ହାଇଦ୍ରାବାଦ:ନିକଟରେ ମେଦବହୁଳତା ସମ୍ବନ୍ଧୀୟ କିଛି ବିଚଳିତ ପରିସଂଖ୍ୟାନ ସାମ୍ନାକୁ ଆସିଛି । ଭାରତରେ ବୃଦ୍ଧି ପାଉଥିବା ମେଦବହୁଳତା ଏକ ଚିନ୍ତାର ବିଷୟ ପାଲଟିଛି । ଦ ଲାନସେଟ ଜର୍ଣ୍ଣାଲରେ ପ୍ରକାଶିତ ଏକ ରିପୋର୍ଟ ଅନୁଯାୟୀ, ଭାରତରେ ପ୍ରାୟ ୪.୪ କୋଟି ମହିଳା ମୋଟାପଣରେ ପୀଡିତ । ମେଦବହୁଳତା ସମସ୍ୟା ପୁରୁଷଙ୍କ ଅପେକ୍ଷା ମହିଳାମାନଙ୍କଠାରେ ଅଧିକ ଦେଖାଯାଏ । ମହିଳାମାନଙ୍କ କ୍ଷେତ୍ରରେ ମେଦବହୁଳତା ଅନେକ ଗମ୍ଭୀର ସମସ୍ୟାର କାରଣ ହୋଇଯାଏ, ଯେଉଁଥିରେ ପ୍ରଜନନ ସମ୍ବନ୍ଧୀୟ ଜଟିଳତା ମଧ୍ୟ ଅନ୍ତର୍ଭୁକ୍ତ । ସ୍ୱାସ୍ଥ୍ୟ ବିଶେଷଜ୍ଞଙ୍କ କହିବା ଅନୁସାରେ, ମେଦବହୁଳତା କେବଳ ହୃଦରୋଗ ଏବଂ ମଧୁମେହ ଭଳି ରୋଗ ସୃଷ୍ଟି କରେ ନାହିଁ, ବରଂ ମହିଳାମାନଙ୍କର ପ୍ରଜନନ ସ୍ୱାସ୍ଥ୍ୟ ଉପରେ ମୋଟାପଣର ଗଭୀର ପ୍ରଭାବ ପଡିଥାଏ । ଫଳରେ ଜଣେ ମହିଳା ବାଞ୍ଝପଣର ଶିକାର ହୋଇପାରେ ।
ବାଞ୍ଝପଣ କ'ଣ?
ବିଶ୍ୱ ସ୍ୱାସ୍ଥ୍ୟ ସଂଗଠନ ଅନୁଯାୟୀ, ବାଞ୍ଝପଣ ହେଉଛି ପ୍ରଜନନ ପ୍ରଣାଳୀର ଏକ ରୋଗ, ଯେଉଁଥିରେ ୧୨ ମାସ କିମ୍ବା ଅଧିକ ସମୟ ପର୍ଯ୍ୟନ୍ତ ଯୌନ ସମ୍ପର୍କ ରଖିବା ପରେ ବି ଜଣେ ମହିଳା ଗର୍ଭବତୀ ହେବାରେ ଅସମର୍ଥ ହୋଇଥାଏ । ଏହାକୁ ବାଞ୍ଝପଣ ବା ନିଃସନ୍ତାନ ବା ବନ୍ଧ୍ୟାକରଣ ବୋଲି ମଧ୍ୟ କୁହାଯାଏ ।
ବାଞ୍ଝପଣ ଉପରେ ମେଦବହୁଳତା କ'ଣ ପ୍ରଭାବ ପକାଇପାରେ?
