ହାଇଦ୍ରାବାଦ:ଅଲ୍ଲୁ ଅର୍ଜୁନଙ୍କ ଫିଲ୍ମ 'ପୁଷ୍ପା ୨' ବକ୍ସ ଅଫିସରେ ଧମାଲ୍ କରୁଛି । ଡିସେମ୍ବର 5 ରେ ମୁକ୍ତିଲାଭ କରିଥିବା ଏହି ଚଳଚ୍ଚିତ୍ର କେବଳ ଭାରତରେ ନୁହେଁ ସମଗ୍ର ବିଶ୍ୱରେ ରେକର୍ଡ ଭାଙ୍ଗୁଛି। କେଳ ଏତିକି ନୁହେଁ ଏହି ଫିଲ୍ମ ଦର୍ଶକଙ୍କ ପ୍ରିୟ ଫିଲ୍ମ ସାଜିଛି । ଫିଲ୍ମ ପ୍ରଥମ ସପ୍ତାହ ଶେଷରେ ସମସ୍ତ ରେକର୍ଡ ଭାଙ୍ଗିଥିବାବେଳେ ଏହା ବକ୍ସ ଅଫିସରେ ସୋମବାର ଟେଷ୍ଟରେ ମଧ୍ୟ ନୂଆ ରେକର୍ଡ ସୃଷ୍ଟି କରିଛି। ଫିଲ୍ମ 'ପୁଷ୍ପା ୨'ର ହିନ୍ଦୀ ସଂସ୍କରଣ ପ୍ରଥମ ସୋମବାର ପରୀକ୍ଷାରେ 'ବାହୁବଲୀ ୨' ଏବଂ 'ଆନିମଲ'କୁ ପଛରେ ପକାଇ ଭାରତର ପ୍ରଥମ ସୋମବାରରେ ସର୍ବାଧିକ ଆୟ କରିଥିବା ହିନ୍ଦୀ ଚଳଚ୍ଚିତ୍ର ଭାବରେ ପରିଣତ ହୋଇଛି ।
'ପୁଷ୍ପା ୨' ବକ୍ସ ଅଫିସ୍ କଲେକ୍ସନ
'ପୁଷ୍ପା ୨' ବକ୍ସ ଅଫିସରେ ଏକ ବ୍ଲକବଷ୍ଟର ପାଲଟିଛି, ଯାହା ଏହାର ଓପନିଂ ଦିନ ଠାରୁ ବମ୍ପର ରୋଜଗାର ସହ ଅନେକ ରେକର୍ଡ ଭାଙ୍ଗୁଛି । ସାକନିକଙ୍କ ଅନୁଯାୟୀ, ପ୍ରଥମ ସୋମବାରରେ 'ପୁଷ୍ପା 2'ସମସ୍ତ ଭାଷାରେ 64.1 କୋଟି ଟଙ୍କା ଆୟ କରି ମୋଟ ଆୟ 593.1 କୋଟିରେ ପହଞ୍ଚିଛି । ଅଲ୍ଲୁ ଅର୍ଜୁନ ଷ୍ଟାରରଙ୍କ ପାଇଁ ଏହା ଆଉ ଏକ ମାଇଲଖୁଣ୍ଟ, ଯାହା ପ୍ରାରମ୍ଭିକ ଦିନରେ ବକ୍ସ ଅଫିସରେ ଧମାକା ସୃଷ୍ଟି କରିଥିଲା । ଏହି ଦମଦାର ବ୍ୟବସାୟ ସହ 'ପୁଷ୍ପା ୨' ଭାରତୀୟ ସିନେମାର ସର୍ବାଧିକ ଆୟ କରିଥିବା ଚଳଚ୍ଚିତ୍ର ମଧ୍ୟରୁ ଗୋଟିଏ ହୋଇପାରିଛି ।
'ପୁଷ୍ପା ୨' ବିଶ୍ୱ ବକ୍ସ ଅଫିସ୍ କଲେକ୍ସନ
ସେହିପରି ବିଶ୍ୱରେ ମଧ୍ୟ ଅଲୁ ଅର୍ଜୁନ ଏବଂ ନିର୍ଦ୍ଦେଶକ ସୁକୁମାରଙ୍କ'ପୁଷ୍ପା ୨'ଦମଦାର କଲେକ୍ସନ ସହ ସୋମବାର ଟେଷ୍ଟରେ ଉତ୍ତୀର୍ଣ୍ଣ ହୋଇଛି । ମାତ୍ର ପାଞ୍ଚ ଦିନ ମଧ୍ୟରେ ପୁଷ୍ପା ସିକ୍ୱେଲ ସାରା ବିଶ୍ୱରେ 900 କୋଟିରୁ ଅଧିକ ଆୟ କରିଛି । ତେବେ ଖୁବଶୀଘ୍ର, 1,000 କୋଟି ସାମିଲ ହୋଇ ଫିଲ୍ମ ଆଉ ଏକ ନୂଆ ରେକର୍ଡ ନିଜ ନାଁରେ କରିବ ବୋଲି ଆଶା କରାଯାଉଛି ।