ନୂଆଦିଲ୍ଲୀ:ଜାତୀୟ ରାଜଧାନୀ ଦିଲ୍ଲୀରେ ପୁଣି ବିଜେପିର ହ୍ୟାଟ୍ରିକ ବିଜୟ । 7ରୁ 7ଟି ଲୋକସଭା ଆସନ ପୋଛି ନେଇଛି ବିଜେପି । କାମ ଦେଲାନି ଆପ୍ କଂଗ୍ରେସର ରଣନୀତି । ଦିଲ୍ଲୀରେ ତୃତୀୟ ଥର ଲାଗି କ୍ଲିନସ୍ବିପ କରି ବଡ଼ ବିଜୟ ହାସଲ କରିଛି ଗୈରିକ ଦଳ । ଦିଲ୍ଲୀର ହଟସିଟ୍ କୁହାଯାଉଥିବା ନୂଆଦିଲ୍ଲୀ ଆସନରେ ବାଂସୁରୀ ସ୍ବରାଜ ପ୍ରଥମ ଥର ଲାଗି ବିଜୟୀ ହୋଇଥିବା ବେଳେ ଉତ୍ତର-ପୂର୍ବ ଦିଲ୍ଲୀରେ ମନୋଜ ତିୱାରୀ ତୃତୀୟ ଥର ଲାଗି ବିଜୟର ଧାରା ବଜାୟ ରଖିଛନ୍ତି ।
ନୂଆଦିଲ୍ଲୀରେ ଜିତିଲେ ବିଜେପି ପ୍ରାର୍ଥୀ ବାଂସୁରୀ ସ୍ବରାଜ
ନୂଆଦିଲ୍ଲୀ ଲୋକସଭା ଆସନରେ ବିଜେପି ପ୍ରାର୍ଥୀ ବାଂସୁରୀ ସ୍ବରାଜ ବିଜୟୀ ହୋଇଛନ୍ତି । ଆମ ଆଦମି ପାର୍ଟି ସୋମନାଥ ଭାରତୀଙ୍କ ସହ ବାଂସୁରୀଙ୍କ କଡ଼ା ମୁକାବିଲା ହୋଇଥିଲା । ବାଂସୁରୀ ହେଉଛନ୍ତି ବିଜେପିର ବରିଷ୍ଠ ନେତ୍ରୀ ତଥା ଦିବଙ୍ଗତ ସୁଷମା ସ୍ବରାଜଙ୍କ ଝିଅ । ବାଂସୁରୀ ବିଜୟୀ ହେବା ପରେ ଦିଲ୍ଲୀ ବିଜେପି ଶିବିରିରେ ଖୁସିର ମାହୋଲ ଦେଖିବାକୁ ମିଳିଛି । ବାଂସୁରୀ ସ୍ବରାଜଙ୍କୁ ବିଜୟକୁ ନେଇ ତାଙ୍କୁ ଦଳୀୟ କର୍ମୀ ଶୁଭେଚ୍ଛା ଜଣାଇଛନ୍ତି ।
ଉତ୍ତର-ପଶ୍ଚିମ ଦିଲ୍ଲୀରେ ଜିତିଲେ ଯୋଗେନ୍ଦ୍ର
ଉତ୍ତର ପଶ୍ଚିମ ଦିଲ୍ଲୀରେ ବିଜେପି ପ୍ରାର୍ଥୀ ଯୋଗେନ୍ଦ୍ର ଚନ୍ଦୋଲିଆ ବିଜୟୀ ହୋଇଛନ୍ତି । ତାଙ୍କ ନିକଟତମ ପ୍ରତିଦ୍ବନ୍ଦ୍ବୀ ଥିବା କଂଗ୍ରେସ ପ୍ରାର୍ଥୀ ଉଦିତ ରାଜଙ୍କୁ ପରାଜୟର ସାମ୍ନା କରିବାକୁ ପଡ଼ିଛି ।
ଉତ୍ତର-ପୂର୍ବ ଦିଲ୍ଲୀରେ ମନୋଜ ତିୱାରୀଙ୍କ ହ୍ୟାଟ୍ରିକ ବିଜୟ
ଦିଲ୍ଲୀର ଅନ୍ୟତମ ହଟସିଟ୍ ଉତ୍ତର ପୂର୍ବ ଦିଲ୍ଲୀରେ ତୃତୀୟ ଥର ଲାଗି ବିଜୟ ଧାରା ବଜାୟ ରଖିଛନ୍ତି ବିଜେପିର ସେଲିବ୍ରିଟି ପ୍ରାର୍ଥୀ ମନୋଜ ତିୱାରୀ । ମନୋଜଙ୍କୁ ଟକ୍କର ଦେବା ଲାଗି ଅନେକ ବାଦବିବାଦ ସତ୍ତ୍ବେ କଂଗ୍ରେସ କହ୍ନୈୟା କୁମାରଙ୍କୁ ପ୍ରାର୍ଥୀ କରିଥିଲା । ଏଥିଲାଗି ଦଳୀୟ କନ୍ଦଳ ମଧ୍ୟ ଉପୁଜିଥିଲା । କିନ୍ତୁ ଏଠାକାର ଭୋଟର କଂଗ୍ରେସ ପ୍ରାର୍ଥୀଙ୍କୁ ପ୍ରତ୍ୟାଖ୍ୟାନ କରିଛନ୍ତି । ବିଜେପି ପ୍ରାର୍ଥୀ ମନୋଜ 1 ଲକ୍ଷ ଭୋଟ ବ୍ୟବଧାନରେ ବିଜୟୀ ହୋଇଛନ୍ତି ।
ପଶ୍ଚିମ ଦିଲ୍ଲୀରେ ବିଜେପିର ମହିଳା ପ୍ରାର୍ଥୀଙ୍କ ମୁଣ୍ଡରେ ବିଜୟ ମୁକୁଟ