ଫିଲ୍ମି ଫ୍ରାଇଡରେ ରିଲିଜ ହେଲା ଓଡିଆ ଫିଲ୍ମ 'ଅପରେସନ ୧୨/୧୭' ଭୁବନେଶ୍ୱର:ଫିଲ୍ମି ଫ୍ରାଇଡରେ ରିଲିଜ ହୋଇଛି ବହୁ ପ୍ରତିକ୍ଷୀତ ଓଡ଼ିଆ ଚଳଚ୍ଚିତ୍ର 'ଅପରେସନ ୧୨/୧୭' । ପ୍ରଥମ ଦିନରେ ଥିଏଟରରେ ଜମିଛି ଦର୍ଶକଙ୍କର ଖଚାଖଚ ଭିଡ଼ । ସାଇ ଲୁମ୍ବିନୀ ପ୍ରଡ଼କସନ୍ସ ରେ ନିର୍ମାଣ ହୋଇଥିବା ସିନେମା "ଅପରେସନ୍ ୧୨/୧୭ ସାଇ ଶରଣ"ର ପ୍ରିମିଅର ଶୋ' ମହାରାଜା ସିନେମା ହଲରେ ହୋଇଛି । ପ୍ରଥମ ଦିନରେ ସିନେମାକୁ ଦେଖିବା ପାଇଁ ଦର୍ଶକଙ୍କ ଭିଡ଼ ଲାଗିଥିବା ବେଳେ ହାଉସଫୁଲ ରହିଥିଲା ହଲ ।
ଦର୍ଶକଙ୍କ ମନ ଜିତୁଛି 'ଅପରେସନ ୧୨/୧୭':ସିନେମାଟି ଦେଶାତ୍ମକ ଓ ଆଧ୍ୟାତ୍ମିକ ଧାରାର ସିନେମା ହୋଇଥିବା ବେଳେ ପ୍ରତିଟି ଚରିତ୍ର ବେଶ ନିଖୁଣ ଭାବେ ନିଜର ଅଭିନୟ କରିଛନ୍ତି । ଦେଶଭକ୍ତି ସହ ଲଭ ରୋମାନ୍ସ ଓ ପାରିବାରିକ କାହାଣୀକୁ ନେଇ ଫିଲ୍ମଟି ପ୍ରସ୍ତୁତ ହୋଇଥିବା ବେଳେ ପ୍ରଥମ ଦିନରେ ଦର୍ଶକଙ୍କୁ ଆକୃଷ୍ଟ କରିବାରେ ସଫଳ ହୋଇଛି ଫିଲ୍ମ । ଓଡ଼ିଆ ଦର୍ଶକ ମାନେ ସିନେମାକୁ ବେଶ ଉପଭୋଗ କରିବା ସହ ଫିଲ୍ମର ଖୁବ ପ୍ରଶଂସା କରିଛନ୍ତି । ସେପଟେ ଭିନ୍ନ କାହାଣୀକୁ ନିର୍ମିତ ଏହି ଫିଲ୍ମ ଦର୍ଶକଙ୍କୁ ସିନେମାର ଶେଷ ଯାଏ ବାନ୍ଧି ରଖିବା ସହ ଏହା ନିଶ୍ଚୟ ଓଡ଼ିଆ ସିନେ ପ୍ରେମୀଙ୍କୁ ଭଲ ଲାଗିବ ଓ ପୁଣି ଥରେ ହଲରେ ଭିଡ ଜମିବ ବୋଲି କହିଛି ପ୍ରଯୋଜନା ସଂସ୍ଥା ।
