ଲସ ଆଞ୍ଜେଲସ:ଚଳିତ ବର୍ଷ ୯୬ତମ ଓସ୍କାର ପୁରସ୍କାର ସମାରୋହ ଆୟୋଜିତ ହୋଇଥିବା ବେଳେ ବିଜେତାଙ୍କ ନାଁ ଘୋଷଣା ହୋଇସାରିଛି । ତେବେ ଏହି ପୁରସ୍କାର ସମାରୋହରେ ଅନେକ ହଲିଉଡ ଅଭିନେତା, ଅଭିନେତ୍ରୀ ଏବଂ କଳାକାର ଯୋଗ ଦେଇଥିବା ବେଳେ ରେଡ କାର୍ପେଟରେ ନିଜର ଜଲୱା ଦେଖାଇଥିଲେ । ଏହି ସମୟରେ ହଲିଉଡ ଅଭିନେତ୍ରୀ ଲିଜା କୋଶୀ ରେଡ କାର୍ପେଟରେ ପୋଜ ଦେବା ବେଳେ ପଡ଼ିଯାଇଛନ୍ତି । ଯାହାର ଫଟୋ ଏବଂ ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହୋଇଛି ।
ଓସ୍କାର ରେଡ କାର୍ପେଟରେ ଲିଜା କୋଶୀ ଲାଲ ରଙ୍ଗର ଲମ୍ବା ଗାଉନରେ ଗର୍ଜିୟସ ଲୁକରେ ନଜର ଆସିଛନ୍ତି । ଏହି ସମୟରେ ପୋଜ ଦେବା ବେଳେ ତାଙ୍କ ପାଦ ଖସିଯାଇଥିଲା ଏବଂ ସେ ତଳେ ପଡ଼ିଯାଇଥିଲେ । ପରେ ଅଭିନେତ୍ରୀ ହସି ଦେଇ ସମାରୋହକୁ ସମ୍ବାଳିଥିଲେ । ଏବଂ ସେହି ବସିରହିଥିବା ଅବସ୍ଥାରେ ବି ସେ ପୋଜ ଦେଇଥିଲେ । ଏହା ପରେ ସେ ଗଣମାଧ୍ୟମ ସହ କଥାବାର୍ତ୍ତା କରି କହିଥିଲେ ଯେ, ଓସ୍କାରରେ ଆସିବାକୁ ଏତେ ଉତ୍ସାହିତ ଥିଲି ଯେ ରେଡ କାର୍ପେଟରେ ମୁଁ ପଡିଗଲି ।
ତେବେ ଏହି ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେଉଥିବା ବେଳେ ଲୋକେ ଅଭିନେତ୍ରୀଙ୍କ ଏହି ଉଦ୍ୟମକୁ ବେଶ ପ୍ରଶଂସା କରିଛନ୍ତି । କହିରଖୁଛୁ କି, ଅଭିନେତ୍ରୀ ଲିଜା କୋସୀ ଜଣେ ହଲିଉଡର ଲୋକପ୍ରିୟ ଅଭିନେତ୍ରୀ । ଏଥିସହ ସେ ଜଣେ ୟୁଟ୍ୟୁବର ମଧ୍ୟ ଅଟନ୍ତି । ସେ ନେଟଫ୍ଲିକ୍ସରେ ମୁକ୍ତିଲାଭ କରିଥିବା ଚଳଚ୍ଚିତ୍ର 'ପ୍ଲେୟର୍ସ'ରୁ ବେଶ ଲୋକପ୍ରିୟତା ହାସଲ କରିଛନ୍ତି ।
ଏହା ମଧ୍ୟ ପଢନ୍ତୁ:ଓସ୍କାରରେ ହୋସ୍ ଉଡ଼ାଇଲା ଜନ ସିନାଙ୍କ ଲୁକ୍, ଉଲଗ୍ନ ହୋଇ ମଞ୍ଚରେ ପହଞ୍ଚି ଦେଲେ ଆୱାର୍ଡ
ସୂଚନା ଥାଉ କି, ଏହି ବର୍ଷ ପୁଣି ଥରେ ଜିମି କିମେଲ ଓସ୍କାର ପୁରସ୍କାରର ହୋଷ୍ଟ କରିଥିବା ବେଳେ ଶ୍ରେଷ୍ଠ ପିକ୍ଚର, ଶ୍ରେଷ୍ଠ ଅଭିନେତା ଏବଂ ଅଭିନେତ୍ରୀଙ୍କ ସମେତ ୨୦ରୁ ଅଧିକ ବର୍ଗ ପାଇଁ ଓସ୍କାର ପୁରସ୍କାର ପ୍ରଦାନ କରାଯାଇଛି । ଚଳିତ ବର୍ଷ ଓସ୍କାରରେ ସର୍ବାଧିକ ଆୱାର୍ଡ ହାତେଇଛି ହଲିଉଡ ଫିଲ୍ମ 'ଓପେନହାଇମର' । 'ଓପେନହାଇମର' ବିଭିନ୍ନ ବର୍ଗରେ ମୋଟ ୧୩ଟି ମନୋନୀତ ହୋଇଥିବା ବେଳେ ସେଥିମଧ୍ୟରୁ ଖ୍ରୀଷ୍ଟୋଫର ନୋଲାନଙ୍କ ନିର୍ଦ୍ଦେଶିତ ଏହି ଫିଲ୍ମ ୭ଟି ଆୱାର୍ଡ ନିଜ ନାଁରେ କରିଛି । ସେହିପରି ହଲିଉଡ ଫିଲ୍ମ 'ପୋର୍ ଥିଙ୍ଗସ' ୧୧ଟି ବର୍ଗରେ ମନୋନୀତ ହୋଇଥିବା ବେଳେ ୪ଟି ଆୱାର୍ଡ ହାତେଇଛି ।
