ବାଜିଲା ସାହାନାଇ, 2024ରେ ପାଇଲେ ଜୀବନସାଥୀ

ସରି ସରି ଯାଉଛି 2024 । ଏହି ବିଦାୟୀ ବର୍ଷ ଅନେକ ତାରକାଙ୍କ ଏହି ବର୍ଷ ଖାସ୍ ରହିଛି । ସେମାନେ ନିଜ ଜୀବନସାଥୀ ପାଇଛନ୍ତି । 2024ରେ କେଉଁ ତାରକାଙ୍କ ହାତଗଣ୍ଠି ପଡିଛି?ଜାଣନ୍ତୁ,

ହାଇଦ୍ରାବାଦ:ପ୍ରତିବର୍ଷ ପରି, ଏହି ବର୍ଷ 2024 ମଧ୍ୟ ଶେଷ ହେବାକୁ ଯାଉଛି । ଏହି ବର୍ଷର ଶେଷ ମାସ ଅର୍ଥାତ୍ ଡିସେମ୍ବର ମାସର 17 ଦିନ ବିତିଗଲାଣି ବର୍ତ୍ତମାନ ଆଉ କିଛି ଦିନ ବାକି ଅଛି । ବିଦାୟ ନେବ 2024 । ବର୍ଷ ସିନା ସରି ସରି ଯାଉଛି, ହେଲେ ଅନେକଙ୍କ ପାଇଁ ଏହି ବର୍ଷ ସତନ୍ତ୍ର ରହିଛି । ସାଧାରଣ ଲୋକଙ୍କ ଠାରୁ ଆରମ୍ଭ କରି ଅନେକ ସେଲିବ୍ରିଟି... ସେ ଓଲିଉଡର ହୁଅନ୍ତୁ କିମ୍ୱା ବଲିଉଡର କିମ୍ୱା ସାଉଥର ସେଲିବ୍ରିଟି । ଏମାନେ ବିଦାୟୀ ବର୍ଷରେ ଜୀବନ ସାଥୀ ପାଇ ନିଜ ଜୀବନର ନୂଆ ଅଧ୍ୟାୟ ଆରମ୍ଭ କରିଛନ୍ତି । ଓଲିଉଡ ଅଭିନେତା ମନୋଜ ମିଶ୍ରଙ୍କ ଠାରୁ ଆରମ୍ଭ କରି ଏଲିନା ସାମନ୍ତରାୟ, ବଲିଉଡର ରକୁଲ ପ୍ରୀତ ସିଂ ଠାରୁ ଆରମ୍ଭ କରି ସୋନାକ୍ଷୀ ସିହ୍ନା, ସାଉଥର ନାଗା ଚୈତନ୍ୟଙ୍କ ଠାରୁ କୀର୍ତ୍ତି ସୁରେଶ ଯାଏଁ ତାରକା ଏହି ବିଦାୟୀ ବର୍ଷରେ ହାତକୁ ଦି'ହାତ ହୋଇଛନ୍ତି । ପରିବାରଙ୍କ ସହମତିରେ ଧୁମଧାମରେ କରିଛନ୍ତି ବିବାହ । ନଜର ପକାନ୍ତୁ ଏହି ଯୋଡ଼ିଙ୍କ ଉପରେ...

2024ରେ ଏହି ଓଲିଉଡ ସେଲିବ୍ରିଟିଙ୍କ ବିବାହ:-

1. ତମନ୍ନା ବ୍ୟାସ-ସିଦ୍ଧାର୍ଥ ଅଗ୍ରୱାଲ

ବିଦାୟୀ ବର୍ଷ ପ୍ରାରମ୍ଭରେ ଓଲିଉଡ ଅଭିନେତ୍ରୀ ତମନ୍ନା ବ୍ୟାସଙ୍କ ବିବାହ କରି ଫ୍ୟାନ୍ସଙ୍କୁ ସରପ୍ରାଇଜ ଦେଇଥିଲେ । ଜାନୁଆରୀ ୧୬ରେ ତମନ୍ନା ପ୍ରସିଦ୍ଧ ଓଡ଼ିଆ ଚଳଚ୍ଚିତ୍ର ନିର୍ମାତା ସୀତାରାମ ଅଗ୍ରୱାଲ ଏବଂ ପ୍ରସିଦ୍ଧ କଣ୍ଠଶିଳ୍ପୀ ନମିତା ଅଗ୍ରୱାଲଙ୍କ ପୁଅ ସିଦ୍ଧାର୍ଥ ଅଗ୍ରୱାଲଙ୍କୁ ଜୀବନସାଥୀ କରିଛନ୍ତି । ପରିବାର, ସମ୍ପର୍କୀୟ ଓ ସାଙ୍ଗସାଥୀଙ୍କ ଉପସ୍ଥିତିରେ ଉଭୟ ଧୁମଧାମରେ ବିବାହ କରିଥିଲେ ।

