ନୂଆଦିଲ୍ଲୀ: ମିଜୋରାମ ସୀମାରେ ଅନୁପ୍ରବେଶ କରିଥିବା ମିଆଁମାର ସେନାର ସୈନିକମାନେ ଖୁବଶିଘ୍ର ସେମାନଙ୍କ ଦେଶକୁ ଫେରିବେ । ଏ ଦିଗରେ ଜାରି ରହିଥିବା ସରକାରୀ ସୂତ୍ରରୁ ସୂଚନା ମିଳିଛି । ଜଣେ ବରିଷ୍ଠ ପ୍ରତିରକ୍ଷା ଅଧିକାରୀ ‘ଇଟିଭି ଭାରତ’କୁ ସୂଚନା ଦେଇ କହିଛନ୍ତି, ମିଆଁମାର ସେନାର ସୈନିକମାନେ ସୀମାନ୍ତରେ ବିଦ୍ରୋହୀ ଗୋଷ୍ଠୀଙ୍କ ଦ୍ବାରା ପ୍ରବଳ ଗୁଳିମାଡର ଶିକାର ହୋଇ ମିଜୋରାମ ସୀମାରେ ଅନୁପ୍ରବେଶ କରିଛନ୍ତି । ସମସ୍ତଙ୍କୁ ମିଆଁମାର ଫେରାଇବା ପାଇଁ ପ୍ରକ୍ରିୟା ଆରମ୍ଭ ହୋଇଛି । ଖୁବଶିଘ୍ର ସେମାନେ ସ୍ବଦେଶ ଫେରିଯିବେ ।’’
ମିଳିଥିବା ସୂଚନା ଅନୁସାରେ, ଗତ ଦୁଇଦିନ ମଧ୍ୟରେ ମିଆଁମାର ସେନା ଓ ସ୍ଥାନୀୟ ଉଗ୍ରବାଦୀ ସଂଗଠନ ମଧ୍ୟରେ ଏକାଧିକ ଗୁଳିମାଡ ହୋଇଛି । ବିଦ୍ରୋହୀ ଗୋଷ୍ଠୀଙ୍କ ପ୍ରବଳ ଗୁଳମାଡରେ ମିଆଁମାର ସେନାର ଏକାଧିକ ଟିମ ସୀମା ପାର କରି ମିଜୋରାମରେ ପ୍ରବେଶ କରିଛନ୍ତି । ଏହି ବିଦେଶୀ ସୈନିକଙ୍କ ସଂଖ୍ୟା ପ୍ରାୟ 280ରୁ 300 ମଧ୍ୟରେ ହେବା ନେଇ ସୂଚନା ମିଳିଛି । ସେମାନଙ୍କୁ ଚିହ୍ନଟ କରାଯାଇ ସାରିଛି । ନିକଟରେ ମେଘାଳୟ ରାଜଧାନୀ ଶିଲଂରେ ଶେଷ ହୋଇଥିବା ଉତ୍ତର-ପୂର୍ବ ପରିଷଦ ବୈଠକରେ ମିଜୋରାମ ମୁଖ୍ୟମନ୍ତ୍ରୀ ଲାଲଡୁହୋମା କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କୁ ଏ ସମ୍ପର୍କରେ ଅବଗତ କରିଛନ୍ତି । ବିଦେଶୀ ସୈନିକଙ୍କୁ ସେମାନଙ୍କ ଦେଶକୁ ଫେରାଇବା ପାଇଁ ସମସ୍ତ ପ୍ରକାର ବ୍ୟବସ୍ଥା ଉଭୟ କେନ୍ଦ୍ର ଓ ମିଜୋରାମ ସରକାର ଗ୍ରହଣ କରୁଛନ୍ତି ।