ମାଲକାନଗିରି: ନୋଟବନ୍ଦୀ ବେଳେ ଟଙ୍କା ପରିବର୍ତ୍ତନ କରିପାରନଥିଲେ ନକ୍ସଲ । ବାଧ୍ୟ ହୋଇ ଜଙ୍ଗଲ ମଧ୍ୟରେ କ୍ୟାମ୍ପରେ ନକ୍ସଲ ଫଣ୍ଡିଂରୁ ସଂଗ୍ରହ ହୋଇଥିବା ପୁରୁଣା 2ହଜାର ଟିଙ୍କିଆ ନୋଟକୁ ମାଟି ତଳେ ପୋତି ଦେଇଥିଲେ । ସେ ବି ହଜାର ନୁହେଁ ଲକ୍ଷ ଲକ୍ଷ ଟଙ୍କା । ଓଡିଶା- ଛତିଶଗଡ ସୀମାନ୍ତ ଧନତରୀ ଓ ଗରିଆବନ୍ଧ ନିକଟବର୍ତ୍ତୀ ଜଙ୍ଗଲରେ ପୋଲିସ ଅପରେସନ ବେଳେ ନକ୍ସଲଙ୍କ ଏପରି କାର୍ଯ୍ୟକଳାପର ପ୍ରମାଣ ମିଳିଛି । ଗତକାଲି ପୋଲିସ ଓ କେନ୍ଦ୍ରୀୟ ସୁରକ୍ଷାବାହିନୀର ମିଳିତ ଅପରେସନରେ ଓଡିଶା ରାଜ୍ୟ କମିଟିର ଧନନ୍ତରୀ-ଗରିଆବନ୍ଦ-ନୂଆପଡା ଡିଭିଜନର ମାଓବାଦୀମାନେ ଲୁଚାଇ ରଖିଥିବା ୩୮ ଲକ୍ଷ ଟଙ୍କା ଓ ବିପୁଳ ପରିମାଣର ମାରଣାସ୍ତ୍ର, ବିସ୍ଫୋରକ ଜବତ ହୋଇଛି ।
- ମିଳିଲା ବିଡା ବିଜା 2 ହଜାର ଟଙ୍କିଆ ନୋଟ
ଜବତ ଟଙ୍କା ମଧ୍ୟରେ ଏକାଧିକ ବିଡା କେବଳ ପୁରୁଣା 2 ହଜାର ଟଙ୍କିଆ ରହିଛି । ଯାହା 2016 ରେ କେନ୍ଦ୍ର ସରକାରଙ୍କ ଦ୍ବାରା ନୋଟବନ୍ଦୀ ବେଳେ ଅଚଳ ଘୋଷଣା କରାଯାଇଥିଲା । ଜବତ ଟଙ୍କାର ପରିମାଣ ପ୍ରାୟ 28 ଲକ୍ଷ ହେବା ନେଇ ପ୍ରାଥମିକ ଭାବେ ଗଣତି କରାଯାଇଛି । ଏଥିରେ ୬ ବଣ୍ଡଲ ୨ ହଜାର ଟଙ୍କିଆ ନୋଟ, ୫ ଶହ ଟଙ୍କିଆ ନୋଟ ୫୨ ବଣ୍ଡଲ ରହିଥିବା ସ୍ଥାନୀୟ ପୋଲିସ ସୂଚନା ଦେଇଛି । ଏହା ସହ ବିପୁଳ ପରିମାଣର ମାରଣାସ୍ତ୍ର ଓ ବିସ୍ଫୋରକ ସାମଗ୍ରୀ ମଧ୍ୟ ସୁରକ୍ଷାବଳ ହାତରେ ଲାଗିଛି ।
- ଓଡିଶା-ଛତିଶଗଡ ସୀମାରେ ସଫଳତା:-
ଧନନ୍ତରୀ ଓ ଗରିଆବନ୍ଦ ସୀମାନ୍ତ ଗୋବରା ଓ ପେଣ୍ଡ୍ରା ଜଙ୍ଗଲରେ ପ୍ରାୟ ପ୍ରାୟ ଦଶ ଫୁଟ ଗାତ ଖୋଳି ସେଥିରେ ଏହି ଟଙ୍କା ଓ ମାରଣାସ୍ତ୍ର ରଖାଯାଇଥିଲା । ଫଳରେ ସେଠାରେ ପୂର୍ବରୁ ନକ୍ସଲ କ୍ୟାମ୍ପ ଥିବା ଏକପ୍ରକାର ସ୍ପଷ୍ଟ ହୋଇଛି । ଏହା ସହ ବିସ୍ଫୋରଣରେ ବ୍ୟବହୃତ ବିଭିନ୍ନ ଉପକରଣ ଓ ଟିଫିନ ବୋମା ପରି ସାମଗ୍ରୀ ମଧ୍ୟ ରହିଛି । ପୁଞ୍ଜିପତି, ଠିକାଦାର ଏବଂ ଧନୀ ଶ୍ରେଣୀର ଲୋକଙ୍କ ଠାରୁ ଆଦାୟ ହୋଇଥିବା ଏହି ଟଙ୍କାକୁ ନକ୍ସଲ ସୁରକ୍ଷାକର୍ମୀଙ୍କୁ ଟାର୍ଗେଟ କରିବା ପାଇଁ ଗୋଳାବାରୁଦ,ବନ୍ଧୁକ ଇତ୍ୟାଦି କିଣିବାରେ ଖର୍ଚ୍ଚ କରିଥାନ୍ତେ ବୋଲି ସନ୍ଦେହ କରାଯାଉଛି ।