ଦ୍ରାବିଡଙ୍କଠୁ ବୁମରା; କେଉଁ କେଉଁ ଭାରତୀୟ ଷ୍ଟାର କ୍ରିକେଟର ଜିତିଛନ୍ତି ଆଇସିସି ଆଓ୍ବାର୍ଡ

ବର୍ଷ 2024 ପାଇଁ ବୁମରା ଟେଷ୍ଟରେ ବେଷ୍ଟ ବିବେଚିତ ହୋଇଥିବା ବେଳେ ଅର୍ଶଦୀପ ଟି-20ରେ ଶ୍ରେଷ୍ଠ କ୍ରିକେଟର ଭାବେ ଆଇସିସି ଆଓ୍ବାର୍ଡ ଜିତିଛନ୍ତି ।

ହାଇଦ୍ରବାବାଦ: ବିଶ୍ୱରେ କ୍ରିକେଟର ବସ୍ ହେଉଛି ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି) । ସମଗ୍ର ବିଶ୍ୱରେ କ୍ରିକେଟର ପରିଚାଳନା ଦାୟିତ୍ୱ ଆଇସିସି ହାତରେ । ବିଶ୍ୱସ୍ତରରେ କ୍ରିକେଟର ପ୍ରଚାର ପ୍ରସାର ସହିତ କ୍ରିକେଟ ବିଶ୍ୱକପ ତଥା ବିଭିନ୍ନ ଟୁର୍ଣ୍ଣାମେଣ୍ଟ ଆଜୋୟନ କରିଥାଏ ଆଇସିସି । ସେହିପରି ସର୍ବତ୍କୃଷ୍ଟ ଖେଳ ପାଇଁ ପୁରସ୍କର ମଧ୍ୟ ପ୍ରଦାନ କରିଥାଏ ଆଇସିସି ।

ଗତକାଲି ଆଇସିସି ପକ୍ଷରୁ ଭାରତୀୟ କ୍ରିକେଟ ଜଗତର ଷ୍ଟାର ବୋଲର ଯଶପ୍ରୀତ ବୁମରାଙ୍କୁ ବର୍ଷ 2024 ପାଇଁ ଶ୍ରେଷ୍ଠ ଟେଷ୍ଟ କ୍ରିକେଟର ଭାବେ ସମ୍ମାନିତ କରାଯାଇଛି । ଦମଦାର, ଅବିଶ୍ୱସନୀୟ ତଥା ଚକିତ କଲା ଭଳି ପ୍ରଦର୍ଶନ ପାଇଁ ବୁମରାଙ୍କୁ ଆଇସିସି ଟେଷ୍ଟ କ୍ରିକେଟର ଅଫ୍ ଦି ଇୟର ଆଓ୍ବାର୍ଡ ମିଳିଛି । ବୁମରା 2024ରେ, 13ଟି ଟେଷ୍ଟ ମ୍ୟାଚ ଖେଳି 357 ଓଭର ବୋଲିଂ କରି 71ଟି ଓ୍ବିକେଟ ହାସଲ କରିଛନ୍ତି ।

ପ୍ରଥମ ଭାରତୀୟ ପେସର ଏବଂ ଦ୍ୱିତୀୟ ଭାରତୀୟ ବୋଲର ଭାବେ ଏହି ଆଓ୍ବାର୍ଡ ପାଇଛନ୍ତି । ବୁମରାଙ୍କ ଏହି ରେକର୍ଡ ପରେ ଭାରତ, ଅଷ୍ଟ୍ରେଲିଆ ସମକକ୍ଷ ହୋଇପାରିଛି । ଆଇସିସି ଆଓ୍ବାର୍ଡ ଜିତିବାରେ ଭାରତ ଏବଂ ଅଷ୍ଟ୍ରେଲିଆ ପକ୍ଷରୁ ସମାନ ଖେଳାଳି ରହିଛନ୍ତି । ବୁମରାଙ୍କୁ ପୂର୍ବରୁ 5 ଜଣ ଭାରତୀୟ ଏହି ସମ୍ମାନ ପାଇଥିଲେ । ଏହି ଏଲିଟ୍ ଲିଷ୍ଟରେ ସାମିଲ ଥିଲେ, ରାହୁଲ ଦ୍ରାବିଡ (2004), ଗୌତମ ଗମ୍ଭୀର (2009), ବିରେନ୍ଦ୍ର ସେହଓ୍ବାଗ (2010), ରବିଚନ୍ଦ୍ରନ ଅଶ୍ୱିନ (2016) ଏବଂ ବିରାଟ କୋହଲି (2018) ।

