ଭୀମସାରରୁ ଚୋରି ଶିଶୁପୁତ୍ର ରେଙ୍ଗାଲିରୁ ଉଦ୍ଧାର

ଭୀମସାରରୁ ନବଜାତ ଶିଶୁ ଚୋରି ଘଟଣା । ଚୋରି ଶିଶୁପୁତ୍ରକୁ ଉଦ୍ଧାର କଲା ପୋଲିସ । ଚୋରି କରିଥିବା ମହିଳା ଓ ତାଙ୍କ ସ୍ଵାମୀ ଅଟକ ।

ସମ୍ବଲପୁର: ବୁର୍ଲା ଭୀମସାରରୁ ନବଜାତ ଶିଶୁପୁତ୍ର ଚୋରି ଘଟଣା । ସମ୍ବଲପୁର ରେଙ୍ଗାଲି ସ୍ଥିତ ଗଣେଶ ନଗରରୁ ଚୋରି ହୋଇଥିବା ଶିଶୁପତ୍ରକୁ ଉଦ୍ଧାର କରିଛି ପୋଲିସ । ଉଦ୍ଧାର ଶିଶୁକୁ ପ୍ରଥମେ ବୁର୍ଲା ମେଡିକାଲକୁ ନିଆଯାଇ ଏସଏନସିୟୁରେ ରଖାଯାଇଛି । ଏକ ମେଡିକାଲ ଟିମ ଶିଶୁର ସ୍ୱାସ୍ଥ୍ୟ ଅବସ୍ଥା ଯାଞ୍ଚ କରୁଛନ୍ତି । ଶିଶୁକୁ ଚୋରି କରିଥିବା ମହିଳା ଓ ତାଙ୍କ ସ୍ଵାମୀଙ୍କୁ ପୋଲିସ ଅଟକ ରଖିଛି । ଗତ ନଭେମ୍ବର ୨୬ରେ ବୁର୍ଲା ଭୀମସାରରୁ ୩ ଦିନର ନବଜାତ ଶିଶୁକୁ ଚୋରି କରି ନିଆଯାଇଥିବା ଅଭିଯୋଗ ହୋଇଥିଲା ।

ଶିଶୁପୁତ୍ର ଉଦ୍ଧାର:

ଶିଶୁପୁତ୍ରକୁ ମହିଳା ଜଣକ ମେଡ଼ିକାଲରୁ ଚୋରି କଲା ପରେ ଏକ ଅଟୋ ଜରିଆରେ ମେଡିକାଲରୁ ଅଇଁଠାପାଲି ବସଷ୍ଟାଣ୍ଡ ନିକଟକୁ ଯାଇଥିଲେ । ସେଠାରୁ ପୁଣି ଆଉ ଏକ ଗାଡିରେ ରେଙ୍ଗାଲି ଗଣେଶ ନଗର ସ୍ଥିତ ତାଙ୍କ ଭଡା ଘରକୁ ଯାଇ ଲୁଚି ଯାଇଥିଲେ । ପୋଲିସ ସିସିଟିଭି ଫୁଟେଜ ଆଧାରରେ ମହିଳାଙ୍କ ଧରିବା ପାଇଁ ତଦନ୍ତ ଚଳାଇଥିଲେ । ପୋଲିସ ପକ୍ଷରୁ ଚୋରକୁ ଧରିବା ପାଇଁ ୪ଟି ଟିମ ଗଠନ କରାଯାଇଥିଲା । ଆଜିି ସମ୍ବଲପୁର ରେଙ୍ଗାଲିର ଗଣେଷ ନଗରରୁ ଶିଶୁପୁତ୍ରକୁ ଉଦ୍ଧାର କରାଯାଇଛି । ଚୋରି କରିଥିବା ମହିଳା ଓ ତାଙ୍କ ସ୍ଵାମୀଙ୍କୁ ଅଟକ ପଚରାଉଚରା କରୁଛି ପୋଲିସ । ତେବେ ଶିଶୁକୁ ନିଜେ ଲାଳନପାଳନ ପାଇଁ ନେଉଥିଲେ ନା ଆଉ କାହାକୁ ବିକ୍ରି କରିବା ପାଇଁ ନେଇଥିଲେ ତାହା ସ୍ପଷ୍ଟ ହୋଇନାହିଁ ।

୨ ଜଣ ଅଟକ:

ଏନେଇ ସମ୍ବଲପୁର ଅତିରିକ୍ତ ଏସପି ହରେଶ ଚନ୍ଦ୍ର ପାଣ୍ଡେ କହିଛନ୍ତି, "ଚୋରି ହୋଇଥିବା ଶିଶୁପୁତ୍ରକୁ ଆଜି ଉଦ୍ଧାର କରାଯାଇଛି । ମହିଳା ଜଣଙ୍କ ଶିଶୁପୁତ୍ରକୁ ଚୋରି କରିବା ପରେ ରେଙ୍ଗାଲି ସ୍ଥିତ ଗଣେଶ ନଗରରେ ନେଇ ରଖିଥିବା ଖବର ମିଳିଥିଲା । ଗଠନ ହୋଇଥିବା ପୋଲିସ ଟିମ୍‌ ସେଠାକୁ ଯାଇ ଶିଶୁପୁତ୍ରକୁ ଉଦ୍ଧାର କରିଛନ୍ତି । ମହିଳାଙ୍କର ପରିଚୟ ମିଳିଛି । ତାଙ୍କ ସହ ତାଙ୍କ ସ୍ବାମୀ ମଧ୍ୟ ଅଛନ୍ତି । ବର୍ତ୍ତମାନ ତଦନ୍ତ ଚାଲିଛି । ଏହାପରେ ଏଥିରେ ଆଉ କେଉଁମାନେ ସାମିଲ ଅଛନ୍ତି ଜଣାପଡ଼ିବ ।"