ସ୍ୱାସ୍ଥ୍ୟ ବିଶେଷଜ୍ଞଙ୍କ ଅନୁସାରେ, ମୋଟାପଣ ମହିଳାମାନଙ୍କଠାରେ ହରମୋନାଲ ଅସନ୍ତୁଳନ ସୃଷ୍ଟି କରିପାରେ, ଯାହା ପ୍ରଜନନ ସମସ୍ୟା ସୃଷ୍ଟି କରିପାରେ । ହରମୋନରେ ପରିବର୍ତ୍ତନ ଅନିୟମିତ ଋତୁସ୍ରାବ, ପିସିଓଏସ, ଓଭାରିନ୍ ଡିସଫେଙ୍କସନ୍ ଭଳି ସମସ୍ୟା ସୃଷ୍ଟି କରିପାରେ, ଯେଉଁ କାରଣରୁ ଗର୍ଭଧାରଣରେ ଅସୁବିଧା ହୋଇପାରେ ଏବଂ ବେଳେବେଳେ ଜଣେ ବାଞ୍ଝପଣର ଶିକାର ହୋଇପାରେ ।
ମୋଟାପଣ ଥିବା ମହିଳାମାନଙ୍କରେ ପିସିଓଏସର ସମସ୍ୟା ଅଧିକ ଦେଖାଯାଏ । ପିସିଓଏସ କାରଣରୁ ମାସିକ ଋତୁସ୍ରାବରେ ଅନିୟମିତତା, ହରମୋନ୍ ଅସନ୍ତୁଳନ, ଓଭାରିନ୍ ସିଷ୍ଟ ଇତ୍ୟାଦି ସମସ୍ୟା ମଧ୍ୟ ସୃଷ୍ଟି ହୋଇପାରେ । ଏଥିସହ ଏହି କାରଣରୁ ବନ୍ଧ୍ୟାକରଣ ସମସ୍ୟା ଅଧିକ ଗମ୍ଭୀର ହୋଇଯାଏ । ହରମୋନାଲ ଅସନ୍ତୁଳନ କେବଳ ପ୍ରଜନନ ସମସ୍ୟା ନୁହେଁ ଥାଇରଏଡ ଏବଂ ଡାଇବେଟିସ ଭଳି ରୋଗ ମଧ୍ୟ ସୃଷ୍ଟି କରିଥାଏ ।
- ART ଚିକିତ୍ସା ପ୍ରଭାବହୀନ ହୋଇପାରେ
ମେଦବହୁଳତା ହେତୁ ଅନେକ ମହିଳାମାନଙ୍କରେ ଇନ୍ ଭିଟ୍ରୋ ଫର୍ଟିଲାଇଜେସନ୍ (ଆଇଭିଏଫ୍) ଭଳି ଆସିଷ୍ଟଡ୍ ପ୍ରଜନନ ପ୍ରଯୁକ୍ତିବିଦ୍ୟା (Assisted Reproductive Technology (ART) ଚିକିତ୍ସାର ସଫଳତାର ସମ୍ଭାବନା ଯଥେଷ୍ଟ କମ ହୋଇଯାଇଥାଏ । କେବଳ ଏତିକି ନୁହେଁ, ପ୍ରଜନନ ସ୍ୱାସ୍ଥ୍ୟ ସହ ଜଡିତ ସମସ୍ୟା ବ୍ୟତୀତ ସ୍ତନ କର୍କଟ, ଓଭାରି କ୍ୟାନ୍ସର ଏବଂ ଏଣ୍ଡୋମେଟ୍ରିଆଲ୍ କର୍କଟ ଭଳି ସ୍ତ୍ରୀ ରୋଗର ଆଶଙ୍କା ଯଥେଷ୍ଟ ବୃଦ୍ଧି ପାଇଥାଏ । ପୂର୍ବରୁ ହୋଇଥିବା ଏକ ଅଧ୍ୟୟନରେ ମଧ୍ୟ ଜଣାପଡିଥିଲା ଯେ ମହିଳାମାନଙ୍କର ଅଣ୍ଟା ଆକାର ସେମାନଙ୍କର ପ୍ରଜନନ ସ୍ୱାସ୍ଥ୍ୟ ଉପରେ ପ୍ରଭାବ ପକାଇଥାଏ ।
ଏହା ମଧ୍ୟ ପଢନ୍ତୁ:ଗର୍ଭାବସ୍ଥାରେ ମେଦ ଉଭୟ ମାଆ-ଛୁଆ ପାଇଁ ବିପଦ
ତେଣୁ, ମୋଟାପଣର ସମସ୍ୟାକୁ ରୋକିବା ଜରୁରୀ ଅଟେ । ଯଦି ଆପଣଙ୍କ ଅଧିକ ଓଜନ ରହିଛି ଏବଂ ଆପଣ ଗର୍ଭଧାରଣ ଯୋଜନା କରୁଛନ୍ତି, ତେବେ ଡାକ୍ତରଙ୍କ ସହିତ ପରାମର୍ଶ କରନ୍ତୁ ଏବଂ ଓଜନ ହ୍ରାସ କରିବାକୁ ଚେଷ୍ଟା କରନ୍ତୁ । ଏହା କେବଳ ପ୍ରଜନନ ସମ୍ବନ୍ଧୀୟ ସମସ୍ୟା ଦୂର କରିବାରେ ସାହାଯ୍ୟ କରିପାରିବ ନାହିଁ ବରଂ ଅନ୍ୟାନ୍ୟ ସ୍ୱାସ୍ଥ୍ୟ ସମ୍ବନ୍ଧୀୟ ସମସ୍ୟାକୁ ମଧ୍ୟ ରୋକିପାରେ ।
(ବିଦ୍ର: ଏହା ଇଟିଭି ଭାରତର ନିଜସ୍ବ ମତ ନୁହେଁ । ଏକା ଏକ ରିପୋର୍ଟ ଆଧାରିତ ଖବର ଅଟେ । ଯଦି କୌଣସି ଆଶଙ୍କା ରହିଛି ତାହେଲେ ସ୍ବାସ୍ଥ୍ୟ ବିଶେଷଜ୍ଞଙ୍କ ପରାମର୍ଶ ନେବା ଆବଶ୍ୟକ ।)
