ହାଇଦ୍ରାବାଦ:କେଜିଏଫ୍ ସିରିଜର ଅତୁଳନୀୟ ସଫଳତା ପରେ ଅଭିନେତା ୟଶ ବର୍ତ୍ତମାନ ଫିଲ୍ମ 'ଟକ୍ସିକ' ସହ ପରଦାରେ ଧମାକା କରିବାକୁ ପ୍ରସ୍ତୁତ ଅଛନ୍ତି । ଗତ ବର୍ଷ ଏହି ଚଳଚ୍ଚିତ୍ର ଘୋଷଣା କରାଯାଇଥିଲା । ୟଶଙ୍କ ପ୍ରଶଂସକମାନେ ମଧ୍ୟ ଏହି ଚଳଚ୍ଚିତ୍ର ପାଇଁ ଉତ୍ସାହର ସହିତ ଅପେକ୍ଷା କରିଛନ୍ତି । ଏହାରି ମଧ୍ୟରେ ଏହି ଫିଲ୍ମରେ ବଲିଉଡ ବାଦଶାହା ଶାହାରୁଖ ଖାନ ମଧ୍ୟ ଫିଲ୍ମରେ ନଜର ଆସିବା ନେଇ ଚର୍ଚ୍ଚା ଜୋର ଧରିଥିଲା । ବର୍ତ୍ତମାନ ଏନେଇ ୟଶ ଖୁଲାସା କରିଛନ୍ତି ।
ଏକ ସାକ୍ଷାତକାରରେ କେଜିଏଫ୍ ତାରକା ୟଶ ଫିଲ୍ମ 'ଟକ୍ସିକ' ବିଷୟରେ ଆଲୋଚନା କରିଛନ୍ତି । ଏହି ସମୟରେ ସେ ଟକ୍ସିକରେ ଶାହରୁଖଙ୍କ କ୍ୟାମିଓ ରୋଲ ଉପରେ ମଧ୍ୟ ପ୍ରତିକ୍ରିୟା ଦେଇଛନ୍ତି । ଅଭିନେତା କହିଛନ୍ତି ଯେ ଶାହରୁଖ ଖାନଙ୍କ କ୍ୟାମିଓ ବିଷୟରେ ଏପର୍ଯ୍ୟନ୍ତ କୌଣସି ନିଶ୍ଚିତତା ନାହିଁ । ନିର୍ମାତାମାନେ ଖୁବ ଶୀଘ୍ର ଫିଲ୍ମର କାଷ୍ଟ ଘୋଷଣା କରିବେ ଏବଂ ଆମ ତରଫରୁ ଦିଆଯାଇଥିବା ତଥ୍ୟକୁ କେବଳ ବିଶ୍ବାସ କରନ୍ତୁ ବୋଲି ସେ ପ୍ରଶଂସକମାନଙ୍କୁ ଅପିଲ୍ କରିଛନ୍ତି ।
ଗଣମାଧ୍ୟମ ରିପୋର୍ଟ ଅନୁସାରେ, ୟଶଙ୍କ ଏହି ଫିଲ୍ମ ପାଇଁ ନିର୍ମାତା ଶାହାରୁଖ ଖାନଙ୍କୁ ଅଫର କରିଥିବା ଜଣାପଡିଛି । ଶାହାରୁଖ ଏହି ଫିଲ୍ମରେ କ୍ୟାମିଓ ରୋଲରେ ନଜର ଆସିପାରନ୍ତି । ସେପଟେ କେବଳ କିଙ୍ଗ ଖାନ ନୁହଁ ଏହି ଫିଲ୍ମରେ ବଲିଉଡ ଅଭିନେତ୍ରୀ କରୀନା କପୁର ଖାନ ମଧ୍ୟ ନଜର ଆସିବା ନେଇ ଚର୍ଚ୍ଚା ହେଉଛି । ଯଦି ରିପୋର୍ଟକୁ ବିଶ୍ୱାସ କରାଯାଏ, ତେବେ ଏହି ଫିଲ୍ମ ସହ କରୀନା କନ୍ନଡରେ ଡେବ୍ୟୁ କରିବା ସହ ପ୍ରଥମ ଥର ପାଇଁ ୟଶଙ୍କ ସହ ସ୍କ୍ରିନ ସେୟାର କରିବେ । ତେବେ ଫିଲ୍ମର ଷ୍ଟାରକାଷ୍ଟକୁ ଅଫିସିଆଲି ଘୋଷଣା ବାକି ଥିବା ବେଳେ ଏହା ଉପରେ ସମସ୍ତଙ୍କ ନଜର ରହିଛି ।
ଏହା ମଧ୍ୟ ପଢନ୍ତୁ:କେଜିଏଫ୍ ଷ୍ଟାର୍ଙ୍କ ଆଗାମୀ ପ୍ରଜେକ୍ଟ ୟଶ-19କୁ ମିଳିଲା ଟାଇଟଲ, ଏହି ଦିନ ରିଲିଜ ହେବ ଫିଲ୍ମ
ୟଶଙ୍କ ଏହି ଫିଲ୍ମ ୧୦ ଏପ୍ରିଲ ୨୦୨୫ରେ ପ୍ରେକ୍ଷାଳୟକୁ ଆସିବ । ଏହି ଚଳଚ୍ଚିତ୍ରର ନିର୍ଦ୍ଦେଶକ ହେଉଛନ୍ତି ଜାତୀୟ ପୁରସ୍କାର ବିଜେତା ଜିତୁ ମୋହନଦାସ, ଯିଏ ଲାଏରସ ଡାଏସ୍ ଏବଂ ମୁଥନ୍ ଭଳି ଚଳଚ୍ଚିତ୍ର ନିର୍ମାଣ ପାଇଁ ଜଣାଶୁଣା । କେଭିଏନ୍ ପ୍ରଡକ୍ସନ୍ ହାଉସ୍ ୟଶଙ୍କ ଫିଲ୍ମ 'ଟକ୍ସିକ୍' ପ୍ରସ୍ତୁତ କରୁଛି । ୟଶଙ୍କ ସହ ଏହା ଜିତୁ ମୋହନଦାସଙ୍କର ପ୍ରଥମ ଚଳଚ୍ଚିତ୍ର । ଫିଲ୍ମର ସଙ୍ଗୀତ ଚରଣ ରାଜ କରିବାକୁ ଥିବା ବେଳେ ଆକ୍ସନ ଡିଜାଇନ ପାଇଁ ଷ୍ଟିଭ ଗ୍ରିଫିନଙ୍କୁ ଦାୟିତ୍ୱ ଦିଆଯାଇଥିବା କୁହାଯାଇଛି ।