ଏହା ସହିତ ଆଉ ଜଣେ ଭାରତୀୟ ଟି-20 ବୋଲର ଅର୍ଶଦୀପ ସିଂ ମଧ୍ୟ ଆଇସିସି ଟି-20 କ୍ରିକେଟର ଆଓ୍ବାର୍ଡ ଜିତିଛନ୍ତି । 2024ରେ ଅର୍ଶଦୀପ 18ଟି ମ୍ୟାଚ ଖେଳି 36ଟି ଓ୍ବିକେଟ ହାସଲ କରିଛନ୍ତି । ପ୍ରତି 10ଟି ବଲରେ ଗୋଟିଏ ଓ୍ବିକେଟ ହାତେଇଛନ୍ତି ଅର୍ଶଦୀପ ।

ତେବେ ଆସନ୍ତୁ ଜାଣିବା କେଉଁ କେଉଁ କ୍ରିକେଟର ଭାରତ ପାଇଁ କ୍ରିକେଟରରେ ଅତୁଳନୀୟ ଅବଦାନ ଦେଇ ଜିତିଛନ୍ତି ଆଇସିସି ଆଓ୍ବାର୍ଡ । 2004ରୁ 2024 ମଧ୍ୟରେ କେଉଁ କେଉଁ ଭାରତୀୟ କ୍ରିକେଟର ଜିତିଛନ୍ତି ଦେଖନ୍ତୁ ଏହି ଲିଷ୍ଟ ।

ଆଇସିସି ଆଓ୍ବାର୍ଡ ବିଜୟୀ ଭାରତୀୟ କ୍ରିକେଟର-

ରାହୁଲ ଦ୍ରାବିଡ (2004)- ପ୍ରଥମ ଭାରତୀୟ କ୍ରିକେଟ ଭାବେ ଆଇସିସି ଆଓ୍ବାର୍ଡ ଜିତିଥିଲେ ରାହୁଲ ଦ୍ରାବିଡ । 2004ରେ ଦ୍ରାବିଡ ଟେଷ୍ଟ୍ କ୍ରିକେଟର ଅଫ୍ ଦି ଇୟର ଏବଂ ଆଇସିସି କ୍ରିକେଟର ଅଫ୍ ଦି ଇୟର ଆଓ୍ବାର୍ଡ ଜିତିଥିଲେ । 12 ମ୍ୟାଚର 18ଟି ଇନିଂସ ଖେଳି 946 ରନ ସ୍କୋର କରିଥିଲେ ଦ୍ରାବିଡ । 63.06 ଆଭରେଜରେ ରନ ସ୍କୋର କରିଥିଲେ ଦ୍ରାବିଡ ।

Rahul Dravid 2004 ICC cricketer of the Year and Test Cricketer of the year awards ((AFP))

ଇର୍ଫାନ ପଠାନ- (2004)- ଅଲରାଉଣ୍ଡର ଇର୍ଫାନ ପଠାନ 2004ରେ ଆଇସିସି ଏମର୍ଜିଂ କ୍ରିକେଟର ଅଫ୍ ଦି ଇୟର ଆଓ୍ବାର୍ଡ ଜିତିଥିଲେ । 2003ରେ ଟେଷ୍ଟ ଡେବ୍ୟୁ କରିଥିଲେ । ପରେ 2004ରେ 9ଟି ଟେଷ୍ଟରେ 38ଟି ଓ୍ବିକେଟ ନେଇଥିଲେ ଇର୍ଫାନ । ଏହା ସହିତ 210 ରନ ସ୍କୋର କରିଥିଲେ ଇର୍ଫାନ ।

