ପ୍ୟାରିସ (ଫ୍ରାନ୍ସ) : ପ୍ୟାରିସ ପାରାଲିମ୍ପିକ୍ସ 2024ରେ ବି ଶୁଭିଲା ବିରାଟ କୋହଲିଙ୍କ ଗୁଣଗାନ । ଏହି ଭାରତୀୟ କିମ୍ବଦନ୍ତୀ କ୍ରିକେଟରଙ୍କୁ କେହି କେହି ବିଶ୍ବ କ୍ରିକେଟର ନୂଆ ପରିଚୟ ବା 'Face of World Cricket' ବୋଲି ବିବେଚନା କରିଥାନ୍ତି । ଦେଶ ବିଦେଶରେ ତାଙ୍କର ରହିଛନ୍ତି ଅସଂଖ୍ୟ ପ୍ରଶଂସକ । ତେବେ କେବଳ କ୍ରିକେଟରେ ନୁହେଁ, ବିଭିନ୍ନ ଖେଳରେ ଅନେକ ତାରକା କୋହଲିଙ୍କୁ ନିଜ ପ୍ରେରଣା ମାନିଥାନ୍ତି । ନିକଟରେ ଭାରତର ଯୁବ ଷ୍ଟାର ସଟଲର୍ ଲକ୍ଷ୍ୟ ସେନ କହିଥିଲେ ଯେ ସେ ଭାରତୀୟ ବ୍ୟାଡମିଣ୍ଟନର ବିରାଟ କୋହଲି ହେବାକୁ ଚାହାଁନ୍ତି । ଅନ୍ୟପଟେ ପ୍ୟାରିସ ପାରାଲିମ୍ପିକ୍ସ 2024ରେ ବ୍ୟାଡମିଣ୍ଟନରେ ସ୍ବର୍ଣ୍ଣ ଜିତିଥିବା ଷ୍ଟାର ପାରା ସଟ୍ଲର ନିତେଶ କୁମାର ମଧ୍ୟ କୋହଲିଙ୍କୁ ମିଜ ପ୍ରେରଣା ବୋଲି କହିଛନ୍ତି ।
ନିତେଶଙ୍କ ହିରୋ ବିରାଟ କୋହଲି :-
ହରିୟାଣାର ପାରା ସଟ୍ଲର ନିତେଶ କୁମାର ପ୍ୟାରିସ ପାରାଲିମ୍ପିକ୍ସ 2024ରେ ଭାରତକୁ ଦେଇଛନ୍ତି ଗୋଲ୍ଡ ମେଡାଲ । ଭାରତକୁ ଗୌରବାନ୍ବିତ କରିଥିବା ଏହି ଷ୍ଟାର ପାରା ସଟ୍ଲର ମଧ୍ୟ ଭାରତୀୟ ଭେଟେରାନ କ୍ରିକେଟର ବିରାଟ କୋହଲିଙ୍କୁ ନିଜ ହିରୋ ଭାବେ ବିବେଚନା କରନ୍ତି । ଏ କଥା ସେ ପୂର୍ବରୁ କହିଛନ୍ତି, ଆଉ ସେ ଯେତେବେଳେ ବ୍ୟାଡମିଣ୍ଟନ ଗୋଲ୍ଡ ମେଡାଲ ମ୍ୟାଚ୍ ଖେଳୁଥିଲେ, ସେତେବେଳେ ଇଂଲିଶ କମେଣ୍ଟେଟର ମଧ୍ୟ ଏହି କଥାକୁ ଦୋହରାଇଥିଲେ । ଯାହାକୁ ଶୁଣିଲେ ଆପଣ ମଧ୍ୟ ଗର୍ବ ଅନୁଭବ କରିବେ ।
ପାରାଲିମ୍ପିକ୍ସରେ 'କୋହଲି ହିରୋ' :-
ବାସ୍ତବରେ ଯେତେବେଳେ ନିତେଶ କୁମାର ବ୍ୟାଡମିଣ୍ଟନରେ ଗୋଲ୍ଡ ମେଡାଲ ପାଇଁ ଫାଇନାଲ ମ୍ୟାଚ୍ ଖେଳୁଥିଲେ, ସେତେବେଳେ ଇଂଲିଶ କମେଣ୍ଟେଟର ନିତେଶଙ୍କ ହିରୋ କୋହଲିଙ୍କ ଭୂୟସୀ ପ୍ରଶଂସା କରିଥିଲେ । ସେ କହିଥିଲେ, "ନିତେଶ ଏସିଆନ ପାରା ଚାମ୍ପିୟନସିପ୍ରେ ଏକାଧିକ ସିଲଭର ଓ ଗୋଲ୍ଡ ମେଡାଲ ଜିତିଛନ୍ତି । ସେ କହିଛନ୍ତି ଯେ ତାଙ୍କ ହିରୋ ହେଉଛନ୍ତି ବିରାଟ କୋହଲି । ଜଣେ ମହାନ ଭାରତୀୟ କ୍ରିକେଟର, ଯିଏ ପୂର୍ବରୁ ଭାରତୀୟ ଦଳର ଅଧିନାୟକ ମଧ୍ୟ ରହିଛନ୍ତି । ମୁଁ ଭାବୁଛି ଭାରତର ଅଧିକାଂଶ ଲୋକେ ବିରାଟ କୋହଲିଙ୍କୁ ଜଣେ 'ସ୍ପୋର୍ଟିଂ ହିରୋ' ଭାବରେ ଦେଖନ୍ତି ।"