ଭୁବନେଶ୍ବର: ଶ୍ରୀମନ୍ଦିରର ଚାରିଦ୍ବାର ନ ଖୋଲିବା ପ୍ରସଙ୍ଗକୁ ନେଇ ରାଜ୍ୟ ସରକାରଙ୍କୁ ଘେରିଛି ବିଜେପି । ବିଜେପିର ମୁଖପାତ୍ର ଅନୀଲ ବିଶ୍ବାଳ କହିଛନ୍ତି ଯେ, ଡହ ଡହ ଖରାରେ ମହାପ୍ରଭୁଙ୍କ ମନ୍ଦିର ଆଗରୁ ଯେଉଁ ଦୃଶ୍ୟ ଆସୁଛି ସମସ୍ତଙ୍କୁ ବ୍ୟଥିତ କରୁଛି । ରାଜ୍ୟ ସରକାର 2019ରେ 3 ଦ୍ବାର ବନ୍ଦ ପାଇଁ ନିଷ୍ପତ୍ତି ନେଲେ । ପରିକ୍ରମା ପ୍ରକଳ୍ପ ସରିବା ପରେ ଚାରି ଦ୍ବାର ଖୋଲିବୁ ବୋଲି କହିଥିଲେ ସରକାର । ହେଲେ ବିଜେଡି ସରକାର ଜଗନ୍ନାଥ ମନ୍ଦିରକୁ ଲୋକ ନ ଆସନ୍ତୁ ବୋଲି ଷଡଯନ୍ତ୍ର କରିଛି । ଅନ୍ୟ 3 ଦ୍ବାର ବନ୍ଦ କରି ମନ୍ଦିର ପାଖରେ ଅତ୍ୟଧିକ ଭିଡ଼ କରିବାର ଅଧିକାର କିଏ ଦେଲା ବୋଲି ପ୍ରଶ୍ନ କରିଛି ବିଜେପି । ଏହା ସରକାରଙ୍କ ଦ୍ବାରା ପ୍ରାୟୋଜିତ ଅବ୍ୟବସ୍ଥା ବୋଲି ଅଭିଯୋଗ କରିଛି ବିଜେପି । ଦାନ ଅର୍ଥରେ ଯେଉଁ ଚାଉଳ ଆସିଥିଲା ଓ ଟଙ୍କା ଆସିଥିଲା ତାହା କୁଆଡେ ଗଲା ବୋଲି ବିଜେପି ସରକାରଙ୍କୁ ଟାର୍ଗେଟ କରିଛି ।
ଲୁଙ୍ଗି ପିନ୍ଧା ପ୍ରବକ୍ତା କି ସାଂସଦ ନ କହି ଜଗନ୍ନାଥ ସଂସ୍କୃତି ମାନୁଥିବା ନେତା ସ୍ପଷ୍ଟୀକରଣ ରଖନ୍ତୁ । ମହାପ୍ରଭୁ ଶ୍ରୀଜଗନ୍ନାଥ ମନ୍ଦିରରେ ଚାରି ଦ୍ବାରର ଧାର୍ମିକ ମହତ୍ତ୍ବ ରହିଛି । କେବଳ ସେତିକି ନୁହେଁ ସେହି ଚାରି ଦ୍ବାର ସମ୍ପୂର୍ଣ୍ଣ ଖୋଲା ରହିଲେ ଭକ୍ତମାନେ ସୁରୁଖୁରୁରେ ଜଗା ଦର୍ଶନ କରିପାରନ୍ତେ । କିନ୍ତୁ ଓଡ଼ିଶାରେ ଶାସନରେ ଥିବା ବିଜେଡିର ହିନ୍ଦୁ ବିରୋଧୀ ସରକାର ଚାହାନ୍ତି ନାହିଁ ଯେ, ଜଗା ଦର୍ଶନ ସୁରୁଖୁରୁରେ ହେଉ । ଆମର ପୂର୍ବପୁରୁଷମାନେ ଶ୍ରୀମନ୍ଦିର ନିର୍ମାଣବେଳେ ମହତ୍ ଉଦ୍ଦେଶ୍ୟ ନେଇ ଚାରି ଦ୍ବାର ନିର୍ମାଣ କରିଥିଲେ । କେଉଁ ଅଜଣା କାରଣ ପାଇଁ ରାଜ୍ୟ ସରକାର ୪ ଦ୍ବାର ଖୋଲୁ ନାହାନ୍ତି, ତାହା ବଡ ଚିନ୍ତାଜନକ ।