ଏମ୍ ଏସ୍ ଧୋନୀ (2008, 2009, 2011)- ପ୍ରଥମ ଭାରତୀୟ ଅଧିନାୟକ ତଥା ବିଶ୍ୱର ମଧ୍ୟ ପ୍ରଥମ କ୍ରିକେଟର ଭାବେ ଧୋନୀ 3ଟି ଆଇସିସି ଟ୍ରଫି ହାସଲ କରିଛନ୍ତି । 2007 ଟି-20 ବିଶ୍ୱକପ, 2011 ଦିନିକିଆ ବିଶ୍ୱକପ ଏବଂ 2013 ଚମ୍ପିଆନ୍ସ ଟ୍ରଫି ଜିତି ରେକର୍ଡ କରିଛନ୍ତି ଧୋନୀ । ଏହା ସହିତ ଲଗାତାର ଦୁଇ ଥର ପାଇଁ ଆଇସିସି ଦିନିକିଆ କ୍ରିକେଟର ଆଓ୍ବାର୍ଡ ଜିତିଛନ୍ତି ଧୋନୀ । 2008 ଏବବଂ 2009ରେ ଏହି ସମ୍ମାନ ହାତେଇଥିଲେ ଧୋନୀ । ଏହା ସହିତ 2010 ଏବଂ 2011 ଆଇସିସି ଟେଷ୍ଟ୍ ଗଦା, ଭାରତ ହାତେଇଥିଲେ ଧୋନୀଙ୍କ ଅଧିନାୟକତ୍ୱରେ । ଏହା ସହିତ ଧୋନୀଙ୍କ ନେତୃତ୍ୱରେ ଭାରତ 2008 ଏବଂ 2010ରେ ବର୍ଡର-ଗାଭାସ୍କର ଟ୍ରଫି ଏବଂ 41 ବର୍ଷ ପରେ ନ୍ୟୁଜିଲାଣ୍ଡରେ ଐତିହାସିକ ଟେଷ୍ଟ ସିରିଜରେ ବିଜୟୀ ହୋଇଥିଲା ଭାରତ ।

ଯୁବରାଜ ସିଂ-2008- ଭାରତୀୟ ଷ୍ଟାର ବାମହାତୀ ବ୍ୟାଟର ଯୁବରାଜ ସିଂ ବର୍ଷ 2007ରେ ଅନ୍ତର୍ଜାତୀୟ ଟ୍ୱେଣ୍ଟି-20 ପର୍ଫମର ଆଓ୍ବାର୍ଡ ଜିତିଥିଲେ । 2007 ଟି-20 ବିଶ୍ୱକପରେ 6 ବଲରେ 6 ଛକା ମାରି ଇତିହାସ ରଚିଥିଲେ ଯୁବରାଜ ।

ଗୌତମ ଗମ୍ଭୀର- 2009-ପୂର୍ବତନ ଭାରତୀୟ କ୍ରିକେଟର ତଥା ବର୍ତ୍ତମାନର କୋଚ ଗୌତମ ଗମ୍ଭୀର 2009ରେ ଆଇସିସି ଟେଷ୍ଟ କ୍ରିକେଟର ଆଓ୍ବାର୍ଡ ଜିତିଥିଲେ । 8ଟି ଟେଷ୍ଟରେ 84.60 ଆଭରେଜରେ 1269 ରନ ସ୍କୋର କରିଥିଲେ । ଏହି ବର୍ଷ ଗମ୍ଭୀର 5ଟି ଶତକ ଏବଂ 4ଟି ଅର୍ଦ୍ଧଶତକ ହାସଲ କରିଥିଲେ ।

