କାଲି ଦେହାନ୍ତ, ଆଜି ଜୀବିତ: ଇନଷ୍ଟାରେ ଲାଇଭ୍ ଆସିଲେ ପୁନମ ପାଣ୍ଡେ

Poonam Pandey is alive: ବଞ୍ଚିଛନ୍ତି ଅଭିନେତ୍ରୀ ପୁନମ ପାଣ୍ଡେ । ସେ ଜୀବିତ ଥିବା ସୋସିଆଲ ମିଡିଆରେ ଲାଇଭ ଆସି କହିଛନ୍ତି । ଅଧିକ ପଢନ୍ତୁ

ମୁମ୍ବାଇ:ଜୀବିତ ଅଛନ୍ତି ଅଭିନେତ୍ରୀ ପୁନମ ପାଣ୍ଡେ । ସୋସିଆଲ ମିଡିଆରେ ଲାଇଭ ଆସି ମୃତ୍ୟୁ ଖବରକୁ ଖଣ୍ଡନ କରିବା ସହ ଜୀବିତ ଥିବା କହିଛନ୍ତି ପୁନମ । ଗତକାଲି ତାଙ୍କର ମୃତ୍ୟୁ ଖବର ସାମ୍ନାକୁ ଆସିଥିଲା । ଗର୍ଭାଶୟ କର୍କଟରେ ଆକ୍ରାନ୍ତ ହୋଇ ସେ ଆଖି ବୁଜିଥିବା ଖବର ତାଙ୍କ ଅଫିସିଆଲ ସୋସିଆଲ ମିଡିଆ ହ୍ୟାଣ୍ଡେଲରେ ପୋଷ୍ଟ କରାଯାଇଥିଲା । ଏହି ଖବର ଚାରିଆଡେ ନିଆଁ ପରି ବ୍ୟାପିବା ପରେ ତାଙ୍କ ଫ୍ୟାନ୍ସ ସହଜରେ ବିଶ୍ବାସ କରିନଥିଲେ । ଆଜି ଲାଇଭ ଭିଡିଓରେ ଆସି ସେ ଜୀବିତ ଥିବା କହିଛନ୍ତି ।

ଗର୍ଭାଶୟ କର୍କଟ ସଚେତନ ପାଇଁ କରିଥିଲେ ମୃତ୍ୟୁ ପୋଷ୍ଟ: ଇନଷ୍ଟାଗ୍ରାମରେ ଆଜି ଲାଇଭ ଆସିଥିଲେ ପୁନମ । ସେ କହିଥିଲେ, ''ମୁଁ ଆପଣ ମାନଙ୍କୁ ଏହା କହିବାକୁ ବାଧ୍ୟ ହେଉଛି ଯେ, ମୁଁ ଜୀବିତ, କୌଣସି ଗର୍ଭାଶୟ କର୍କଟ ରୋଗରେ ପୀଡିତ ନାହିଁ, କିନ୍ତୁ ଅନେକ ମହିଳା ଏହି କାରଣରୁ ପ୍ରତିବର୍ଷ ପ୍ରାଣ ହରାନ୍ତି । ଏହାର କାରଣ ହେଉଛି ମହିଳାମାନେ ଏ ବିଷୟରେ ଅବଗତ ନଥାନ୍ତି । ଗର୍ଭାଶୟ କର୍କଟ ଅନ୍ୟ କର୍କଟ ରୋଗ ଭଳି ନୁହେଁ, ଏହାର ସମ୍ପୂର୍ଣ୍ଣ ଚିକିତ୍ସା ଅଛି । ମୁଁ ଚାହୁଁନାହିଁ ଏହି ରୋଗରେ ଆକ୍ରାନ୍ତ ହୋଇ କାହାର ଜୀବନ ଯାଉ । ତେଣୁ ଆସନ୍ତୁ ଏହି ରୋଗକୁ ନେଇ ସଚେତନ କରିବା ଓ ଲଢେଇ କରିବା । ''

