ବଲାଙ୍ଗୀର:ଅନିଶ୍ଚିତତା ଭିତରେ ବଲାଙ୍ଗୀରର ଜିଲ୍ଲାସ୍ତରୀୟ ଲୋକ ଉତ୍ସବ । କଳା ଓ କଳାକାର ତଥା ଲୋକଙ୍କ ଉତ୍ସବ 'ଲୋକ ଉତ୍ସବ' ଚଳିତ ବର୍ଷ ହେବା ନେଇ ଦ୍ଵନ୍ଦ ଦେଖା ଦେଇଛି । ଏହି ଲୋକ ଉତ୍ସବ ହେବ କି ନାହିଁ ଏହାକୁ ନେଇ ସନ୍ଦେହ ଉପୁଜିଛି । ଯାହାକୁ ନେଇ ଉଭୟ କଳାକାର ଓ ବଲାଙ୍ଗୀରବାସୀଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି ।
ତେବେ ପ୍ରତିବର୍ଷ ଡିସେମ୍ବରରୁ ଫେବୃୟାରୀ ମାସ ମଧ୍ୟରେ ବଲାଙ୍ଗୀର ଜିଲ୍ଲାସ୍ତରୀୟ ଲୋକ ଉତ୍ସବ ଆୟୋଜିତ ହୋଇଥାଏ । ଯେଉଁଥିରେ ସ୍ଥାନୀୟ ଲୋକକଳା ନୃତ୍ୟ, ସଂଗୀତ ଓ ରାଜ୍ୟ ବାହାର ଲୋକକଳାରଙ୍କ ମିଳନ ହୋଇଥାଏ । ଲୋକ ବିଭିନ୍ନ ଲୋକକଳାକୁ ଉପଭୋଗ କରିବା ସହ ବିଭିନ୍ନ ସଂସ୍କୃତିକୁ ପାଖରୁ ଜାଣିବାର ସୁଯୋଗ ପାଇ ଆସିଛନ୍ତି । ସେହିପରି ଲୋକ ତଥା କଳାକାର ଏହି ଉତ୍ସବକୁ ଅପେକ୍ଷା କରି ରହିଥାନ୍ତି । ହେଲେ ଏଥର ଏହି ଅପେକ୍ଷା ଅନ୍ତ ହେବ ନାହିଁ ବୋଲି ପ୍ରତିତ ହୋଇଛି ।
ସୂଚନା ଅନୁସାରେ, କିଛି ମାସ ପୂର୍ବରୁ ଜିଲ୍ଲାପାଳଙ୍କ ଅଧ୍ୟକ୍ଷତାରେ ଲୋକ ଉତ୍ସବ ଆୟୋଜନ ପାଇଁ ବୈଠକ ବସିଥିଲା । ଏଥିରେ ବିଭିନ୍ନ କମିଟି ମଧ୍ୟ ଗଠିତ ହୋଇଥିଲା । ହେଲେ ଗଠିତ ହୋଇଥିବା କମିଟି ଓ ଜିଲ୍ଲା ପ୍ରଶାସନ ମଧ୍ୟରେ ସମନ୍ୱୟ ଅଭାବ ପରେ କମିଟି ସଦସ୍ୟମାନେ ଶେଷ ମୁହୂର୍ତ୍ତରେ ଇସ୍ତଫା ଦେବା ଯୋଗୁଁ ଏଭଳି ଅବସ୍ଥା ହୋଇଥିବାର ଜଣା ପଡ଼ିଛି । ଯେଉଁମାନେ ଲୋକ ଉତ୍ସବ କରିବା ପାଇଁ ବିଭିନ୍ନ କମିଟିରେ ରହିଲେ ସେମାନେ କାହିଁକି ଏଭଳି କଲେ । ଯଦି ସେମାନେ ଉତ୍ସବ କରିବା ପାଇଁ ସମର୍ଥ ନଥିଲେ ତାହେଲେ କାହିଁକି ପଦ ପଦବୀରେ ରହିଥିଲେ ବୋଲି ସାଧାରଣରେ ପ୍ରଶ୍ନ ଉଠିଛି । ସେପଟେ କଳାକାର ଓ ସାଧାରଣ ଲୋକ ଏହାକୁ ନେଇ ବିଭିନ୍ନ ଆରୋପ ପ୍ରତ୍ୟାରୋପ କରିଛନ୍ତି । କିଛି ଲୋକ ଓ ବୁଦ୍ଧିଜୀବୀ ଲୋକ ଉତ୍ସବ ହେବା ନେଇ ମଧ୍ୟ ଆଶାବାଦୀ ଅଛନ୍ତି ।