2. ମନୋଜ ମିଶ୍ର-ମମତା ନନ୍ଦ

ସେହିପରି ଚଳିତ ବର୍ଷ ଓଲିଉଡ ଅଭିନେତା ମନୋଜ ମିଶ୍ର ନିଜ ଦ୍ୱିତୀୟ ବିବାହ କରି ଫ୍ୟାନ୍ସଙ୍କୁ ଚକିତ କରିଥିଲେ । ଦୀର୍ଘ ଦିନର ଡେଟିଂ ପରେ ମନୋଜ ପ୍ରେମିକା ତଥା ଅଭିନେତ୍ରୀ ମମତା ନନ୍ଦଙ୍କୁ ବିବାହ କରିଛନ୍ତି । ସେପ୍ଟେମ୍ୱର 4ରେ ସୋସିଆଲ ମିଡିଆରେ ଉଭୟ ବିବାହ ଖବର ଦେଇ ସମସ୍ତଙ୍କୁ ସରପ୍ରାଇଜ କରିଥିଲେ । ଅଭିନେତା ମନୋଜ ମିଶ୍ର ପୂର୍ବରୁ ମାନା ମିଶ୍ରଙ୍କୁ ବିବାହ କରିଥିଲେ । ପରେ ପାରିବାରିକ ବିବାଦ କାରଣରୁ ଉଭୟଙ୍କ ଛାଡ଼ପତ୍ର ହୋଇଥିଲା । ମାନା ଏବଂ ମନୋଜଙ୍କର ଏକ ଝିଅ ମଧ୍ୟ ରହିଛନ୍ତି । ଛାଡପତ୍ର ପରେ ମନୋଜ ମିଶ୍ର ଅଭିନେତ୍ରୀ ମମତା ନନ୍ଦଙ୍କ ପ୍ରେମରେ ପଡିଥିଲେ । ପରସ୍ପରକୁ ଡେଟ୍ କରିବା ପରେ ଉଭୟ ବିବାହ କରିଥିଲେ ।

3. ଏଲିନା ସାମନ୍ତରାୟ-ଅନୁରାଗ ପଣ୍ଡା

ଚଳିତ ବର୍ଷ ଏଲିନା ସାମନ୍ତରାୟ ମଧ୍ୟ ନିଜ ଜୀବନସାଥୀ ପାଇଛନ୍ତି । ବୟଫ୍ରେଣ୍ଡକୁ ସାତଜନ୍ମର ସାଥୀ କରିଛନ୍ତି ଏଲିନା । ଦୀର୍ଘ 5 ବର୍ଷ ଡେଟିଂ ପରେ ବୟଫ୍ରେଣ୍ଡ ଅନୁରାଗ ପଣ୍ଡାଙ୍କୁ ବିବାହ କରିଛନ୍ତି ଏଲିନା । ସୋସିଆଲ ମିଡିଆରେ ଫଟୋ ସେୟାର କରି ଏଲିନା ସମସ୍ତଙ୍କୁ ସରପ୍ରାଇଜ ଦେଇଥିଲେ । ନଭେମ୍ୱର 17ରେ ଇଣ୍ଡୋନେସିଆର ବାଲିରେ ପରିବାର, ସମ୍ପର୍କୀୟଙ୍କ ଉପସ୍ଥିତିରେ ସିକ୍ରେଟ ବିବାହ କରିଥିଲେ ଏହି ଦମ୍ପତି ।