ତେବେ 'ଅପରେସନ ୧୨/୧୭' ଏକ ବିଗ୍ ବଜେଟର ସିନେମା ହୋଇଥିବା ବେଳେ ଏହାର ନିର୍ଦ୍ଦେଶନା ଦେଇଛନ୍ତି ଷ୍ଟାଇଲିଷ୍ଟ ନିର୍ଦ୍ଦେଶକ ସୁଧାଂଶୁ ମୋହନ ସାହୁ l କାହାଣୀ ଲେଖିଛନ୍ତି ଦ୍ବୀପାୟନ ପଟ୍ଟନାୟକ, ସଂଳାପ ଲେଖିଛନ୍ତି ଦିଲ୍ଲୀପ ଚୌଧୁରୀ l ଗୀତ ଗୁଡିକ ଅରୁଣ ମନ୍ତ୍ରୀ ଏବଂ ଡକ୍ଟର ନିର୍ମଳ ନାୟକ ଲେଖିଥିବା ବେଳେ ସଙ୍ଗୀତ ନିର୍ଦ୍ଦେଶନା ଦେଇଛନ୍ତି ବର୍ତ୍ତମାନର ଟ୍ରେଣ୍ଡୀ ସଙ୍ଗୀତ ନିର୍ଦ୍ଦେଶକ ବୈଦ୍ୟନାଥ ଦାଶ l କଣ୍ଠଦାନ କରିଛନ୍ତି ହ୍ୟୁମାନ ସାଗର, ଋତୁରାଜ ମହାନ୍ତି , ସତ୍ୟଜିତ୍ ପ୍ରଧାନ, ଅସୀମା ପଣ୍ଡା ଏବଂ ଅନନ୍ୟା ଶ୍ରୀତମ ନନ୍ଦ l
'ଅପରେସନ ୧୨/୧୭' ଷ୍ଟାରକାଷ୍ଟ:ଶିଶୁ କଳାକାରରୁ ନିଜର କ୍ୟାରିଅର ଆରମ୍ଭ କରିଥିବା ଭୂମିକା ଗୋଟିଏ ଶିଶୁର ମାଆ ଭୂମିକାରେ ଅଭିନୟ କରି ନିଜର ଅଭିନୟର ଯାଦୁ ଦେଖାଇଛନ୍ତି l ଶ୍ରେୟାନଭୂମିକାଙ୍କ ବିପକ୍ଷରେ ନଜର ଆସିଥିବା ବେଳେ ଅନେକ ଧାରାବାହିକ ତଥା ଚଳଚ୍ଚିତ୍ରରେ ହାସ୍ୟ ଅଭିନେତା ଭାବେ ଅଭିନୟ କରିଆସୁଥିବା ଅମର ମହାପାତ୍ର ଚଳଚ୍ଚିତ୍ର ଅପରେସନ୍ ୧୨/୧୭ରେ ଏକ ଭିନ୍ନ ଚରିତ୍ରରେ ଅଭିନୟ କରିଛନ୍ତି । ଅନ୍ୟ ଅଭିନେତାଙ୍କ ଭିତରେ ଚୌଧୁରୀ ଜୟପ୍ରକାଶ ଦାସ, ପଙ୍କଜ ମହାନ୍ତି, ଉମାକାନ୍ତ ପାଣି,ପ୍ରଶାନ୍ତ ପାତ୍ର, ଦୁଷ୍ମନ୍ତ, କୈଳାଶ ପାଣିଗ୍ରାହୀ ବିଜିତ ବାରିକ୍, ଲୋପାମୁଦ୍ରା,ତ୍ରିଷ୍ଣା, ବିଷ୍ନୁପ୍ରିୟା, ସୋନାଲି, ସୁଜାତା ଏବଂ ଶିଶୁ କଳାକାର ଭାବେ କିୟାର, କୋମଲ ପ୍ରମୁଖ ଅଭିନୟ କରିଛନ୍ତି ।
ଏହା ମଧ୍ୟ ପଢନ୍ତୁ:‘ଅପରେସନ ୧୨/୧୭’ର ଟ୍ରେଲର ରିଲିଜ, ମାର୍ଚ୍ଚ ୮ରେ ମୁକ୍ତିଲାଭ
ଭୁବନେଶ୍ୱର, ଇଟିଭି ଭାରତ
