Health Benefits Of Honey: ମହୁ ଆମର ସ୍ବାସ୍ଥ୍ୟ ପାଇଁ ଖୁବ୍ ଲାଭଦାୟକ । ବିଶେଷଜ୍ଞଙ୍କ କହିବା କଥା, ଶୀତ ଦିନେ ନିୟମିତ ମହୁ ପିଇଲେ ଅନେକ ସ୍ବାସ୍ଥ୍ୟଗତ ଲାଭ ମିଳିଥାଏ । ଏହା ଋତୁକାଳୀନ ରୋଗ ପାଇଁ ଏକ ଭଲ ପ୍ରତିକାର ଭାବେ କାର୍ଯ୍ୟ କରେ । ଏଥିର ଥିବା ଔଷଧୀୟ ଗୁଣ ଓ ପୋଷକତତ୍ତ୍ବ ଥଣ୍ଡା, କାଶ ସମେତ ବିଭିନ୍ନ ରୋଗରୁ ରକ୍ଷା କରିବାରେ ସାହାଯ୍ୟ କରେ । ଖାସ୍ କରି ଶୀତ ଦିନରେ । ସାଧାରଣତଃ ଶୀତ ଦିନେ ଅନେକ ଲୋକଙ୍କୁ ଥଣ୍ଡା କାଶ ଆଦି ହୋଇଥାଏ । ଏମିତିରେ ପ୍ରତିଦିନ ମହୁ ଖାଇବା ଭଲ । ଏହି ଖବରରେ ଜାଣନ୍ତୁ ନିୟମିତ ମହୁ ଖାଇଲେ ଶରୀରକୁ କେମିତି ଫାଇଦା ମିଳେ ।
ମହୁ ଖାଇବାର ଫାଇଦା:
ମହୁ ଔଷଧୀୟ ଗୁଣରେ ଭରପୂର । ଏଥିରେ ମ୍ୟାଗ୍ନେସିୟମ, ଆଇରନ ଓ କ୍ୟାଲସିୟମ ଭଳି ଖଣିଜସାର ମିଳେ । ଯାହା ସଂକ୍ରାମକ ରୋଗ ସହ ଲଢିବାରେ ଶରୀରକୁ ଶକ୍ତି ଯୋଗାଏ । ରୋଗ ପ୍ରତିରୋଧକ କ୍ଷମତା ବୃଦ୍ଧି କରେ ।
ଶୀତ ଦିନେ ମହୁ ପିଇଲେ ଥଣ୍ଡା, କାଶ ଭଳି ସମସ୍ୟାରୁ ମୁକ୍ତି ମିଳେ । ନିୟମିତ ମହୁ ସେବନ ଦ୍ବାରା ଓଜନ ନିୟନ୍ତ୍ରଣ ରହେ । ରୋଗ ପ୍ରତିରୋଧକ କ୍ଷମତା ବଢେ ।
ବଦହଜମୀ ଓ କୋଷ୍ଠକାଠିନ୍ୟ ଭଳି ପେଟ ସମସ୍ୟା ଦୂର ହୋଇଯାଏ । ଏଥିସହ ରକ୍ତରେ ହିମଗ୍ଲୋବିନ ବୃଦ୍ଧି ପାଏ । ମହୁ ହୃଦରୋଗ, ତ୍ବଚା ଓ ଦାନ୍ତ ସମ୍ବନ୍ଧୀୟ ସମସ୍ୟାରୁ ମଧ୍ୟ ରକ୍ଷା କରେ ।
କେମିତି ମହୁ ସେବନ କରିବେ ?
ଉଷୁମ ପାଣିରେ ଅଳ୍ପ ମହୁ ଓ ଲେମ୍ବୁ ରସ ମିଶାଇ ପିଇଲେ ଶ୍ବାସ ସମ୍ବନ୍ଧୀୟ ସମସ୍ୟା ଦୂର ହୋଇଯାଏ । ଏକ ଚାମଚ ମହୁ ଓ ଏକ ଚାମଚ ଲବଙ୍ଗ ପାଉଡର ସେବନ କରିବା ସ୍ବାସ୍ଥ୍ୟ ପାଇଁ ଖୁବ୍ ଲାଭଦାୟକ ।ଏଥିରେ ଥିବା ଆଣ୍ଟିଭାଇରାଲ ଓ ଆଣ୍ଟିଅକ୍ସିଡାଣ୍ଟ ଗୁଣ ରୋଗ ସହ ଲଢିବାକୁ ଶରୀରରେ ଶକ୍ତି ବଢାଇଥାଏ । ଥଣ୍ଡା, କାଶ, ଗଳା ଖସଖସ ପ୍ରଭୃତି ସମସ୍ୟାରୁ ଆରାମ ଦିଏ ।
ହର୍ବାଲ ଚା'ରେ ମହୁ ମିଶାଇ ପିଇବା ଦ୍ବାରା ମାନସିକ ସ୍ବାସ୍ଥ୍ୟ ସମସ୍ୟା ହ୍ରାସ ପାଏ । ଶରୀରରେ ଜମା ବର୍ଜ୍ୟ ବାହାର କରେ । ହୃଦୟ ସ୍ବାସ୍ଥ୍ୟରେ ସୁଧାର ଆଣେ ।
କୋଷ୍ଠକାଠିନ୍ୟ ଓ ପେଟ ସହ ଜଡିତ ସମସ୍ୟା ଦୂର କରିବାରେ ମହୁ ଭାରି ଉପଯୋଗୀ । ରାତିରେ 1 ଗ୍ଲାସ ପାଣିରେ ଏକ ଚାମଚ ମହୁ ମିଶାଇ ପିଇଲେ ବଦହଜମୀ ଓ କୋଷ୍ଠକାଠିନ୍ୟ ଭଳି ସମସ୍ୟା କମି ଯାଇଥାଏ । ଦୁଇ ଚାମଚ ଆପଲ ସାଇଡର ଭିନେଗାର ଓ ଏକ ଚାମଚ ମହୁ ମିଶାଇ ପିଇଲେ ସାଇନସ ସମସ୍ୟା ଦୂର ହୁଏ ।
ଏକ ଚାମଚ ମହୁରେ ଅଧା ଚାମଚ ଡାଲଚିନି ପାଉଡର ଓ ଅଧା ଚାମଚ ଅଦା ରସ ମିଶାଇ ସକାଳେ ପିଅନ୍ତୁ । ଏହା ଶରୀରର ଚର୍ବି ତରଳାଇ ଦିଏ । ଶୀତ ଦିନରେ ନିୟମିତ ମହୁ ସେବନ କରିବା ଫଳରେ ରାତିରେ ଭଲ ନିଦ ହେବା ସହ ମାନସିକ ଚାପ ହ୍ରାସ ପାଏ ।
(Disclaimer- ଏଠାରେ ଦିଆଯାଇଥିବା ସୂଚନା କେବଳ ଆପଣଙ୍କ ଜାଣିବା ପାଇଁ । ଏହା ଉପରେ ବିଚାର କରିବା ପୂର୍ବରୁ ଡାକ୍ତରଙ୍କ ପରାମର୍ଶ ନେବା ଭଲ ।)