2024ରେ ଏହି ବଲିଉଡ ସେଲିବ୍ରିଟିଙ୍କ ବିବାହ:-

4. ରକୁଲ ପ୍ରୀତ ସିଂ-ଜ୍ୟାକି ଭଗ୍ନାନୀ

ଦୀର୍ଘ ବର୍ଷ ଡେଟିଂ ପରେ ଏବେ ହାତକୁ ଦି'ହାତ ହୋଇଛନ୍ତି ବଲିଉଡର ଲୋକପ୍ରିୟ ତାରକା ରକୁଲ ପ୍ରୀତ ସିଂ ଏବଂ ଜ୍ୟାକି ଭଗ୍ନାନୀ । ଉଭୟ ଗୋଆରେ ଧୁମଧାମରେ ରାଜକୀୟ ଅନ୍ଦାଜରେ ବିବାହ କରିଥିଲେ । ୨୦୨୧ ମସିହାରେ ଜ୍ୟାକି ଅଭିନେତ୍ରୀଙ୍କୁ ପ୍ରୋପୋଜ କରିଥିଲେ । ପରେ ଉଭୟ ଡେଟିଂ କରିବା ପରେ 2024, ଫେବୃଆରୀ 21ରେ ଉଭୟ ସାତ ଜନ୍ମର ସାଥୀ ହୋଇଥିଲେ । ରକୁଲ ଏବଂ ଜ୍ୟାକି ଆନନ୍ଦ କାରଜ(ଶିଖ) ଏବଂ ସିନ୍ଧି ରୀତିନୀତି ସହିତ ବିବାହ କରିଥିଲେ ।

5. ପୁଲକିତ ସମ୍ରା଼ଟ-କ୍ରିତି ଖରବନ୍ଧା

ସେହିପରି 2024ରେ ବଲିଉଡ ଅନ୍ୟତମ ତାରକା ପୁଲକିତ ସମ୍ରା଼ଟ, କ୍ରିତି ଖରବନ୍ଧା ମଧ୍ୟ ବିବାହ ବନ୍ଧନରେ ବାନ୍ଧି ହୋଇଛନ୍ତି । ମାର୍ଚ୍ଚ 15 ତାରିଖରେ ଏହି ଦମ୍ପତିଙ୍କ ହାତଗଣ୍ଠି ପଡିଥିଲା । ଘନିଷ୍ଠ ବନ୍ଧୁ ଏବଂ ପରିବାର ସଦସ୍ୟଙ୍କ ଉପସ୍ଥିତିରେ ପଞ୍ଜାବୀ ରୀତିନୀତିରେ ଉଭୟ ବିବାହ କରିଥିଲେ । ଏହି କପଲଙ୍କ ଲଭଷ୍ଟୋରୀ ଫିଲ୍ମ 'ପାଗଲପନ୍ତୀ'ର ସେଟରୁ ଆରମ୍ଭ ହୋଇଥିଲା । କୁହାଯାଉଛି ଯେ, ଦୁହେଁ ପ୍ରଥମ ଥର ପାଇଁ ଏଠାରେ ଭେଟିଥିଲେ ଏବଂ କିଛି ସମୟ ପରେ ସେମାନେ ପରସ୍ପରକୁ ଡେଟ୍ କରିବା ଆରମ୍ଭ କରିଥିଲେ । ଦୀର୍ଘ ଦିନ ଡେଟିଂ ପରେ ଉଭୟ ସାତଜନ୍ମର ସାଥୀ ହୋଇଛନ୍ତି ।

6. ସୋନାକ୍ଷୀ ସିହ୍ନା-ଜାହିର ଅକବାଲ

ଚଳିତ ବର୍ଷ ବିବାହ ବନ୍ଧନରେ ବାନ୍ଧି ହୋଇଥିଲେ ବଲିଉଡ ଅଭିନେତ୍ରୀ ସୋନାକ୍ଷୀ ସିହ୍ନା । ଦୀର୍ଘ ଦିନର ଡେଟିଂ ପରେ ନିଜ ପ୍ରେମିକ ତଥା ଅଭିନେତା ଜାହିର ଇକବାଲଙ୍କ ହାତ ଧରିଲେ ସୋନାକ୍ଷୀ । ଜୁନ ୨୩ରେ ମୁମ୍ୱାଇରେ ଉଭୟ ପରିବାର ଏବଂ ସମ୍ପର୍କୀୟଙ୍କ ଉପସ୍ଥିତିରେ ଧୁମଧାମରେ ବିବାହ କରିଥିଲେ । ସୋନାକ୍ଷୀ ହିନ୍ଦୁ ହୋଇଥିବାବେଳେ ମୁସଲିମ ଧର୍ମୀ ଅଟନ୍ତି ଜାହିର । ଧର୍ମ ପରିବର୍ତ୍ତନ କରିବେ ନାହିଁ ସୋନାକ୍ଷୀ । ଏଣୁ ଉଭୟ ୧୯୫୪ର ସ୍ପେଶାଲ ମ୍ୟାରେଜ ଆକ୍ଟ ଅନୁଯାୟୀ ଏକ ପଞ୍ଜୀକୃତ ବିବାହ କରିଥିଲେ ।

