ଦୁବାଇ:ବିଶ୍ୱର କୋଣ ଅନୁକୋଣ ତଥାପାକିସ୍ତାନରେ ମଧ୍ୟ ଅଛନ୍ତି ଭାରତର ଷ୍ଟାର ବ୍ୟାଟ୍ସମ୍ୟାନ୍ ବିରାଟ କୋହଲିଙ୍କ ପ୍ରଶଂସକ । ଏହି ଡ୍ୟାସିଂ ବ୍ୟାଟ୍ସମ୍ୟାନ୍ ଭାରତୀୟ ପ୍ରଶଂସକଙ୍କ ଠାରୁ ଯେତିକି ପ୍ରେମ ପାଆନ୍ତି, ତାଙ୍କୁ ପାକିସ୍ତାନୀ ପ୍ରଶଂସକମାନେ ମଧ୍ୟ ସେତିକି ପ୍ରେମ କରିଥାନ୍ତି । ବିରାଟ କୋହଲିଙ୍କ ଦମଦାର ଶତକ ସହାୟତାରେ ଭାରତ ରବିବାର ଦୁବାଇ ଇଣ୍ଟରନ୍ୟାସନାଲ ଷ୍ଟାଡିୟମରେ ପାକିସ୍ତାନକୁ 6 ୱିକେଟରେ ପରାସ୍ତ କରି ଚାମ୍ପିଅନ୍ସ ଟ୍ରଫି 2025ରୁ ପାକିସ୍ତାନକୁ ଏକ ପ୍ରକାର ବିଦାୟୀ ରାସ୍ତା ଦେଖାଇଛି । କିନ୍ତୁ, ପାକିସ୍ତାନୀ ପ୍ରଶଂସକମାନେ ବିରାଟ କୋହଲିଙ୍କ ଶତକକୁ ସେଲିବ୍ରେଟ୍ କରିଥିଲେ । ଯାହାର ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି ।
ପାକିସ୍ତାନରେ ସେଲିବ୍ରେଟ୍ ହେଲା କୋହଲିଙ୍କ ଶତକ-
ଭାରତର ଷ୍ଟାର ଡାହାଣହାତୀ ବ୍ୟାଟ୍ସମ୍ୟାନ୍ ବିରାଟ କୋହଲି ପାକିସ୍ତାନ ବିପକ୍ଷ ମ୍ୟାଚରେ 100 ରନର ଅପରାଜିତ ଇନିଂସ ଖେଳିଥିଲେ । କୋହଲି ନିଜର 51 ତମ ODI ଶତକ ସହ ଭାରତର ବିଜୟ ନିଶ୍ଚିତ କରିଥିଲେ । ଏହା ପାକିସ୍ତାନ ପାଇଁ ଏକ ଲଜ୍ଜାଜନକ ପରାଜୟ ଥିଲା । କିନ୍ତୁ, ଭାଇରାଲ ହେଉଥିବା ଭିଡିଓରେ ଦେଖାଯାଉଛି ଯେ ବିରାଟ ଶତକ ହାସଲ କରିବା ପରେ ପାକିସ୍ତାନୀ ପ୍ରଶଂସକମାନେ ବିଶେଷକରି ମହିଳା ପ୍ରଶଂସକ ଆନନ୍ଦରେ ନାଚିବା ଆରମ୍ଭ କରିଥିଲେ । ନିଜ ଦଳର ପରାଜୟରେ ଦୁଃଖି ନହୋଇ କୋହିଲଙ୍କ ଦମଦାର ଶତକକୁ ସେଲିବ୍ରେଟ କରିଥିଲେ ପାକିସ୍ତାନୀ ପ୍ରଶଂସକ ।
ଭାଇରାଲ ହୋଇଥିବା ଏହି ଭିଡିଓରେ ପାକିସ୍ତାନ କ୍ରିକେଟ୍ ଦଳର ପ୍ରଶଂସକମାନେ କମେଣ୍ଟ ଜାରି ରଖିଛନ୍ତି । ଜଣେ ୟୁଜର୍ସ ଲେଖିଛନ୍ତି, 'ମାନସିକ ସ୍ଥିତି ଏପରି ଯେ ବିରାଟ କୋହଲିଙ୍କ ଶତକ ପାଇଁ ପାକିସ୍ତାନରେ ଉତ୍ସାହ ଚରମସିମାରେ ।' ଯେତେବେଳେ କି, ଅନ୍ୟ ଜଣେ ଲେଖିଛନ୍ତି- 'ରାଜା କୋହଲିଙ୍କ ପାଗଳାମୀ ସୀମା ଜାଣେ ନାହିଁ ।'