ଫ୍ୟାନ୍ସଙ୍କୁ ଆଶ୍ଚର୍ଯ୍ୟ କରିଥିଲା ପୁନମଙ୍କ ମୃତ୍ୟୁ ଖବର:ଅଭିନେତ୍ରୀ ତଥା ସୋସିଆଲ ମିଡିଆ ସେନ୍ସସେସନ ପୁନମ ପାଣ୍ଡେଙ୍କ ଦେହାନ୍ତ ହୋଇଥିବା ଖବର ଗତକାଲି ସାମ୍ନାକୁ ଆସିଥିଲା । କିନ୍ତୁ ଏହି ଖବରକୁ ସହଜରେ ବିଶ୍ବାସ କରିପାରିନଥିଲେ ଫ୍ୟାନ୍ସ । ଏହି ଖବର ସମସ୍ତଙ୍କୁ ଆଶ୍ଚର୍ଯ୍ୟ କରିଥିବା ବେଳେ ଫିଲ୍ମ ଇଣ୍ଡଷ୍ଟ୍ରି ଏବଂ ଫ୍ୟାନ୍ସଙ୍କ ମହଲରେ ଶୋକର ଛାୟା ଖେଳିଯାଇଥିଲା । ଅନେକ ବଲିଉଡ ଅଭିନେତା ଓ ଅଭିନେତ୍ରୀ ଟ୍ବିଟ କରି ଶ୍ରଦ୍ଧାଞ୍ଜଳି ଜଣାଇବା ସହ ଦୁଃଖ ପ୍ରକାଶ କରିଥିଲେ ।

ଶୁକ୍ରବାର ପୁନମ ପାଣ୍ଡେଙ୍କ ମୃତ୍ୟୁ ହୋଇଥିବା ଇନଷ୍ଟାଗ୍ରାମରେ ଏକ ପୋଷ୍ଟ ସେୟାର କରି ସୂଚନା ଦେଇଥିଲେ ତାଙ୍କ ମ୍ୟାନେଜର । ଏହି ପୋଷ୍ଟରେ ଲେଖା ହୋଇଥିଲା ''ଆମର ପ୍ରିୟ ପୁନମ ଏହି ଦୁନିଆରେ ଆଉ ନାହାନ୍ତି । ସେ କର୍କଟ ରୋଗରେ ପୀଡିତ ଥିବା ବେଳେ ସକାଳେ ପ୍ରାଣ ହରାଇଛନ୍ତି । ଏହି ଦୁଃଖଦ ସମୟରେ, ଆମେ ଗୋପନୀୟତା ପାଇଁ ଅନୁରୋଧ କରୁଛୁ । ଆମେ ତାଙ୍କ ସହ ବିତାଇଥିବା ପ୍ରତ୍ୟେକ ମୁହୂର୍ତ୍ତକୁ ସ୍ମରଣ ରଖିବୁ । ''

ପୁନମ ପାଣ୍ଡେ ଜଣେ ଲୋକପ୍ରିୟ ମଡେଲ , ଅଭିନେତ୍ରୀ ଓ ସୋସିଆଲ ମିଡିଆ ସେନ୍ସସେସନ। ସେ ୨୦୧୩ରେ ଫିଲ୍ମ 'ନଶା' ସହ ବଲିଉଡରେ ଡେବ୍ୟୁ କରିଥିଲେ । ସେ ଅନେକ ମ୍ୟୁଜିକ୍ ଭିଡିଓରେ ମଧ୍ୟ ନଜର ଆସିଛନ୍ତି । ପୁନମ ପାଣ୍ଡେ 2023ରେ କଙ୍ଗନା ରାଣାୱତଙ୍କ ରିଆଲିଟି ଶୋ' ଲକଅପ ସିଜନ ୧ରେ ପ୍ରତିଯୋଗୀ ଥିଲେ ।