ସଚିନ ତେନ୍ଦୁଲକର- 2010- କ୍ରିକେଟର ଭଗବାନ ତଥା ଭାରତୀୟ କ୍ରିକେଟ ଜଗତର ଧ୍ରୁବ ତାରା ଭେଟେରାନ ବ୍ୟାଟର ସଚିନ ତେନ୍ଦୁଲକର ବର୍ଷ 2010ରେ ସାର ଗରଫିଲ୍ଡ ସୋବର୍ସ ଟ୍ରଫି ଆଓ୍ବାର୍ଡ ତଥା ଆଇସିସି କ୍ରିକେଟର ଅଫ୍ ଦି ଇୟର ଆଓ୍ବାର୍ଡ ଜିତିଥିଲେ । ଏହି ବର୍ଷ ସଚିନ 10ଟି ଟେଷ୍ଟରେ 1064 ରନ ସ୍କୋର କରିଥିଲେ । 17ଟି ଦିନିକିଆରେ ମଧ୍ୟ ତେନ୍ଦୁଲକର 914 ରନ ସ୍କୋର କରିଥିଲେ ।

Sachin Tenduilkar with Sir Garfield Sobers Trophy & the ICC Men's cricketer of the Year award ((AFP))

ବିରେନ୍ଦ୍ର ସେହଓ୍ବାଗ- 2010 - 2010ରେ ସେହଓ୍ବାଗ ଟେଷ୍ଟ୍ କ୍ରିକେଟର ଆଓ୍ବାର୍ଡ ଜିତିଥିଲେ । ଏହି ବର୍ଷ ସେହଓ୍ବାଗ 14ଟି ଟେଷ୍ଟ ମ୍ୟାଚରେ 1422 ରନ ସ୍କୋର କରିଥିଲେ । ଏହି ବର୍ଷ ସେ 5ଟି ଶତକ ଏବଂ 8ଟି ଅର୍ଦ୍ଧଶତକ ହାସଲ କରିଥିଲେ ।

ଚେତେଶ୍ୱର ପୂଜାରା-2013 ବର୍ଷ 2013ରେ ଭାରତୀୟ ଟେଷ୍ଟ ସ୍ପେଶାଲିଷ୍ଟ ବ୍ୟାଟର ପୂଜାରା ଆଇସିସି ଏମର୍ଜିଂ କ୍ରିକେଟର ଆଓ୍ବାର୍ଡ ଜିତିଥିଲେ ।

ବିରାଟ କୋହଲି-2012, 2017, 2018, 2019, 2023- ଭାରତ ପାଇଁ ସବୁଠୁ ଅଧିକ ଆଇସିସି ଆଓ୍ବାର୍ଡ ଜିତିଛନ୍ତି ବିରାଟ କୋହଲି । ବର୍ଷ 2017 ଏବଂ 2018ରେ ଆଇସିସି କ୍ରିକେଟର ଆଓ୍ୱାର୍ଡ, 2012, 2017, 2018 ଏବଂ 2023ରେ ଦିନିକିଆ କ୍ରିକେଟର ଆଓ୍ବାର୍ଡ ଏବଂ 2018ରେ ଟେଷ୍ଟ କ୍ରିକେଟର ଆଓ୍ବାର୍ଡ ଜିତିଛନ୍ତି କୋହଲି । 2019 ରେ ମଧ୍ୟ କୋହଲି ଆଇସିସି ସ୍ପିରିଟ୍ ଅଫ୍ ଦି କ୍ରିକେଟ ଆଓ୍ବାର୍ଡ ଜିତିଛନ୍ତି କୋହଲି ।

Virat Kohli with ICC Men's ODI Cricket of the Year award ((AFP))

