କେନ୍ଦ୍ରାପଡା: ସରକାରୀ ଦପ୍ତରରୁ ଅନୁମତି ନନେଇ ବିଜେଡି ନେତା ଭି କେ ପାଣ୍ଡିଆନ ସ୍କୁଲ ପଡିଆରେ ବିଶାଳ ଜନସଭା କରିଥିବା ଅଭିଯୋଗ । ପ୍ରଦେଶ କଂଗ୍ରେସ କମିଟି ପ୍ରଚାର କମିଟି ସଦସ୍ୟ ତଥା ଆଇନଜୀବୀ ବିଧୁଭୂଷଣ ମହାପାତ୍ର ଏଭଳି ସାଂଘାତିକ ଅଭିଯୋଗ ଆଣିବା ସହ ତଦନ୍ତ ଦାବି କରିଛନ୍ତି । ଅଭିଯୋଗ ଅନୁଯାୟୀ, ଗତ ୨୦ ତାରିଖ ଦିନ ଅପରାହ୍ନରେ କେନ୍ଦ୍ରାପଡା ଜିଲ୍ଲା ଅନ୍ତର୍ଗତ ପାଟକୁରା ନିର୍ବାଚନ ମଣ୍ଡଳୀ ସ୍ତରୀୟ ଏକ ବିରାଟ ସାଧାରଣ ସଭା ଡେରାବିଶ୍ ଥାନା ଅନ୍ତର୍ଗତ ଡେରାବିଶ୍ ହାଇସ୍କୁଲ ପଡ଼ିଆରେ ଅନୁଷ୍ଠିତ ହୋଇଥିଲା । ତେବେ ନିର୍ବାଚନ କମିଶନଙ୍କ ଗାଇଡଲାଇନ ଏବଂ SOPକୁ ଏଠାରେ ଅନୁପାଳନ କରାଯାଇନଥିବା ଅଭିଯୋଗ ହୋଇଛି ।
ନିର୍ବାଚନ କମିଶନଙ୍କ ନିର୍ଦ୍ଦେଶ ଅନୁଯାୟୀ, କୌଣସି ରାଜନୈତିକ ଦଳ କିଛି କାର୍ଯ୍ୟକ୍ରମ କିମ୍ବା ଜନସଭା କରିବା ପୂର୍ବରୁ ପ୍ରଥମେ Single Window ବ୍ୟବସ୍ଥାରେ ଅନଲାଇନ ଆବେଦନ କରିବାକୁ ହୋଇଥାଏ । ତେବେ ପାଣ୍ଡିଆନଙ୍କ କାର୍ଯ୍ୟକ୍ରମ ପୂର୍ବରୁ କୌଣସି ଅନଲାଇନ ଆବେଦନ କରାଯାଇନଥିବା ଅଭିଯୋଗ କରିଛନ୍ତି ପ୍ରଦେଶ କଂଗ୍ରେସ କମିଟି ପ୍ରଚାର କମିଟି ସଦସ୍ୟ । ସେହିପରି କୌଣସି ସରକାରୀ ବିଦ୍ୟାଳୟର ଖେଳ ପଡ଼ିଆକୁ ରାଜନୈତିକ ଉଦ୍ଦେଶ୍ୟରେ ବ୍ୟବହାର କରାଯାଇ ପାରିବ ନାହିଁ ବୋଲି ନିର୍ଦ୍ଦେଶ ରହିଛି । ହେଲେ ଏହାକୁ ଉଲ୍ଲଘଂନ କରି ବିଦ୍ୟାଳୟ ପ୍ରଧାନ ଶିକ୍ଷୟିତ୍ରୀଙ୍କୁ ଧମକ ଚମକ ଦେଇ ସେଠାରେ ବିଜେଡି କାର୍ଯ୍ୟକ୍ରମ କରିଥିବା ଅଭିଯୋଗ ହୋଇଛି । ସଭାମଞ୍ଚରେ ପାଟକୁରା ବିଜେଡି ବିଧାୟକ ପ୍ରାର୍ଥୀ ଅରବିନ୍ଦ ମହାପାତ୍ର ଏବଂ ଲୋକସଭା ସାଂସଦ ପ୍ରାର୍ଥୀ ଅଂଶୁମାନ ମହାନ୍ତି ପାଣ୍ଡିଆନଙ୍କ ସହ ଉପସ୍ଥିତ ରହିଥିଲେ ଯାହାକି ନିର୍ବାଚନୀ ଆଦର୍ଶ ଆଚରଣ ବିଧିର ଖୋଲାଖୋଲି ଉଲ୍ଲଘଂନ ବୋଲି ଅଭିଯୋଗ କରିଛନ୍ତି ବିଧୁଭୂଷଣ ।