7. ଅଦିତି ରାଓ ହାଇଦରୀ-ସିଦ୍ଧାର୍ଥ

ବଲିଉଡ ଅଭିନେତ୍ରୀଅଦିତି ରାଓ ହାଇଦରୀ ମଧ୍ୟ ଚଳିତ ବର୍ଷ ବିବାହ କରି ଫ୍ୟାନ୍ସଙ୍କୁ ସରପ୍ରାଇଜ ଦେଇଥିଲେ । ଅଭିନେତ୍ରୀ ନିଜ ଦୀର୍ଘଦିନର ବୟଫ୍ରେଣ୍ଡ ତଥା ଅଭିନେତା ସିଦ୍ଧାର୍ଥଙ୍କୁ ସାତ ଜନ୍ମର ସାଥୀ କରିଛନ୍ତି । ଚଳିତ ମାର୍ଚ୍ଚରେ ଉଭୟଙ୍କ ନିର୍ବନ୍ଧ ସରିଥିଲା । ଯାହା ପରେ ସେପ୍ଟେମ୍ୱର ମାସରେ ଏହି ଦମ୍ପତି ସିକ୍ରେଟ ଭାବେ ବିବାହ କରିଥିଲେ । ସୂଚନା ଥାଉକି, ଅଦିତି ରାଓ ଓ ସିଦ୍ଧାର୍ଥଙ୍କ ଏହା ଦ୍ୱିତୀୟ ବିବାହ । ପ୍ରଥମ ବିବାହର 4 ବର୍ଷ ପରେ ଉଭୟ ନିଜ ନିଜ ସାଥୀଙ୍କ ଠାରୁ ଅଲଗା ହୋଇଥିଲେ । ଛାଡପତ୍ର ପରେ ପରସ୍ପରକୁ ଡେଟ କରିଥିଲେ । ଦୀର୍ଘ ଦିନର ଡେଟ ପରେ ବର୍ତ୍ତମାନ ବିବାହ କରିଛନ୍ତି ଅଦିତି-ସିଦ୍ଧାର୍ଥ ।

2024ରେ ଏହି ସାଉଥ ସେଲିବ୍ରିଟିଙ୍କ ବିବାହ:-

8. ନାଗା ଚୈତନ୍ୟ-ଶୋଭିତା

ଚଳିତ ବର୍ଷ ସାତ ଜନ୍ମର ସାଥୀ ହେଲେ ସାଉଥ ଅଭିନେତା ନାଗା ଚୈତନ୍ୟ ଏବଂ ଶୋଭିତା ଧୂଲିପାଲା । 4 ଡିସେମ୍ବରରେ ଶୋଭିତା ଏବଂ ନାଗା ଧୁମଧାମରେ ବିବାହ କରିଛନ୍ତି । ଏହି ଦମ୍ପତିଙ୍କ ବିବାହ ଚଳିତବର୍ଷ ଶିରୋନାମାରେ ରହିଥିଲା । ନାଗାଙ୍କ ଏହା ଦ୍ୱିତୀୟ ବିବାହ ଅଟେ । ନାଗା ଚୈତନ୍ୟ ପୂର୍ବରୁ ସାଉଥ ଅଭିନେତ୍ରୀ ସାମନ୍ଥା ରୁଥ ପ୍ରଭୁଙ୍କୁ ବିବାହ କରିଥିଲେ । ସାମନ୍ଥା ଏବଂ ନାଗା ଅକ୍ଟୋବର 2017ରେ ବିବାହ କରିଥିଲେ । କିନ୍ତୁ ୪ ବର୍ଷ ପରେ ଏହି କପଲ ୨୦୨୧ରେ ଅଲଗା ହୋଇଥିଲେ । ଯାହା ଉଭୟଙ୍କ ଫ୍ୟାନ୍ସଙ୍କୁ ଚକିତ କରିଥିଲା । ସାମନ୍ଥାଙ୍କ ସହ ବିବାହ ବିଚ୍ଛେଦ ହେବା ପରେ ନାଗା ଅଭିନେତ୍ରୀ ଶୋଭିତା ଧୂଲିପାଲାଙ୍କ ପ୍ରେମରେ ପଡିଥିଲେ । ଦୀର୍ଘ ଦିନର ଡେଟ୍ ପରେ ଉଭୟ ନିର୍ବନ୍ଧ କରି ସମ୍ପର୍କକୁ ନିଶ୍ଚିତ କରିଥିଲେ । ଏବେ ଉଭୟ ବିବାହ ବନ୍ଧନରେ ବାନ୍ଧି ହୋଇଛନ୍ତି ।

