୍ଥାରେ ଆର୍ଥିକ ସ୍ତରରେ ଅନଗ୍ରସର ଛାତ୍ରଛାତ୍ରୀ କେଉଁଠି ନା କେଉଁଠି ପଛରେ ପଡିଯାଉଛନ୍ତି l ପ୍ରତିଭା ଓ ଦକ୍ଷତା ଥାଇ ମଧ୍ୟ କେତେକ ଛାତ୍ରଛାତ୍ରୀ ଅର୍ଥ ଅଭାବ ଯୋଗୁଁ ପ୍ରତିଦ୍ବନ୍ଦିତାପୂର୍ଣ୍ଣ ଶିକ୍ଷା ବ୍ୟବସ୍ଥାରେ ପଛରେ ରହିଯାଉଛନ୍ତି ।
ଥିଲାବାଲା ଘରର ପିଲାମାନେ ଟିଉସନ ଓ କୋଚିଂ ନେଉଥିବାବେଳେ ଗରିବ ଘରର ପିଲା ସରକାରୀ ସ୍କୁଲ ଛଡା ଆଉ କୌଣସି ସ୍ଥାନକୁ ଶିକ୍ଷା ଗ୍ରହଣ ପାଇଁ ଯାଇ ପାରୁନାହାନ୍ତି ଯାହାଫଳରେ ସେମାନେ ପଛରେ ରହୁଛନ୍ତି । ଏଭଳି ପରିସ୍ଥିତିରେ ସମ୍ବଲପୁର ସହରର ବସ୍ତି ଅଞ୍ଚଳର ଆର୍ଥିକ ଅନଗ୍ରସର ଛାତ୍ରଛାତ୍ରୀଙ୍କୁ ମାଗଣାରେ ଟିଉସନ ଶିକ୍ଷା ଦେଉଛନ୍ତି ସମ୍ବଲପୁର ବସୁନ୍ଧରା କମ୍ୟୁନିଟି ସେଣ୍ଟରର ସ୍ବେଛାସେବୀ । ପ୍ରାରମ୍ଭ ଶ୍ରେଣୀରୁ ସପ୍ତମ ଶ୍ରେଣୀ ପର୍ଯ୍ୟନ୍ତ ଛାତ୍ରଛାତ୍ରୀଙ୍କୁ ଏହି ଅନୁଷ୍ଠାନ ନିଜର ମାଗଣା ପାଠଶାଳାରେ ଟିଉସନ ଦେଇ ବର୍ତ୍ତମାନ ଚର୍ଚ୍ଚାରେ ଅଛି । ସମ୍ବଲପୁର ସହରର ଚର୍ଚ୍ଚ ଛକରୁ ସରକାରୀ ହସ୍ପିଟାଲ ଆଡକୁ ଯିବା ସମୟରେ ବାମ ପାର୍ଶ୍ଵରେ ରହିଛି ଏହି ଫ୍ରି ପାଠଶାଳା ।
ପ୍ରତ୍ୟେକ ଦିନ ସନ୍ଧ୍ୟା ହେଲେ ଏଠାକୁ ଆସନ୍ତି ସ୍ଥାନୀୟ ଅଞ୍ଚଳରେ ଛାତ୍ରଛାତ୍ରୀ । ପ୍ରଥମରୁ ସପ୍ତମ ଶ୍ରେଣୀର ପିଲାଙ୍କୁ ଏଠାରେ ମାଗଣାରେ ଟିଉସନ ଦିଆଯାଉଛି । ସ୍ଥାନୀୟ ବସୁନ୍ଧରା କମ୍ୟୁନିଟି ସେଣ୍ଟରର ସଦସ୍ୟମାନଙ୍କ ଉଦ୍ୟମରେ ଏହି ମାଗଣା ପାଠଶାଳା ଖୋଲା ଯାଇଥିବା ବେଳେ ଏଠାରେ କିଛି ଶିକ୍ଷିତ ଯୁବତୀ, ଯୁବକ ଓ କିଛି ଅବସରପ୍ରାପ୍ତ ଶିକ୍ଷକ ଏହି ଛାତ୍ରଛାତ୍ରୀଙ୍କୁ ଶିକ୍ଷାଦାନ କରୁଛନ୍ତି । ପ୍ରତ୍ୟେକ ଦିନ ସନ୍ଧ୍ୟା 5 ଟାରୁ 7ଟା ପର୍ଯ୍ୟନ୍ତ ଏଠାରେ ପାଠପଢା ଚାଲିଥାଏ । ସ୍କୁଲର ସବୁ ବିଷୟ ସହ ସାଧାରଣ ଜ୍ଞାନ, ନୃତ୍ୟ ତଥା ଚିତ୍ରାଙ୍କନ ଶିକ୍ଷା ମଧ୍ୟ ଦିଆଯାଏ ।