ଭୁବନେଶ୍ବର: ଦିଲ୍ଲୀରେ ନୀତି ଆୟୋଗ ବୈଠକରେ ଯୋଗଦେଇଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ନୀତି ଆୟୋଗ ବୈଠକରେ ମୁଖ୍ୟମନ୍ତ୍ରୀ ରାଜ୍ୟର ସ୍ବାର୍ଥ କଥା ଉଠାଇଲେ ନାହିଁ ବୋଲି ବରିଷ୍ଠ କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତି ଅଭିଯୋଗ କରିଛନ୍ତି । କେନ୍ଦ୍ରୀୟ ବଜେଟରେ ବିଭିନ୍ନ ରାଜ୍ୟକୁ ବିପୁଳ ଆର୍ଥିକ ଅନୁଦାନ ଅଜାଡ଼ିଦେଲେ ମୋଦି ହେଲେ ନୀତି ଆୟୋଗ ବୈଠକରେ ଯୋଗଦେଇ ଓଡ଼ିଶା ପାଇଁ ସ୍ପେସିଆଲ ଆର୍ଥିକ ଅନୁଦାନ ମାଗିଲେ ନାହିଁ ମୁଖ୍ୟମନ୍ତ୍ରୀ ବୋଲି ଅଭିଯୋଗ ଆଣି ସରକାରଙ୍କୁ ଟାର୍ଗେଟ କରିଛନ୍ତି ତାରା ।
ବିଧାୟକ ତାରା ପ୍ରସାଦ ବାହିନୀପତି କହିଛନ୍ତି, "ନୀତି ଆୟୋଗ ବୈଠକରେ ସ୍ବତନ୍ତ୍ର ପାହ୍ୟା କି ସ୍ବତନ୍ତ୍ର ପ୍ୟାକେଜ କଥା ଉଠାଇଲେ ନାହିଁ । କେନ୍ଦ୍ର ସରକାରଙ୍କ ଆଗରେ ନବୀନ ପଟ୍ଟନାୟକ ସରକାର କେବେ ହେଲେ ସ୍ପେଶାଲ ସ୍ଟାଟସ କଥା ଉଠାଇନାହାନ୍ତି । କେନ୍ଦ୍ରରେ କଂଗ୍ରେସ ସରକାର ସମୟରେ ବିଜେଡି ସରକାର ମାଗୁଥିଲା ଏବେ ଆଉ ମାଗୁନାହାନ୍ତି । ନୀତି ଆୟୋଗ ବୈଠକରେ ରାଜ୍ୟ ସରକାର ରାଜ୍ୟର ହିତରେ ସ୍ବତନ୍ତ୍ର ପ୍ୟାକେଜ ମଧ୍ୟ ମାଗିଲେ ନାହିଁ । ଆନ୍ଧ୍ରପ୍ରଦେଶ ଏବଂ ବିହାରକୁ ସ୍ବତନ୍ତ୍ର ପ୍ୟାକେଜ ଦିଆଗଲା । କିନ୍ତୁ ଓଡ଼ିଶାକୁ ଦିଆଗଲା ନାହିଁ ।"
'ହାୱା ସରକାର, କଥା କହୁଛନ୍ତି କାମ ନାହିଁ'
ତାରା ଆହୁରି କହିଛନ୍ତି, "ବିଜେପି ସରକାର କେବିକେ ଯୋଜନାକୁ କାଟିଦେଇଛନ୍ତି । ସରକାର 8ଟି ଯୋଜନାକୁ କାଟିଦେଇଛନ୍ତି । ସେହିଭଳି ରେଳ ବଜେଟ ମଧ୍ୟ ଆଖି ଦୃଶିଆ ରାଜ୍ୟ ପାଇଁ ହୋଇନାହିଁ । ରେଳ ମନ୍ତ୍ରୀଙ୍କୁ ଓଡ଼ିଶା ନେତା ହିଁ ରାଜ୍ୟସଭାକୁ ପଠେଇଛନ୍ତି । ଏହା ହିଁ ଆମ ପାଇଁ ଦୁର୍ଭାଗ୍ୟ । KBK, BRGF, ଆଦିବାସୀ ବିକାଶ ଯୋଜନା କାଟି ଦେଇଛନ୍ତି । ଅନ୍ୟ ନାଁରେ ଵି ନାହିଁ । ଆଦିବାସୀ ମୁଖ୍ୟମନ୍ତ୍ରୀ ଆଦିବାସୀଙ୍କ KBK କଥା ଉଠାଇ ନାହାନ୍ତି । ହାୱା ସରକାର । କଥା କହୁଛନ୍ତି କାମ ନାହିଁ ।" ସେହିପରି ରତ୍ନ ଭଣ୍ଡାରରେ ରାଜନୀତି ନ ହେଉ । ଜଷ୍ଟିସ ରଥଙ୍କ ବାପା ଓ ସେ ନିଜେ ଜଗନ୍ନାଥ ଭକ୍ତ । ତାଙ୍କ ନିଷ୍ପତ୍ତିକୁ ମାନନ୍ତୁ ରାଜ୍ୟ ସରକାର । ଆମେ ସମର୍ଥନ କରିବୁ ବୋଲି କହିଛନ୍ତି ତାରା ।