ରବିଚନ୍ଦ୍ରନ ଆଶ୍ୱୀନ- 2016- ଭାରତୀୟ ଷ୍ଟାର ସ୍ପିନର ଆଶ୍ୱୀନ ବର୍ଷ 2016ରେ ଆଇସିସି ଟେଷ୍ଟ୍ କ୍ରିକେଟର ଅଫ୍ ଦି ଇୟର ଏବଂ ଆଇସିସି କ୍ରିକେଟର ଅଫ୍ ଦି ଇୟର ଆଓ୍ବାର୍ଡ ଜିତିଥିଲେ ।

ରିଷଭ ପନ୍ତ- 2018 - ଓ୍ବିକେଟ କିପର ବ୍ଯାଟର ରିଷଭ ପନ୍ତ ବର୍ଷ 2018 ପାଇଁ ଆଇସିସି ଏମର୍ଜିଂ କ୍ରିକେଟର ଆଓ୍ବାର୍ଡ ଜିତିଥିଲେ । ପ୍ରଥମ ଭାରତୀୟ କ୍ରିକେଟର ଭାବେ ପନ୍ତ ଇଂଲଣ୍ଡରେ ଶତକ ହାସଲ କରିଥିଲେ ।

ରୋହିତ ଶର୍ମା- 2019- ହିଟମ୍ଯାନ୍ ରୋହିତ ଶର୍ମା ବର୍ଷ 2019ରେ ଆଇସିସି ଦିନିକିଆ କ୍ରିକେଟର ଆଓ୍ବାର୍ଡ ଜିତିଥିଲେ । 2019 ଦିନିକିଆ ବିଶ୍ୱକପରେ ରୋହିତ 9ଟି ମ୍ୟାଚରେ 648 ରନ ସ୍କୋର କରିଥିଲେ । ଏଥିରେ ସାମିଲ ଥିଲା 5ଟି ଶତକ ଏବଂ ଗୋଟିଏ ଅର୍ଦ୍ଧଶତକ । ଏପରିକି ଦୁନିଆର ପ୍ରଥମ ବ୍ୟାଟର ଭାବେ କୌଣସି ଏକ ବିଶ୍ୱକପ ସଂସ୍କରଣରେ ରୋହିତ 5ଟି ଶତକ ହାସଲ କରିଥିଲେ ।

ସୂର୍ଯ୍ୟକୁମାର ଯାଦବ- 2022 ଏବଂ 2023-ଭାରତୀୟ ଷ୍ଟାଇଲିସ୍ ଟି-20 ବ୍ୟାଟର ସୂର୍ଯ୍ୟକୁମାର ଯାଦବ ବର୍ଷ 2022 ଏବଂ 2023 ପାଇଁ ଆଇସିସି ଟି-20 କ୍ରିକେଟର ଆଓ୍ୱାର୍ଡ ବିଜୟୀ ହୋଇଛନ୍ତି । 2023ରେ ସୂର୍ଯ୍ୟକୁମାର 733 ରନ ସ୍କୋର କରିଥିବା ବେଳେ 2022ରେ ସେ 1164 ରନ ସ୍କୋର କରିଥିଲେ ।

Suryakumar Yadav with ICC Men's T20 Cricket of the Year award ((ANI))

ଅର୍ଶଦୀପ ସିଂ 2024- ବର୍ଷ 2024 ପାଇଁ ଅର୍ଶଦୀପ ଆଇସିସି ଟି-20 କ୍ରିକେଟର ଅଫ୍ ଦି ଇୟର ଆଓ୍ବାର୍ଡ ଜିତିଛନ୍ତି ।

ଯଶପ୍ରୀତ ବୁମରା- 2024- ଷ୍ଟାର ଭାରତୀୟ ବୋଲର ଯଶପ୍ରୀତ ବୁମରା ପ୍ରଥମ ପେସର ତଥା ଷଷ୍ଠ ଭାରତୀୟ ଭାବେ ଆଇସିସି ଟେଷ୍ଟ କ୍ରିକେଟର ଆଓ୍ବାର୍ଡ ଜିତିଛନ୍ତି ।