ହାଇଦ୍ରାବାଦ : ପ୍ୟାରିସ ଅଲିମ୍ପିକ୍ସ 2024ରେ ଭାରତକୁ 6ଟି ମେଡାଲ ଆସିଛି । ହକି ଟିମ୍ ବ୍ୟତୀତ ସ୍ବପ୍ନୀଲ କୁସାଲେ ଓ ଅମନ ସେରାୱତ ମଧ୍ୟ ଗୋଟିଏ ଲେଖାଏଁ ବ୍ୟକ୍ତିଗତ ମେଡାଲ ଆଣିଛନ୍ତି । ହେଲେ ସବୁଠାରୁ ବେଶୀ ଚର୍ଚ୍ଚାରେ ରହିଛନ୍ତି ଷ୍ଟାର ଶୁଟର ତଥା ଏହି ଗୋଟିଏ ସଂସ୍କରଣରେ ଦୁଇ ଦୁଇଟି ମେଡାଲ ଜିତିଥିବା ମନୁ ଭାକର ଓ ଦେଶ ପାଇଁ ଏକମାତ୍ର ରୌପ୍ୟ ପଦକ ଆଣିଥିବା ଜାଭେଲିନ ଥ୍ରୋୟର ନୀରଜ ଚୋପ୍ରା । ସେମାନଙ୍କ ସଫଳତା ସେମାନଙ୍କୁ ଯେତିକି ଚର୍ଚ୍ଚାକୁ ଆଣିଥିଲା, ଏବେ ତା'ଠାରୁ ବେଶୀ ଚର୍ଚ୍ଚାକୁ ଆଣିଛି ସେମାନଙ୍କ ମଧ୍ୟରେ ଆଫେୟାର ଚାଲିଥିବା ଗୁଜବ । ଯାହାକୁ ନେଇ ମନୁଙ୍କ ବାପାଙ୍କ ପରେ ନିଜେ ମନୁ ମଧ୍ୟ ଏବେ ପ୍ରତିକ୍ରିୟା ରଖିଛନ୍ତି ।
ଏମିତି ତେଜିଲା ମନୁ-ନୀରଜଙ୍କ ଆଫେୟାର ଚର୍ଚ୍ଚା :-
ପ୍ୟାରିସ୍ ଅଲିମ୍ପିକ୍ସ 2024ରୁ ନୀରଜ ଚୋପ୍ରା ଏବଂ ମନୁ ଭାକରଙ୍କ ଏକ ଭିଡିଓ ସାମ୍ନାକୁ ଆସିଥିଲା । ଯେଉଁଥିରେ ଦୁହେଁ ପରସ୍ପର ସହ କେଉଁ ବିଷୟରେ କଥାବାର୍ତ୍ତା ହେଉଥିଲେ ତାହା ଯଦିଓ ଜଣା ପଡିନଥିଲା, କିନ୍ତୁ ଅନେକ ସୋସିଆଲ ମିଡିଆ ୟୁଜର୍ସ ଉଭୟଙ୍କ ମଧ୍ୟରେ ହୋଇଥିବା ବାର୍ତ୍ତାଳାପକୁ ଆଫେୟାର ଆଡ଼କୁ ଯୋଡିଥିଲେ । ଅନେକ ୟୁଜର୍ସ ମନୁ ଭାକରଙ୍କୁ 'X'ରେ ଭାଉଜ ବୋଲି ମଧ୍ୟ ସମ୍ବୋଧନ କରୁଛନ୍ତି । ମନୁ ଭାକର ନିଜ ପରିବାର ସହ ଠାକୁର ପୂଜା କରୁଥିବା ସମୟର ଫଟୋ ସେୟାର କରି ଜଣେ ୟୁଜର ଲେଖିଛନ୍ତି, 'ମନୁ ଭକର ଭାଉଜ ତାଙ୍କ ପରିବାର ସହିତ ନୀରଜ ଚୋପ୍ରାଙ୍କ ବିଜୟ ପାଇଁ ପ୍ରାର୍ଥନା କରୁଛନ୍ତି ।'
ମନୁ ଓ ତାଙ୍କ ମାଆଙ୍କୁ ଭେଟିଲେ ନୀରଜ :-
ସୋସିଆଲ ମିଡିଆରେ ଦୁଇଟି ଭିଡିଓ ବେଶ ଭାଇରାଲ ହେବାରେ ଲାଗିଛି । ଗୋଟିଏ ଭିଡିଓରେ ମନୁ ଭାକର ଏବଂ ନୀରଜ ଚୋପ୍ରା ପ୍ୟାରିସ ଅଲିମ୍ପିକ୍ସ ସମୟରେ ପରସ୍ପର ସହ କଥାବାର୍ତ୍ତା ହେଉଥିବା ଦେଖିବାକୁ ମିଳୁଛି । ଏହି ସମୟରେ ଉଭୟ ଏକାଠି ଚମତ୍କାର ଦେଖାଯାଉଛନ୍ତି । ଏହା ବ୍ୟତୀତ ଅନ୍ୟ ଏକ ଭିଡିଓରେ ନୀରଜ ଚୋପ୍ରା, ମନୁ ଭାକରଙ୍କ ମାଆ ସୁମେଧା ଭାକରଙ୍କ ସହ କଥାବାର୍ତ୍ତା ହେଉଥିବା ଦେଖିବାକୁ ମିଳୁଛି । ଯେଉଁଠାରେ ମନୁଙ୍କ ମା’ ନୀରଜଙ୍କ ହାତ ଆଣି ନିଜ ମୁଣ୍ଡରେ ରଖି ତାଙ୍କୁ କିଛି ପ୍ରତିଶ୍ରୁତି ମାଗୁଥିବା ଭଳି ଦେଖାଯାଉଛି । ଏହି ଦୁଇ ଭିଡିଓରେ ସୋସିଆଲ ମିଡିଆ ୟୁଜର୍ସଙ୍କ କେତେ ପ୍ରକାର ଅଜବ କମେଣ୍ଟ ଦେଖିବାକୁ ମିଳିଛି ।