ହାଇଦ୍ରାବାଦ: ସାଉଥର ଭେଟେରାନ୍ ଅଭିନେତା କମଲ ହାସନଙ୍କ ଅଭିନୀତ ଏବଂ ମଣି ରତ୍ନମଙ୍କ ନିର୍ଦ୍ଦେଶିତ 'ଥଗ ଲାଇଫ' ତାମିଲ ସିନେମାର ବହୁ ପ୍ରତୀକ୍ଷିତ ଚଳଚ୍ଚିତ୍ର ମଧ୍ୟରୁ ଅନ୍ୟତମ । ଗତ ବର୍ଷ ୬ ନଭେମ୍ବର ୨୦୨୩ରେ ଦୁହେଁ ଏକ ସର୍ଟ ଟିଜର ରିଲିଜ କରି ଫିଲ୍ମର ଘୋଷଣା କରିଥିଲେ । ଫିଲ୍ମର ଆଗାମୀ ଅପଡେଟ ନେଇ ଫ୍ୟାନ୍ସ ଉତ୍ସାହର ସହ ଅପେକ୍ଷା କରିଥିବା ବେଳେ ବର୍ତ୍ତମାନ ଆଜିଠାରୁ ଫିଲ୍ମର ସୁଟିଂ ଆରମ୍ଭ ହୋଇଛି । ନିର୍ମାତା ଏକ ଭିଡିଓ ଜାରି କରି ଫିଲ୍ମର ସୁଟିଂ ଆରମ୍ଭ ନେଇ ସୂଚନା ଦେଇଛନ୍ତି । ଏଥିସହ ଫିଲ୍ମର କାଷ୍ଟ ମାନଙ୍କ ମଧ୍ୟ ଖୁଲାସା କରିଛନ୍ତି ।
ଫିଲ୍ମ ନିର୍ମାତା ସୋସିଆଲ ମିଡିଆ ଏକ୍ସରେ ଏକ ଭିଡିଓ ସେୟାର କରିଛନ୍ତି । ଯେଉଁଥିରେ ଫିଲ୍ମର କାଷ୍ଟ ମାନଙ୍କ ଖୁଲାସା କରାଯାଇଛି । ଏଥିସହ ଫିଲ୍ମର ସୁଟିଂ ଆଜି ଠୁ ଆରମ୍ଭ ହୋଇଥିବା କୁହାଯାଇଛି । 'ଥଗ ଲାଇଫ' ଫିଲ୍ମରେ ଜୟମ ରବି, ତ୍ରିଷା କ୍ରିଷ୍ଣନ, ଦୁଲେକର ସଲମାନ, ଜୋଜୁ ଜର୍ଜ, ଗୌତମ କାର୍ତ୍ତିକ ଏବଂ ଐଶ୍ବର୍ଯ୍ୟା ଲକ୍ଷ୍ମୀ ଅଭିନୟ କରିଛନ୍ତି । ଭିଡିଓ ସେୟାର କରି ନିର୍ମାତା ଲେଖିଛନ୍ତି, "ଶକ୍ତି, ବିଦ୍ରୋହ ଏବଂ ବିଜୟର ଏକ କାହାଣୀ ।'ଥଗ୍ ଲାଇଫ୍' ସୁଟିଂ ଆଜି ଆରମ୍ଭ ହୋଇଛି ।"
'ଥଗ୍ ଲାଇଫ୍' ମଣି ରତ୍ନମଙ୍କ ଦ୍ବାରା ଲିଖିତ ଏବଂ ନିର୍ଦ୍ଦେଶିତ । ଏହି ଚଳଚ୍ଚିତ୍ର ରାଜ କମଲ ଫିଲ୍ମ ଇଣ୍ଟରନ୍ୟାସନାଲ, ମାଡ୍ରାସ ଟକିଜ୍ ଏବଂ ରେଡ ଜଏଣ୍ଟ ଚଳଚ୍ଚିତ୍ର ଦ୍ବାରା ପ୍ରସ୍ତୁତ କରିଛନ୍ତି । ପୂର୍ବରୁ ଏହି ଫିଲ୍ମ 'KH234' ଭାବରେ ଜଣାଶୁଣା, ବହୁ ପ୍ରତୀକ୍ଷିତ ଚଳଚ୍ଚିତ୍ରକୁ ବର୍ତ୍ତମାନ 'ଥଗ୍ ଲାଇଫ୍' ନାମରେ ନାମିତ କରାଯାଇଛି । 'ନୟାକାନ'ରେ ଏକାଠି କାମ କରିବା ପରେ ବର୍ତ୍ତମାନ କମଲ ହାସନ ଏବଂ ମଣି ରତ୍ନମ ଏହି ଚଳଚ୍ଚିତ୍ରରେ ଏକାଠି କାମ କରିଛନ୍ତି । ପ୍ରାୟ ୩୫ ବର୍ଷ ପରେ ଉଭୟ ଏକାଠି କାମ କରିଛନ୍ତି ।
ଏହା ମଧ୍ୟ ପଢନ୍ତୁ:35 ବର୍ଷ ପରେ ମଣିରତ୍ନମଙ୍କ ସହ କାମ କରିବେ କମଲ ହାସନ
ସୂଚନା ଥାଉ କି, 'ଥଗ୍ ଲାଇଫ୍' ଫିଲ୍ମରେ କମଲ ହାସନଙ୍କୁ ଏକ ଗ୍ୟାଙ୍ଗଷ୍ଟର ରଙ୍ଗରାଜା ଶକ୍ତିୱେଲ ନାଇକର ଭୂମିକାରେ ଦେଖିବାକୁ ମିଳିବ । ସେପଟେ ଏହି ଚଳଚ୍ଚିତ୍ରରେ ଦୁଲେକର ସଲମାନ ଜିଲ୍ଲା କଲେକ୍ଟର ଭୂମିକାରେ ନଜର ଆସିବେ ବୋଲି କୁହାଯାଉଛି। ତେବେ ଏ ସମ୍ପର୍କରେ ନିର୍ମାତା କୌଣସି ଅଫିସିଆଲି ଘୋଷଣା କରିନାହାନ୍ତି । ଏହି ଚଳଚ୍ଚିତ୍ର ପାଇଁ ସଂଗୀତକୁ ଏ ଆର୍ ରେହମାନ ରଚନା କରିବାକୁ ଥିବା ବେଳେ ଫିଲ୍ମ ପାଇଁ ଷ୍ଟଣ୍ଟ କୋରିଓଗ୍ରାଫି ଅନବରିଭ ମାଷ୍ଟର୍ସ କୋରିଓଗ୍ରାଫ କରିବେ ।
