ଭୁବନେଶ୍ବର:କଂଗ୍ରେସରେ ସନ୍ତୋଷ ଜେନାଙ୍କ ମିଶ୍ରଣକୁ ବିରୋଧ । କିଛିଦିନ ତଳେ ବିଜେପିରେ ସନ୍ତୋଷ ଜେନା ସାମିଲ ହୋଇଥିଲେ । ସୋମବାର ସୁର ରାଉତରାୟଙ୍କ ପୁଅ ସିଦ୍ଧାର୍ଥ ରାଉତରାୟଙ୍କ ନେତୃତ୍ୱରେ ସେ କଂଗ୍ରେସରେ ମିଶିବାକୁ ଆସିଥିଲେ । ଯାହାକୁ ନେଇ କଂଗ୍ରେସ ଭବନରେ ହଟ୍ଟଗୋଳ ଓ ହଲ୍ଲାବୋଲ କରିଛନ୍ତି ସୁର ରାଉତରାୟଙ୍କ ପୁତୁରା ସଂଗ୍ରାମ ରାଉତରାୟ ଓ ତାଙ୍କ ସମର୍ଥକ । ସଂଗ୍ରାମ ବହୁ ବର୍ଷ ଧରି କଂଗ୍ରେସ ଦଳ ସହ ରହିଆସିଛନ୍ତି । ଆଉ କଂଗ୍ରେସର ଆଶାୟୀ ଭାବେ ମଧ୍ୟ ଟିକେଟ ରେସରେ ଅଛନ୍ତି । ଏବେ କାହିଁକି ବାହାର ଲୋକଙ୍କୁ ଟିକେଟ ମିଳିବ ବୋଲି ଅଭିଯୋଗ କରି ସଂଗ୍ରାମ ଓ ତାଙ୍କ ସମର୍ଥକ ବିରୋଧ କରିଛନ୍ତି । ଯଦି ଟିକେଟ ମିଳିବ ତ ସଂଗ୍ରାମଙ୍କୁ ମିଳୁ ବୋଲି କହି ସେମାନେ ହୋହଲ୍ଲା କରିଥିବା ଜଣାପଡ଼ିଛି ।
"ଏଥର ଯଦି ଦାଦା ଅର୍ଥାତ ସୁରେଶ ରାଉତରାୟ ନିର୍ବାଚନ ଲଢୁନାହାନ୍ତି ତେବେ ମତେ କାହିଁକି ଦିଆଯିବ ନାହିଁ" ବୋଲି ପ୍ରଶ୍ନ କରିଛନ୍ତି ସଂଗ୍ରାମ ରାଉତରାୟ । କାରଣ ପୂର୍ବ ଥର ଦାଦାଙ୍କ ପାଇଁ ହିଁ ସେ ଏହି ଆସନକୁ ତ୍ୟାଗ କରିଥିଲେ । ତେଣୁ ଏଥର ଟିକେଟ ତାଙ୍କୁ ମିଳିବ ବା ସେ ଟିକେଟ ପାଇଁ ଯୋଗ୍ୟ ବୋଲି ନିଜକୁ ପ୍ରତିପାଦିତ କରିଛନ୍ତି । କିନ୍ତୁ ତାହା ନହୋଇ ଜଟଣୀ କଂଗ୍ରେସକୁ ସୁରେଶ ରାଉତରାୟ ଓ ତାଙ୍କ ପରିବାର ମିଳିମିଶି ନଷ୍ଟ କରିଦେଇଛନ୍ତି ବୋଲି ମଧ୍ୟ ଅଭିଯୋଗ କରିଛନ୍ତି ସଂଗ୍ରାମ । ଏପରିକି ସଂଗ୍ରାମଙ୍କ ବ୍ୟତୀତ ଆଉ କାହାକୁ ଟିକେଟ ମିଳିଲେ ଜଟଣୀରେ ବ୍ୟାପକ ବିରୋଧ ହେବ ବୋଲି ମଧ୍ୟ ସେ ଚେତାବନୀ ଦେଇଛନ୍ତି ।