ହାଇଦ୍ରାବାଦ:ଅକ୍ଷୟ କୁମାର ୨୦୨୪ରେ ପୁଣି ପରଦାରେ ଧମାକା କରିବାକୁ ପ୍ରସ୍ତୁତ ଅଛନ୍ତି । ଅକ୍ଷୟ ଫିଲ୍ମ 'ବଡେ ମିୟାଁ ଛୋଟେ ମିୟାଁ'କୁ ନେଇ ଚର୍ଚ୍ଚାରେ ରହିଥିବା ବେଳେ ବର୍ତ୍ତମାନ ଅଭିନେତା ନିଜ ଆଗାମୀ ଫିଲ୍ମର ଟାଇଟଲ ଘୋଷଣା କରିଛନ୍ତି । ଖିଲାଡି କୁମାରଙ୍କ ଏହି ଚଳଚ୍ଚିତ୍ରର ନାମ ହେଉଛି 'ସରଫିରା' । ଆଜି ଅଭିନେତା ଫିଲ୍ମର ଏକ ଟିଜର ରିଲିଜ କରିଛନ୍ତି । ଏଥିରେ ଅକ୍ଷୟଙ୍କ ପ୍ରଥମ ଝଲକ ଦେଖିବାକୁ ମିଳିଥିବା ବେଳେ ରିଲିଜ ତାରିଖର ମଧ୍ୟ ଖୁଲାସା କରିଛନ୍ତି । ଏହି ଫିଲ୍ମ ଚଳିତ ବର୍ଷ ଜୁଲାଇ ୧୨ରେ ରିଲିଜ ହେବ ।
ଅକ୍ଷୟ କୁମାର ନିଜ ଇନଷ୍ଟାଗ୍ରାମରେ ଫିଲ୍ମର ଟାଇଟଲ ଟିଜର ସେୟାର କରିଛନ୍ତି । ଏଥିରେ ଅକ୍ଷୟଙ୍କ ପ୍ରଥମ ଲୁକ ଦେଖିବାକୁ ମିଳିଛି । ଭିଡିଓରେ ଅଭିନେତା ଏକ ବାଇକ ଚାଳନା କରୁଥିବା ନଜର ଆସିଛନ୍ତି । ଏହା ସେୟାର କରି ସେ ଲେଖିଛନ୍ତି, "ଏତେ ବଡ ସ୍ୱପ୍ନ ଦେଖ ଯେ ଲୋକେ ତୁମକୁ ପାଗଳ ବୋଲି କହିବେ ।'' ଜୁଲାଇ ୧୨, ୨୦୨୪ରେ ପ୍ରେକ୍ଷାଳୟରେ ମୁକ୍ତିଲାଭ କରିବ 'ସରଫିରା' । କହିରଖୁଛୁ କି, ଅକ୍ଷୟ କୁମାର ପୂର୍ବରୁ ଏହି ଫିଲ୍ମର ଘୋଷଣା କରି ଫିଲ୍ମର ଟାଇଟଲ 'ପ୍ରଡକ୍ସନ ନଂ-27' ଦେଇଥିଲେ । ବର୍ତ୍ତମାନ ଏହାର ଟାଇଟଲ 'ପ୍ରଡକ୍ସନ ନଂ-27' ପରିବର୍ତ୍ତେ 'ସରଫିରା' ବୋଲି ଘୋଷଣା କରିଛନ୍ତି ।