ସେହିପରି ଶିଶୁପୁତ୍ର ମାଆ ସୀତାଦେବୀ ଦାସ କହିଛନ୍ତି, "ମୋ ଛୁଆକୁ ଫେରି ପାଇଁ ମୁଁ ବହୁତ ଖୁସି । ଓଡ଼ିଶା ପୋଲିସକୁ ଧନ୍ୟବାଦ । ମତେ ଓଡ଼ିଶା ପୋଲିସ ଉପରେ ବିଶ୍ୱାସ ଥିଲା । ଛତିଶଗଡ ଠାରୁ ଓଡ଼ିଶା ପୋଲିସ ଭଲ କାମ କରିଛନ୍ତି ।"

ଏହା ମଧ୍ୟ ପଢ଼ନ୍ତୁ...ଭୀମସାରରୁ ନବଜାତ ଶିଶୁ ଚୋରି ଘଟଣା, ଅଭିଯୁକ୍ତକୁ ଧରିବାକୁ ୪ଟି ଟିମ ଗଠନ ଏହା ମଧ୍ୟ ପଢ଼ନ୍ତୁ...ଭୀମସାରରୁ ଶିଶୁ ପୁତ୍ର ଚୋରି ଅଭିଯୋଗ, CCTVରେ ମହିଳା କଏଦ

କ'ଣ ଥିଲେ ଘଟଣା:

ସୂଚନା ଅନୁସାରେ, ଛତିଶଗଡ଼ର ମହାଶମୁନ୍ଦ ଜିଲ୍ଲାର ମୋହନ ଦାସଙ୍କ ପତ୍ନୀ ସୀତା ଦାସ ପ୍ରସବ ପାଇଁ ବରଗଡ଼ ଜିଲ୍ଲା ମୁଖ୍ୟ ଡାକ୍ତରଖାନାକୁ ଆସିଥିଲେ । ସେଠାରେ ତାଙ୍କ ଅବସ୍ଥା ଗୁରୁତର ହେବାରୁ ନଭେମ୍ବର ୨୪ ତାରିଖରେ ଡାକ୍ତର ସମ୍ବଲପୁର ବୁର୍ଲା ଭୀମସାରକୁ ସ୍ଥାନାନ୍ତର କରିଥିଲେ । ସେମାନେ ବରଗଡରୁ ଭୀମସାର ଆସିଥିଲେ । ସେଠାରେ ରାତି ୨ଟା ରାତିରେ ସୀତାଙ୍କର ଏକ ଶିଶୁପୁତ୍ର ଜନ୍ମ ହୋଇଥିଲା । ସୀତାଙ୍କ ସେବା କରିବା ପାଇଁ ତାଙ୍କ ସହ ତାଙ୍କର ଭଉଣୀ ମଧ୍ୟ ଥିଲେ । ତେବେ ସୀତାଙ୍କ ପ୍ରସବ ପରେ ଜଣେ ଅଜଣା ମହିଳା ଆସି ସୀତାଙ୍କ ଭଉଣୀ ସହିତ ସମ୍ପର୍କ ସ୍ଥାପନ କରିଥିଲେ । ତାଙ୍କୁ ବିଭିନ୍ନ ପ୍ରକାର ଛୋଟ ବଡ଼ ସହାୟତା କରି ବଡ଼ ଚତୁରତାର ସହ ପରିବାରର ମନରେ ବିଶ୍ୱାସ ଜନ୍ମାଇଥିଲେ । ମହିଳା ଜଣଙ୍କର ଚାଲ ବାବଦରେ ପରିବାର ପୁରାପୁରି ଅନଭିଜ୍ଞ ଥିଲେ । ଅଜଣା ମହିଳା ଜଣଙ୍କ ଶିଶୁପୁତ୍ରକୁ ଖେଳାଇବାକୁ କହି ବାହାରକୁ ନେଇଥିଲେ । ଖେଳାଇବା ଓ ବୁଲାଇବା ବାହାନାରେ ସେଠାରୁ ଛୁଆକୁ ଧରି ଚମ୍ପଟ ମାରିଥିଲେ । ତେବେ ମହିଳା ଜଣକ ଶିଶୁପୁତ୍ରକୁ କୋଳରେ ଧରି ବାହାରୁଥିବାର ଦୃଶ୍ୟ ସିସିଟିଭି ଫୁଟେଜରୁ ଦେଖିବାକୁ ମିଳିଛି । ଏନେଇ ପରିବାର ଲୋକ ଅଭିଯୋଗ କରିବା ପରେ ପରେ ପୋଲିସ ସିସିଟିଭି କ୍ୟାମେରା ଯାଞ୍ଚ କରିବା ସହ ତନାଘନା ଆରମ୍ଭ କରିଥିଲା । ଆଜି ସେହି ମହିଳାଙ୍କ ଠାରୁ ଚୋରି ଶିଶୁପୁତ୍ରକୁ ଉଦ୍ଧାର କରାଯାଇଛି ।

ଇଟିଭି ଭାରତ, ସମ୍ବଲପୁର