ହାଇଦ୍ରାବାଦ:ସାଉଥ ଏବଂ ବଲିଉଡ ଇଣ୍ଡଷ୍ଟ୍ରିରେ ଖଳନାୟକ ଭୂମିକାରେ ଦମଦାର ଅଭିନୟ କରିଥିବା ଅଭିନେତା ସୟାଜୀ ସିନ୍ଦେ ହୃଦଘାତର ଶିକାର ହୋଇଛନ୍ତି । ଅଭିନେତା ଗତ କିଛି ଦିନ ହେବ ଅସୁସ୍ଥ ଥିଲେ । ସୟାଜୀ ଛାତିରେ ଯନ୍ତ୍ରଣା ଅନୁଭବ କରିବା ପରେ ଏପ୍ରିଲ ୧୧ ତାରିଖରେ ତାଙ୍କୁ ମହାରାଷ୍ଟ୍ର ସାତାର ପ୍ରତିଭା ହସ୍ପିଟାଲରେ ଭର୍ତ୍ତି କରାଯାଇଥିଲା । ପରେ ଅଭିନେତାଙ୍କ ଆଞ୍ଜିଓପ୍ଲାଷ୍ଟି କରାଯାଇଥିବା ବେଳେ ଏବେ ସେ ସୁସ୍ଥ ଥିବା ଜଣାପଡିଛି । ଏନେଇ ସୟାଜୀ ବର୍ତ୍ତମାନ ସୋସିଆଲ ମିଡିଆରେ ହସ୍ପିଟାଲରୁ ଏକ ଭିଡିଓ ସେୟାର କରି ନିଜ ସ୍ୱାସ୍ଥ୍ୟବସ୍ଥା ବିଷୟରେ ସୂଚନା ଦେଇଛନ୍ତି ।
ରିପୋର୍ଟ ଅନୁସାରେ, ସୟାଜୀ ସିନ୍ଦେଙ୍କ ହାର୍ଟକୁ ରକ୍ତ ଯୋଗାଉଥିବା ଧମନୀରେ ୯୯ ପ୍ରତିଶତ ବ୍ଲକେଜ ରହିଥିଲା । ଯାହା ପରେ ଡାକ୍ତରମାନଙ୍କୁ ତାଙ୍କ ଆଞ୍ଜିଓପ୍ଲାଷ୍ଟି କରିବାକୁ ପଡିଲା । ବର୍ତ୍ତମାନ ତାଙ୍କ ଅବସ୍ଥା ସ୍ଥିର ରହିଛି । ତେବେ ବର୍ତ୍ତମାନ ସୟାଜୀ ସିନ୍ଦେ ପ୍ରଶଂସକଙ୍କୁ ତାଙ୍କ ସ୍ୱାସ୍ଥ୍ୟ ଅପଡେଟ୍ ଦେଇଛନ୍ତି । ଭିଡିଓ ସେୟାର କରି ଅଭିନେତା କହିଛନ୍ତି- 'ମୁଁ ସୁସ୍ଥ ଅଛି, ମୋତେ ଭଲ ପାଉଥିବା ଏବଂ ମୋ ସହ ଥିବା ସମସ୍ତ ପ୍ରଶଂସକମାନେ ମୋ ବିଷୟରେ ଚିନ୍ତା କରିବାର କୌଣସି ଆବଶ୍ୟକତା ନାହିଁ । ମୁଁ ଶୀଘ୍ର ସୁସ୍ଥ ହେବି ଏବଂ ତୁମକୁ ପୁଣି ମନୋରଞ୍ଜନ କରିବାକୁ ଫେରିବି ଧନ୍ୟବାଦ।'