9. କୀର୍ତ୍ତି ସୁରେଶ-ଆଣ୍ଟୋନି ଥାଟିଲ

ସେହିପରି ସାଉଥ ଲୋକପ୍ରିୟ ଅଭିନେତ୍ରୀ କୀର୍ତ୍ତି ସୁରେଶ ଚଳିତ ବର୍ଷ ବିବାହ ଘୋଷଣା କରି ଫ୍ୟାନ୍ସଙ୍କୁ ସରପ୍ରାଇଜ ଦେଇଥିଲେ । 15 ବର୍ଷ ଧରି ଉଭୟ ଡେଟିଂ ପରେ ନିଜ ପ୍ରେମିକଙ୍କ ହାତ ଧରିଲେ କୀର୍ତ୍ତି । ବୟଫ୍ରେଣ୍ଡ ତଥା ବ୍ୟବସାୟୀ ଆଣ୍ଟୋନି ଥାଟିଲଙ୍କ ବିବାହ କରିଛନ୍ତି କୀର୍ତ୍ତି । ଡିସେମ୍ୱର 12ରେ କୀର୍ତ୍ତି ସାଉଥ ରୀତିନୀତି ଅନୁଯାୟୀ ବିବାହ କରିଥିଲେ । ପରେ ଖ୍ରୀଷ୍ଟିଆନ ରୀତିରେ ବିବାହ କରିଥିଲେ ।

2024ରେ ଏହି ଟିଭି ତାରକାଙ୍କ ବିବାହ:-

10. ସୁରଭୀ ଚନ୍ଦାନା-କରଣ ଶର୍ମା

କେବଳ ଓଲିଉଡରୁ ସାଉଥ ନୁହେଁ ଟେଲିଭିଜନ କ୍ଷେତ୍ରରେ ମଧ୍ୟ ବାଜିଥିଲା ସାହାନାଇ । ଟିଭି ଅଭିନେତ୍ରୀ ସୁରଭୀ ଚନ୍ଦନା ତାଙ୍କର ଦୀର୍ଘ ଦିନର ପ୍ରେମିକ କରଣ ଶର୍ମାଙ୍କୁ ଚଳିତ ବର୍ଷ ମାର୍ଚ୍ଚ ୨ ରେ ବିବାହ କରିଥିଲେ । ସେ ଜୟପୁରର ଚୋମୁ ପ୍ୟାଲେସ ହୋଟେଲରେ ପରିବାର ଏବଂ ସାଙ୍ଗମାନଙ୍କ ଉପସ୍ଥିତିରେ ହିନ୍ଦୁ ରୀତିନୀତିରେ ଧୁମଧାମରେ ବିବାହ କରିଥିଲେ । ୧୩ ବର୍ଷ ଡେଟିଂ କରିବା ପରେ ବର୍ତ୍ତମାନ କରଣ ଶର୍ମାଙ୍କୁ ବିବାହ କରିଛନ୍ତି ସୁରଭୀ ।

11. ଆରତୀ ସିଂ-ଦୀପକ

ସେହିପରି ଚଳିତ ବର୍ଷ ବିବାହ ବନ୍ଧନରେ ବାନ୍ଧି ହୋଇଥିଲେ ଲୋକପ୍ରିୟ ଟିଭି ଅଭିନେତ୍ରୀ ଆରତୀ ସିଂ । ସେ ବୟଫ୍ରେଣ୍ଡ ଦୀପକ ଚୌହ୍ୱାନଙ୍କୁ ସାତ ଜନ୍ମର ସାଥୀ କରିଥିଲେ । ଏପ୍ରିଲ ୨୫ରେ ଉଭୟ ବିବାହ କରିଥିଲେ । ଆରତୀ ସିଂ ଲୋକପ୍ରିୟ କମେଡିଆନ କୃଷ୍ଣା ଅଭିଷେକଙ୍କ ଭଉଣୀ ତଥା ଅଭିନେତା ଗୋବିନ୍ଦାଙ୍କ ଭାଣିଜୀ ଅଟନ୍ତି ।

ଏହା ମଧ୍ୟ ପଢନ୍ତୁ:ପାଣି ପରି ଲାଗିଥିଲା ଟଙ୍କା, ବକ୍ସ ଅଫିସରେ ଚାଲିଲାନି ଯାଦୁ

ବ୍ୟୁରୋ ରିପୋର୍ଟ, ଇଟିଭି ଭାରତ